Mwilacelwa!

LIPOTI wa USA Today alandile kuti: “Ukucelwa kwa bakalamba ba ncito kwalibipa icine cine. Pa kukumana bakwata 10, imiku 6 e yo bacelwa.” Pa numa ya kufwailisha, lipoti yalundapo kuti abakalamba ba ncito 2,700 balacelwa.

Ukucelwa kwalibipisha ku bamakwebo. Ilyo bafwailishe pa bo balemba incito 81,000, mu fyo bafwailishe basangile kuti: “Inshite ikalamba yonakila pa mulandu wa kucelwa no kufuma pa ncito ukwabula ulusa, e cilenga ne ndalama ishingi ukonaulwa.” Kwena te ku bamakwebo fye beka uko ukucelwa kulenga aya mafya. Ilyo bafwailishe pe sukulu lya pa sekondari abakalamba be sukulu batile, “abana be sukulu ilingi line balecelwa kabili e calelenga no kuti ilingi balebakanda.”

Kalenga wesu afwaya ukuti tulesunge nshita. Alibikako “ifya kubuutusha fibili ifikalamba”—akasuba no mweshi—ku kutwafwo kwishiba inshita. (Ukutendeka 1:14-16) Ino nshita twalikwata inkoloko iitwafwo kwishiba nshita mu maminiti na masekondi. Nangu kube ifi ifya kwishibilako inshita ifyo twakwata, fwe bengi tucili twaliba no bwafya bwa kucelwa—ku ncito, ku sukulu, kabili tulacelwa na ku fipangano fimbi ifyacindama.

Bushe twaba no bu bwafya pa mulandu wa kuti tatwakwata inshita? Ca cine, incito no kusakamana aba pa ng’anda fyalikosa. Na lyo line, umufyashi uubomba incito, uwe shina lya Wanda Rosseland atile: “Nalekele ukuilishanya pa kukanalakwate nshita lintu nasangile kuti bonse twakwata amaawala 24 cila bushiku. Nalitontonkenyapo no kusondwelela kuti muli ici calo catumpuluka, te kuti tulande ati inshita twakwata inono, lelo fya kupumfyanya fye e fyafula.”

Tontonkanyeni na pali Renee Inte ya kwa Yehova,a uwaba na bana basano. Ebukisho kuti: “Ilyo abana bandi bali abanono, calyafishe ukubapekanishisha ku sukulu na ku kulongana kwa Bwina Kristu. Na lyo line nshalecelwa. Nomba ili bakula e lyo nakwata uyu musango wabipa uwa kucelwa.” Bushe na imwe mwaba no uyu musango wabipa uwa kucelwa? Nga ca kuti mulacelwa, kuti mwayaluka! Fimo ifyo mwingacita ni fi.

● TONTONKANYENI PA FIKAFUMAMO. Ukucelwa lyonse kumoneka kwati kantu akanono. Lelo tontonkanyeni pa mashiwi yaba mu Baibolo ayasoso kuti: “Lunshi uwafwa apimpinusha amafuta ya kwa katobenkanya: ukutumpa kunono koona amano no bukata.” (Lukala Milandu 10:1) Ca cine, “ukutumpa kunono” mu kukanalangulukila bambi, kuti kwaonaula ishina lyenu kuli kafundisha na ku bamwingisha ncito.

Namayo uwe shina lya Marie ilyo alesambilila pa kolege iyabelele mu cifulo aleikala, amwene kuti abo alesambilila nabo bamo “tabalesunge nshita,” ilingi balecelwa ukwisa mu kalasi. Lelo Marie ebukisha ukuti: “Tapakokwele basukile baleka ukucelwa. Baprofesa babili bapampamike funde lya kuti takuli kucelwa. E ico ngo mwana we sukulu acelwako fye nangu amaminiti yanono, baleconga ati teshile ku sukulu. E lyo ukubacongo kuti tabeshile ku sukulu ni cimo ico baleponenapo.”

Ukucelwa lyonse kuti kwamonawila ishina kuli bacibusa wenu. BaJoseph abali mu mushinku wa bukalamba balanda pa munabo Umwina Kristu uo baishibene nankwe pa myake iingi iyapita. Ne lyo uyu muntu alicindikwe pa mulandu wa kwishiba ukusambilisha bwino, aali no bunake. BaJoseph baibukisha ukuti uyu mwaume “Alecelwa lyonse. Alecelwa muli fyonse! Kabili talesakamana na kusakamana pa fyo alecelwa. Pa kucelwa kwine uku abantu balemupumishapo.” Bushe abantu balalandako pali imwe ukuti mulacelwa lyonse? Nga ca kuti balalanda, lyene tabakaloleshe pa misango yenu iisuma.

● LANGULUKILENIKO BAMBI. Mukucelwa tamwaba mucinshi kabili kulapumfyanya bambi. Kabili kulanga ukuti muimona ati mwalicila bambi. Shimakwebo umo alondolwele umulandu abengi mu bakalamba bamakwebo bacelelwa ku kukumana kwabo, atile: “Fwe bengi twaba fye ne cilumba.” Ku Bena Kristu bena te fyo caba pantu bena bamona bambi ukuti e babacila. (Abena Filipi 2:3) Balakonka ne Funde lya Mulinganya kabili basunga bambi nge fyo bengafwaya bambi ukubasunga. (Mateo 7:12) Mwandini taciwama ukulolela bambi! Kanshi Mwilaleka bambi balemulolela.

● SAMBILILENI IFYA KUSUNGA INSHITA. Bushe mulalaalikisha ifintu fimo pa kuti mukabombe ilyo kwashala inshita iinono? Bushe mulatantika ifya kucita ifingi, no kwesha ukubomba mu nshita fye inono? Icishinte caba pali Lukala Milandu 3:1 kuti camwafwa, citila: “Ku cintu conse kwabe nshita iyalingwa.” Ukukwata “nshita iyalingwa” ku fintu kuti kwamwafwa ukubomba no muyano

Ica kubalilapo, lembeni fyonse ifyo mulefwaya kubomba. Icakonkapo konkeni icishinte caba pa Abena Filipi 1:10 icitila: ‘Shininkisheni ifyacilapo ukucindama.’ Balilenipo kubomba ifyacindama. Finshi sana sana filekabilwa kubombwa? Ni finshi mwingalekelesha ukubombelapo? Ica kulekelesha pendeni nshita iyo mukakabila ukupoosa pa kubomba uyu mulimo no bushiku mukabomba. Shininkisheni ifyo mulecita, kabili mwitantika ifya kucita ifingi mu nshita fye iinono.

Namayo uwe shina lya Dorothy, atasha abafyashi bakwe pa kumusambilisha ukukanacelwa. Alondololo kuti: “Nga ca kuti twalekabila ukuba ku kulongana kwa Bwina Kristu kuma 7:30 p.m., bamayo baletendeka ukutupekanishisha ukulongana ilyo kucili iawala limo na maminiti 45. Twaleshako inshita ya kulya mulalilo, ukusamfye mbale, ukufwala, kabili twaleshako ne nshita yakwensha motoka pa kuti tufike ku kulongana. Twasukile twaishibila ukukanacelwa.” Limo limo caliwama ukushako nshita iyo mwingabomfya ku fintu ifyo mushile-enekela. BaDorothy baibukisho kuti: “Tapakokwele apo nailile mu kusenda abantu abanono ukubatwala ku kulongana. Mu nshila umupeto wa motoka wali fomonweke. Nalilungishe umupeto kabili nasheleko ne nshita ya kusenda bantu. Mwamona, lyonse ndashininkisha ukuti nashako nshita pantu limbi kuti kwaba ukulungisha motoka nelyo kuti bamotoka bafula sana pa musebo.”

● UMFWENI KULI BAMBI. Pa Amapinda 27:17 Baibolo itila: “Icela cinone cela, no muntu anone cinso ca mubiye.” Mu kumfwana ne ci cishinte, landeni na bambi ababa no bwafya ngo bo mukwata—lelo abashicelwa. Ilingi line bakamweba ifyo mwingacita.

Renee uo tulumbwile kale, alepanga ukubombela pa kukanalacelwa. Atila: “Tapakokwele sana apo napangile ukuti mfwile ukuleka ukucelwa. Nangu tacayanguka, kwena ndebomba bwino.” Na imwe kuti mwacita cimo cine. Cikulu fye mwaishiba ico mulecita kabili mwabombesha no kubombesha, kuti mwasambilila ukubangilila!

[Futunoti]

[Ifikope pe bula 24]

Uwaingila ncito uucelwa lyonse alanga imisango yabipa ku ba mwingisha ncito na kabili alango kuti talangulukilako bambi

[Icikope pe bula 25]

Ukuteyanya bwino ifintu kuti kwamwafwa ukukanaonaula nshita