Icinso Cipya Kuli Mailyn

NGA FINTU CHASHIMIKWA NA BANYINA KWA MAILYN

Cinshi calengele Mailyn, umwana wandi umwanakashi umusuma uwa myaka 11, ukukwata icinso cipya? Lekeni nondolole.

Mailyn e mwana mwanakashi wandi uwa bubili. Afyalilwe mu Holguín, ku Cuba, pa August 5, 1992. Bawishi, nkashi nankwe, na ine twalitemenwe ilyo afyelwe. Awe tapakokwele insansa shesu shalipwile. Inshiku shinono ukutula apo afyalilwe, nayambwile kampasa, kabili umweshi umo pa numa Mailyn na o alyambwile.

Ilyo alwele fye, tamoneke ngo ulwele sana lelo pa numa ukulwala kwalicililemo kabili bamutekele na mu cipatala. Mailyn balemuundapa fye bwino, lelo amaka ya mubili ayacincintila amalwele yalinenwike ica kuti asukile ayambula ubulwele. Namwene icintu cimo icaibelele icakashika pa mona wakwe. Badokota batile ubulwele bwa musango uyu tabwaseeka sana kabili bubi icine cine.

Nangu batendeke ukumupeela imiti apo pene fye, mu nshiku fye shinono ubulwele bwatendeke ukonaula icinso cakwe. Ilyo badokota bacincintile ubu bulwele, umona, imilomo, akalefulefu ne fiponshi fya kwa Mailyn fimo fyali mupepi fye no konaika fyonse. Lubali lwe linso limo kwali utupunda.

Ilyo ine na balume bandi twamumwene, twalililile. Ica musango uyu cinshi cingacitikila ku mwana wesu umunono ifi? Mailyn ali mu cipatala mulya basungila abalwala sana pa nshiku shingi, kabili badokota batontonkenye kuti takapusuke. Abalume bandi batwalilile ukunjeba ati, “Uipekanye ku mfwa yakwe.” Lelo, ilyo naingisha ukuboko kwandi mulya babika utwana utushilakosa sana pa kuti njikate ukuboko kwa kwa Mailyn, aleikata kuboko kwandi no kukufyambata sana kabili ici canengele ukwishiba ukuti akapusuka. Naebele abalume bandi nati: “Umwana wesu takafwe. Lelo nga twamona ifyo ali, bushe ubumi bwakwe bukaba shani?” Lyonse nga twabuuka, twalemona kwati tulelota fye.

Ilyo twali ku cipatala, Maydelis umwana wesu uwaliko umukalamba umwanakashi, uwali ne myaka 6 pali iyo nshita, aleikala na bafyashi bandi. Alisakamikwe sana kabili alelolela nkashi nankwe ukubwela ku ng’anda. Alimwene uko Mailyn afumine pa ng’anda umwana munono umusuma na menso ayakulu aya makumbi makumbi (blue). Lelo umuku wakonkelepo ilyo Maydelis amwene umwaice wakwe Mailyn, alemoneke cimbi cimbi.

‘Cinshi umwana Wandi Aleculila Ifi?’

Pa numa yakuba mu cipatala umweshi umo na hafu, Mailyn balimufumishe mu cipatala. Tatwabwelele ku ng’anda yesu iya mu musumba pantu tatwalefwaya umuntu nangu umo ukumona Mailyn. Twaikele fye fweka mu kayanda kanono ku mushi, mupepi na farmu ya bafyashi bandi.

Pa kutendeka, naletonesha utumuka twa mwi bele pa cipunda icali pa cinso cakwe apaali akanwa ilyo ashilalwala. Taleonka. Nomba ilyo ifilonda fyatendeke kupola, icipunda calicilike mupepi na conse. Ifyo nalemupeela fye fya kulya fyasongoloka mwi botolo. Ilyo ali no mwaka umo, twabwelele ku Holguín, uko badokota bamulepwile imiku 4 pa kuti bakushe icipunda.

Naleiipusha ne mwine ukuti: ‘Cinshi umwana wandi aleculila ifi?’ Naleya mung’anga pa kuti njishibe icalengele ifi kabili nalepepa naku fipasho fya ko nalepepa. Lelo tafyansansamwishe. Ifyebo fya kukalifya kuli ba lupwa bamo ne fibusa fyalimpelengenye sana. Bamo batile, “Lesa alishiba ico asuminishisha ifi fintu.” Bambi banjebele ukuti, “Cine cine kukandwa kuli Lesa.” Nalesakamana na pa fyo nali no kweba Mailyn nga akula. Umuku umo, ilyo Mailyn aali acili umunono, aipwishe bawishi ati: “Cinshi nshakwatila mona nge fyaba abantu bonse?” Bawishi bafililwe ukwasuka kabili baile pa nse ku kulila. Naeseshe ukumulondolwela icacitike. Acili alebukisha kuti nalelanda ukuti akashishi akanono ekalile umona wakwe na kanwa.

Icalengele Ukuti Mbe ne Citetekelo

Ilyo napumfyanishiwe sana, naibukishe ukuti umwina mupalamano wandi ali Nte ya kwa Yehova. Namwipwishe ukunangako mu Baibolo umulandu Lesa asuminishishe akamwana kandi akakashana ukucula muli ulya musango. Naipwishe no kuti: “Nga ca kuti ubu bulwele cine cine bwali kukandwa kuli Lesa pa fyo nacitile, cinshi Lesa akandilemo Mailyn?”

Umwina mupalamano wandi atendeke kusambilila Baibolo na ine, mu citabo ca Kuti Waikala Kuli Pe na pe muli Paradaise Pe Sonde.a Panono panono, natendeke ukumfwikisha ukuti Lesa te walenga Mailyn ukucula kabili Lesa alatusakamana icine cine. (Yakobo 1:13; 1 Petro 5:7) Natendeke ukutentemba isubilo lyawamisha ilya kuti Ubufumu bwa mu muulu ubo Yesu Kristu akateka, bukafumyapo ukucula. (Mateo 6:9, 10; Ukusokolola 21:3, 4) Ukwishiba ifi kwalinkoseshe kabili kwanengele naya na ku kulongana kwa Bwina Kristu ukwa Nte sha kwa Yehova. Pa kutendeka, abalume bandi tabatemenwe ifya ku mupashi. Lelo tabalendesha ukusambilila Baibolo cikulu fye ifyo ndesambilila fyangafwa ukushipikisha ubwafya twali nabo.

Ubwafwilisho Ukufuma Ukutali

Ilyo Mailyn ali ne myaka ibili, dokota uwaishibikwa sana kabili uwacindikwa uwaishiba ifya plastic surgery uwa ku Mexico, aumfwile pa kulwala kwa kwa Mailyn ne fyo icinso cakwe cali kabili ali-ipeleshe ukumuundapa ukwabula ukulipila. Umuku babalilepo ukumulepula ni mu 1994. Mailyn na ine twaikele mu Mexico mupepi no mwaka umo. Ilyo twaile fye tatwamweneko Inte sha kwa Yehova, e ico tatwaleya ku kulongana kwa Bwina Kristu. Ifi fine e fyanashishe lwa ku mupashi. Lyene pa numa, Nte ya kwa Yehova umo uwaleikala mu cifulo twaleikala alitutandalile, kabili twatendeke ukulongana na basumina banensu na kabili twalelongana pa nshita yonse nga twakumanisha. Ilyo twabwelelemo ku Cuba, natendeke ukusambilila Baibolo na kabili ukusambilila kwine e kwanengele ukupuputuka ku mupashi.

Ukufika na pali iyi nshita abalume bandi tabaleefwaya ukusambilila Baibolo. Mu kweshaesha ukubalenga ukusambilila, natendeke ukubepusha nati balembelengela amalyashi yamo yamo aya mu mpapulo sha Baibolo pa kuti ndeumfwikisha. Tapakokwele batendeke ukusambilila Baibolo, ico balisakamene ukuti inyendo shalepa isha ku Mexico kuti shaonaula ifyo twikala pa ng’anda. Batontonkenye kuti ukwikatana ku mupashi kuti kwatwafwa ukushipikisha bwino iyi nshita tushali pamo. Ukwikatana ku mupashi cine cine kwalitwafwile. Mu 1997, abalume bandi, umwana wesu umwanakashi umukalamba, na ine twalibatishiwa no kuba Nte sha kwa Yehova.

Mu nshiku shinono isho twaikele mu Mexico, Mailyn alelanda ati, nga ca kuti akashishi takalile cinso cakwe, nga tatwali ukwapusanapusana na bawishi no mukalamba wakwe umukashana. Cali ca bulanda ukupatukana naba pa ng’anda pa nshita yalepe fyo. Lelo ndeibukisha inshita imo ilyo twatandele kwi ofesi lya musambo ilya Nte sha kwa Yehova mu Mexico, ilitwa Bethel, nalikoseleshiwe icine cine. Lyonse ilyo twali kulya Mailyn alelanda ati talefwaya kulepulwa na kabili umuku walenga 5—pantu ifilonda pa kupola fyalekalipa sana. Lelo baNte bamo abalebombela pe ofesi lya musambo bamwebele ati nga ashipa no kusuminisha badokota ukumulepula, bakamupangila umutebeto ilyo akafuma mu cipatala. E ico alisumine ukumulepula.

Lekeni Mailyn alondolole ifyo ayumfwile: “Nalitemenwe pa kumfwo kuti bakampangila umutebeto pa Bethel. Kanshi e calengele kushipa lintu balendepula. Umutebeto waliweme sana, kwali bamunyinefwe na bankashi ba ku mupashi abengi. Bampeele amakardi ayengi, ayo ncili nayo na nomba. Ifyo bankoseleshe fyanengele ukushipikisha ukulepulwa kwakonkelepo.”

Ukulunduluka ne Fyamwafwile Ukushipikisha

Mailyn, uuli nomba ne myaka 11, bamulepula imiku 20 pa kuti bawamye cinso cakwe. Nangu ca kuti balimwafwa sana, na lyo line calyafya ukwasamuna akanwa konse. Kwena, lyonse aleshipa kabili ali ne citetekelo. Alitemwa sana ne fya ku mupashi. Ukutula ilyo ali ne myaka 6, alilembesha mwi Isukulu lya Butumikishi Ilya Bulesa pa cilonganino cesu, kabili abatishiwe pa April 27, 2003. Pa nshita imo alitungululako amasambililo ya Baibolo yatatu pa muku umo. Ilyo twali mu Mexico, pa nshita imo Mailyn alandile ku mwaume uwasumine ukumusambilisha Baibolo. Amwebele ukusangwa ku Cibukisho ca mfwa ya kwa Kristu na ku kulongana kumbi ukwa cilonganino, kabili alitemenwe pa kusangwako.

Ilyo Mailyn aleshimikila ku ng’anda ne ng’anda, abantu bamo balalolesha pa menso no kumwipusha nga apile no mulilo. Alashukila iyi nshita ukubeba isubilo lya Baibolo ilya kuti muli Paradaise ileisa Yehova akamupeela icinso icipya.—Luka 23:43.

Ukukalipwa uko Mailyn apitamo pa mulandu wa kulepulwa e lyo no kupumiwa ku bana bambi teti kulondololwe. Icamwafwa ukushipikisha cinshi? Mailyn ayasuka uwabula no kutwishika ati: “Yehova wa cine cine kuli ine. Alampeela amaka no bukose pa kuti nshipikishe. Nshilefwaya ukulepulwa kabili pantu badokota te kuti bamposhe nomba. Te kuti bamposhe pa kuti mbe nge fyo nali ilyo nafyelwe. Lelo ninjishiba kuti Yehova akampeela icinso icipya mwi sonde lipya, kabili nkayemba na kabili.”

[Futunoti]

[Amashiwi pe bula 28]

“Jehova akampeela icinso icipya mwi sonde lipya”

[Amashiwi pe bula 27]

Panono panono, natendeke ukumfwkisha ukuti Lesa te walenga Mailyn ukucula