Ukulingana na Baibolo

Bushe Kwaliba Ulubembu Lushingalekelelwa?

BUSHE kwaliba ukukandwa kwacila pa mfwa? Ee, ukwa mfwa yabula isubilo lya kubuuka pa mulandu wa kucita ulubembu lushingalekelelwa. Yesu atile kwaliba umusango umo uwa lubembu ‘ulushingalekelwa.’—Mateo 12:31.

Nangu cibe fyo, Baibolo ilondolola ukuti Lesa alalekelela. Nelyo abantu balemenena ku kusungilila icikonko, no kukanalekelela, Lesa ‘alalekelela apakalamba.’ (Esaya 55:7-9) Na kabushe, Lesa ali-ipeleshe nga nshi no kutuma Umwana wakwe uwatemwikwa kwi sonde ku kuba ilambo lya cikonsolwelo, nelyo ilya kufimba, ilyauma sana umutengo ica kuti kuti lyafuuta imembu shesu.—Yohane 3:16, 17; Imilimo 3:19; 1 Yohane 2:1, 2.

Pa nshita yalinga Lesa akabuusha abengi abaali no mulandu wa membu ishikulu lelo abashakalubulule pa membu bacitile ilyo bashilafwa. (Imilimo 24:15; Abena Roma 6:23) Na kuba, Yesu atile, “umusango onse wa lubembu ne miponto fikalekelelwa ku bantu,” kano fye ulubembu lushingalekelelwa. (Mateo 12:31) Napamo kuti mwalanguluka amuti, ‘Nga kanshi cinshi cingabipisha ica kuti caba icishingalekelwa na Lesa?’

Ukucila pa Cipimo ca Kulapila

Ukusoka Yesu asokele kwalelosha ku lubembu lwa kuitemenwa kabili ulwa ku mufulo ulwa “kupontela umupashi.” Takwaba kulekelelwa ku lubembu lwabe fi. Alundileko no kuti: “Takalekelelwe nakalya, muli buno bwikashi nangu ni muli ubo ubukesa.” (Mateo 12:31, 32) Abasangwa no mulandu wabe fi tabakabuushiwe.

Bushe ukupontela umupashi wa mushilo e cinshi? Kutuntuka mu mutima, ukusokolola imibele ya mufulo no bufwayo. Ukukwata ubufwayo bwa kulwisha umupashi wa mushilo uwa kwa Lesa kulenga ulu lubembu ukubipilako. Ku ca kumwenako: Mu fyalo fimo, ifunde lilalekanya bukomi bwa kwipaya umuntu ku mufulo no bukomi bwa kwipaya umuntu ukwabula ukumupangila, kabili abapingulwa ukwipaiwa ni abo fye bepeye umuntu ku mufulo nelyo abapangiile limo.

Umutumwa Paulo aleponta kale lelo atile: “Nabelelwe uluse, pantu nshaishibe.” (1 Timote 1:13) Ukubembukila umupashi wa mushilo kulwishanya na o ku mufulo. Cisanshamo ukubipa kwa mibele ya mutima ukwafika pa cipimo ca kukanalapila.

Cilemoneka kwati Paulo alelanda pali uyu musango wa lubembu ilyo alembele ati: “Pantu ababuutushiwa kale, kabili abasondapo ica bupe ca mu muulu, kabili abakumako ku mupashi wa mushilo, kabili abasondapo icebo cisuma ica kwa Lesa ne fya maka ifya bwikashi ubukesa, lelo nga bafutukako, te kuti babweshiwe kabili ku kulapila.” (AbaHebere 6:4-6) Umutumwa Paulo na kabili atile: “Nga tulacita ulubembu ku mufulo pa numa ya kupokelela ukwishiba icine bwino bwino, ninshi takwashala kabili ilambo nangu limo ilya pa membu.”—AbaHebere 10:26.

Icalengele Yesu ukuti asoke pa lubembu lushingalekelelwa mulandu wa mibele ya ntungulushi sha mipepele shimo isha ilya nshita. Lelo tabaumfwilile kusoka kwakwe. Na kuba, e bamwipaishe. Inshita imbi bayumfwilile ubushinino bwa kuti umupashi wa mushilo wacitile cintu ca kusungusha. Baebelwe ukuti Yesu alibuushiwa ku bafwa! Calimoneke apabuuta ukuti Yesu e wali Kristu! Na lyo line balwishenye no mupashi wa mushilo pantu balipile abashilika ba bena Roma ukuti babepe pa lwa kubuuka kwa kwa Yesu.—Mateo 28:11-15.

Ica Kusoka Abena Kristu ba Cine

Mulandu nshi Abena Kristu ba cine bangilwa ukusoka ukukuma ku lubembu lushingalekelelwa? Ni pa mulandu wa kuti nelyo twalishiba Lesa bwino bwino ne mibombele ya mupashi wakwe, umutima wabipa kuti waisamo. (AbaHebere 3:12) Tufwile ukuba abacenjela ukukanatontonkanya ukuti ici teti citucitikile. Tontonkanyeni pali Yuda Iskariote. Pa nshita imo aali mukonshi wa kwa Yesu uwa busumino. Asalilwe nga umo uwa batumwa 12, e co kanshi afwile alikwete imibele isuma. Lelo pa kashita kamo alekele amatontonkanyo no kufwaisha kwabipa ukukula, na kwi pele pele e yatendeke ukumutungulula. Inshita aali nsangwapo ku fipapusho Yesu alecita, aleiba ne ndalama. Lyene, pa mulandu wa ndalama, afutwike Umwana wa kwa Lesa.

Abantu bamo abaali Abena Kristu ba busumino kale balitaluka kuli Lesa ku mumbo fye, napamo ni pa mulandu wa cilulo, icilumba, nelyo ubufunushi, kabili nomba basangu balwishanya no mupashi wa kwa Lesa. Ku mufulo bacincintila imilimo imoneka apabuuta iibomba umupashi. Bushe aba bantu balicita ulubembu lushingalekelelwa? Yehova e Kapingula mukalamba.—Abena Roma 14:12.

Ukucila ukupingula bambi, kuti cawama twayangwa ku kuicingilila pa lwesu ukukanalacita imembu mu bumfisolo isho panono panono shingakunkumya imitima yesu. (Abena Efese 4:30) Kabili tulasansamushiwa ukwishiba ukuti Yehova akatulekelela apakalamba, na pa membu ishikulu isho twacita, nga twalapila.—Esaya 1:18, 19.

[Icikope pe bula 14, 15]

AbaFarise bamo bacitile ulubembu lushingalekelelwa