Iseni no Kumfwa Ilyashi lya ku Cintubwingi Ilileti
“Imibele ya Pano Isonde Ilepita”
SHINO NI NSHITA SHA LULUMBI. Ifintu fya kutenshe calo cilemoneka kwati filekonkana fye bwangu bwangu. Bushe inshita shimo filamuponya pa musao no kumufulunganya pa kumona ukuti ifintu fyonse filealuka lubilo lubilo?
Baibolo yalilandapo amashiwi yabamo ukushilimuka pa lwa milandu ya bantunse aiti: “Imibele ya pano isonde ilepita.” (1 Abena Korinti 7:31) Umutumwa Paulo, uwalembele ayo mashiwi, alepashanya ifilecitika mu calo ku kupita kwa fintu pa cisebele ca fyangalo. Ukutula fye kale na kale, intungulushi sha calo nga batendeka ifintu fimo balamoneka pe sonde no kupita, kabili lyonse kulesa bambi abapyana pa bapita. Lelo mu nshiku shesu—maka maka ukutula muli ulya mwaka wakakala uwa 1914—cimoneka kwati ifintu fyatampa ukupita mu kwangufyanya.
Lelo, bushe mwalishiba ukuti aya mafya ya mu calo—nangu fye yantu yacitika nomba line—yaba ni mbila nsuma ku bantunse? Cine cine, pantu yaba bushininkisho bwa kuti imibele ya pano isonde nomba line ikapita no kupyanwapo ne mibele isuma. Baibolo yalisobele kale fye amacushi yalecitika lelo. Ilalondolola no kuti icimfulumfulu ca musango yu ca kutangilila fye ukwaluka kukalamba ukushatala akumonwa ukukakuma abantunse bonse. Ici cimpungili cili no kwisa, nangu cileumfwika ica kutiinya, caba ni mbila yawamisha ku bantu basuma konse konse. Imibele ilipo pano isonde ikapita kabili kukesa imibele ya mutende ne nsansa ku bantunse.
Bushe kuti mwafwaya ukwishiba na fimbi pa lwa uku kwaluka ne fyo Baibolo yalondolola? Mulelaalikwa ukusangwa ku lyashi lya ku cintubwingi ilileti “Imibele ya Pano Isonde Ilepita,” pa kulongana kwa citungu ukwa Nte sha kwa Yehova ukukabako mu August na mu September. Uku kulongana kukaba mu fifulo ifingi pano isonde. Nga mulefwaya ukwishiba pa lwe bungano lipaleme na kuntu mwaikala, ipusheni Inte sha kwa Yehova uko kwine mwikala.
[Icikope pe bula 32]
Ibomba lya atomiki lyaonaula Hiroshima mu 1945
[Abatusuminishe]
Icikope ca ba USAF
[Icikope pe bula 32]
Icibumba ca ku Berlin cabongoloka mu 1989
[Abatusuminishe]
AP Photo/Lionel Cironneau
[Icikope pe bula 32]
Utupondo twasansa icifulo ca World Trade Centre mu New York mu 2001