Ukulingana na Baibolo

Lintu Mupepa Ukushipepa Balupwa Lwenu

UKULINGANA ne fyo bamo batunganya, mwi sonde lyonse mwaba imipepele no tumabumba twa mapepo ukucila 10,000. Mu calo cimo, amapesenti mupepi na 16 aya bakalamba balileka ukupepa uko balepepa no kutendeka ukupepa kumbi. Kanshi e mulandu wine balupwa ne fibusa bashasuminina muli fimo fine. Ne cifumamo inshita shimo kukanaumfwana. Bushe Abena Kristu balingile ukumona shani balupwa abo bashipepa na bo kumo kwine?

Bucibusa Bushaiwamina

Ku ca kumwenako, natutontonkanye pa fyo Baibolo yalanda pali bucibusa bushaiwamina ubwaba pa bafyashi na bana. Mwi funde lyaba pa Ukufuma 20:12 ilitila “ulecindika wiso na noko,” ukuleka ukucindika abafyashi takwalandwapo. Na kuba ilyo Yesu alandile pali ili funde, pali Mateo 15:4-6, ukwabula no kutwishika alelanda pa mucinshi uo abana abakalamba bengapeela abafyashi babo.

Ibuuku lya mu Baibolo ilya Amapinda lilasoka abana ukuti bafwile ukucindika abafyashi babo. Amapinda 23:22 yafunda ukuti “wisuula noko uwakota.” Na Amapinda 19:26 yasoka ukuti “uupumpunta wishi no kufulumuna nyina e mwana mwaume uulenge nsoni kabili uufwilamika.”

Amalembo nayalanda bwino ukuti tatufwile ukulekelesha abafyashi besu. Kanshi bucibusa na bafyashi besu tabufwile ukupwa nga ca kuti tabatemenwe imipepele yesu. Ifi fishinte fya mu Baibolo filabomba na kuli balupwa lwesu bambi na ku bena mwesu. Kanshi Abena Kristu bafwile ukutemwa balupwa lwabo nga fintu Amalembo yalangilila.

Calicindama Ukuba Uwanakilila

Ca cine, Baibolo ilatusoka ukutaluka ku kubishanya kubi, kabili imibele iyabipa kuti yafuma na kuli lupwa lwesu uwapalamisha. (1 Abena Korinti 15:33) Ababomfi ba cishinka aba kwa Lesa abengi aba ku kale bacitile icawama nangu ca kuti abafyashi babo tabalecite fyo. Cifwile e fyo cali ku bana baume aba kwa Kora. (Impendwa 16:32, 33; 26:10, 11) Abena Kristu tabafwile ukucita ifipusene ne fyo batetekela pa kuti batemune bambi, nangu fye ni balupwa lwabo.—Imilimo 5:29.

Inshita shimo abafyashi nelyo balupwa balalwisha nga nshi Umwina Kristu pa mulandu wa fyo asumina. Bambi napamo kuti basanguka fye na balwani ba buKristu bwa cine. Nga cabe fyo, Abena Kristu mu kutekanya balacitapo cimo pa kuti bacingilile bumupashi bwabo. Yesu asosele ati: “Aba mu ng’anda yakwe yine e bakaba abalwani ba muntu. Uwatemwa wishi nelyo nyina ukucila ine, tawamina ine; kabili uwatemwa umwana mwaume nelyo umwana mwanakashi ukucila ine, tawamina ine.”—Mateo 10:36, 37.

Lelo, ilingi line Abena Kristu tababalwisha sana kuli balupwa lwabo. Balupwa lwabo tabasumina fye ifyo bena baishiba pali Baibolo. Amalembo ya Mushilo yakoselesha abasambi ba kwa Kristu ukuba na “katiina” no “kunakilila” ku bashasumina. (2 Timote 2:25; 1 Petro 3:15) Baibolo ifunda ukuti: “Umusha wa kwa Shikulu tafwile ukucita ulubuli, lelo afwile ukuba uwanakilila kuli bonse.” (2 Timote 2:24) Umutumwa Paulo na o afundile Abena Kristu “ukupontela umuntu nangu umo iyo, ukukanaba no lubuli, ukuba abanakilila, kabili abafuuka ku bantu bonse.”—Tito 3:2.

Mwilalabako Kuli Bene Kabili Mulebalanga Ukutemwa

Pali 1 Petro 2:12, Abena Kristu baebwa ukuti: “Mube ne myendele isuma mu bena fyalo [abashasumina], ukuti . . . bacindike Lesa . . . pa kumone milimo yenu isuma.” Ilingi line, balupwa lwesu abashasumina balamona ifyo ifishinte fya Baibolo fya-alula imibele yesu. Ibukisheni ukuti abengi abashapooseleko mano ku cine ca mu Baibolo nangu fye bantu balekaana, balyalula amatontonkanyo yabo. Napamo calibasendele fye ne myake iingi pa kuti bamone umulandu abena mwabo nelyo abana babo babeela ne mibele isuma. Kanshi mwe Bena Kristu mwilaleka balupwa lwenu ukukana icine ca mu Baibolo pa mulandu wa kubalekelesha.

Kwena, imibele ilapusanapusana, kabili Abena Kristu bamo bekala ukutali na bafyashi babo. Limo kuti ca-afya ukulatandala lyonse. Lelo ukubalembela bakalata, ukubatumina lamya, nelyo ukulanga ukuti tamwabalabako kukalanga ukuti mwalibatemwa nga nshi. Abengi abashili Bena Kristu ba cine balitemwa abafyashi babo na balupwa lwabo bambi kabili balalanshanya na bo lyonse te mulandu ne fyo basuminamo. Ifi fine, e fyo ne Nte sha Bwina Kristu shifwile ukucita.

[Icikope pe bula 18]

Ukukanalabako kuli balupwa kukalanga ukuti mwalibatemwa nga nshi