Ifyo Mwingasunga Incito
“Bushe wamono muntu uwakampuka mu mulimo wakwe? Ku cinso ca shamfumu e ko akeminina.”—Amapinda 22:29.
NGE fyo calembwa pali ili lembo lya mu Baibolo, ababomfi ababomba bwino incito e bakabilwa nga nshi. Bushe finshi abengisha incito bafwaya sana mu babomfi babo? George umukalamba mu kampani kakwata abantu 700 aebele uulemba Loleni! ukuti: “Ababomfi abalanshanya bwino na bambi kabili ababombela pamo na bambi, e bo tufwaya sana.” Mu Baibolo mwaba amano yasuma ayengamwafwa ukulabomba bwino, pa kuti mwasunga incito yenu. Moneni fimo fimo ifingamwafwa.
Mulelanshanya Bwino
Yakobo uwalembeleko Baibolo alangilila ukuti ukulanshanya bwino na bantu kutendeka ilyo umuntu talatendeka no kulanda. Yakobo alembele ukuti umuntu afwile aba “uwayanguka ukuumfwa, uukokola ukulanda.” (Yakobo 1:19) Cinshi ici cawamina? Solomone alembele ukuti: “Uwasuke cebo ilyo talaumfwa, bupumbu kuli wene kabili ni nsoni.” (Amapinda 18:13) E ico kanshi, ukukutikisha ku bamwingisha incito na ku babomfi banenu kuti kwalenga mwalaumfwana kabili kuti kwamwafwa ukukanalufyanya na pashilingile.
Ilyo mulelanda, imilandile yenu na yo yalicindama. Nga mulelanda ifileumfwika bwino bwino, abantu kuti baishiba ifyo mulelanda, kabili bakapoosako sana amano ku fyo mulesosa. Brian, impandamano ilanda pa ncito, ulya tulandilepo mu cipande cifumineko, atile: “Kwaba abantu abengi nga nshi abatamfiwa pa ncito pa mulandu wa kukanalanshanya bwino na bantu bambi nangu ca kutila incito yena balishiba fye bwino.”
Muleumfwana na Bambi pa Ncito
Apo mulaba na babomfi banenu inshita ikalamba, kwena mukabeshiba sana. Kabili, kuti mwatunkwa ukulabaamba, no kulalanda sana pa filubo bacita. Lelo Baibolo ifunda ukuti, mufwile mwaba “no buyo bwa kwikala tondolo no kwangwa fye ifyenu.” (1 Abena Tesalonika 4:11) Nga mulecite co, abanenu tabakaleti muli ‘ba mulomo.’ (1 Petro 4:15) Kabili, te kuti muleonaula inshita, kabili tamwakulapusana na babomfi banenu na pashilingile.
Nga bamupeela incito ya kubomba, muleibukisha ukufunda kusuma ukwa kwa Yesu ukwa kuti: “Uwa mu bulashi nga akweba ukumushindika umulundu umo, mushindike milundu ibili.” (Mateo 5:41) Yesu alelanda pa balashi babomba mu buteko, lelo kwena na pa ncito pene uku kufunda kuti kwabomba. Nga ca kutila abantu bamwishiba ukuti mulabombesha ukucila ne fyo abakalamba ba cinto bengenekela, ninshi kuti mwasunga incito. Kwena, te kutila mufwile ukucita fyonse ifyo abamwingishe ncito bamweba ukucita. Yesu atile umuntu afwile ukupeela “ifya kwa Kaisare kuli Kaisare, ne fya kwa Lesa kuli Lesa.” (Mateo 22:21) Ico Yesu alelandapo ca kuti abalashi tabafwile ukusuminishiwa ukucilinganya umubomfi ku kucite fyacindama sana, pamo nga ukupepa Lesa.
Beni Abafumacumi
Mu kufwailisha kumo ukwacitilwe pa twampani 1,400, casangilwe ukuti “icikalamba ico abene ba ncito abengi bafwaya mu babomfi bufumacumi ne cishinka.” Cintu cayeba fye ukuti, umufumacumi te kuti ebe indalama nelyo ifisolobelo fya ba mwingisha incito. Kabili te kuti ebe ne nshita. Ukufwailisha kwacitilwe na bafwailako bambi incito kwalangile ukuti nga kwakanya inshita ababomfi beba pa ncito, ninshi cila mubomfi aleba amaawala 4 na baminiti 15 cila mulungu. Inshila imbi aba bapuupu baleibilamo inshita, kucelwa lyonse ku ncito, ukwinuka bwangu, no kulalanda fye ilyashi pa ncito.
Baibolo ifunda ukuti: “Uwibile eiba kabili, lelo abombeshe, ukubomba umulimo usuma ku minwe yakwe.” (Abena Efese 4:28) Kabili Icebo ca kwa Lesa cikoselesha Abena Kristu ukubombesha, na lintu abalashi ba ncito bashilebamona. Umutumwa Paulo alembele ukuti: “Mube ne cumfwila kuli bashikulwinwe ba buntunse muli fyonse, te kubombela ukumonwa, nga bateemuna abantu, lelo ku kufumaluka umutima, no kutiina Yehova.” (Abena Kolose 3:22) Nga mwaishibikwa ukuti mulabomba bwino, nangu tapali kapitao, ninshi kuti mwacetekelwa pa ncito.
Ifintu Kuti Fyayaluka
Baibolo tayabepele ilyo yasobele ukuti ino nshita ikaba iyaafya icine cine. (2 Timote 3:1) E ico ifimfulunganya fibako filenga kwaba ubucushi mu calo. (Mateo 24:3-8) Kanshi nangu mwakonka ifi tulandile, limbi incito kuti yapwa.
Lelo, nga mulekonka ifipope fya mu Baibolo kuti mwacefyanyako amasakamika yesa pa mulandu wa kubulwa incito. Yesu atile: “Nomba nga e fyo Lesa afwika ifimenwa fya mu mpanga, ifibapo leelo kabili mailo fyapooswa mwi buku, bushe takacilepo ukufwika imwe, mwe ba citetekelo cinono? E co mwisakamikwa amuti, ‘Tulelya nshi?’ nelyo, ‘Tulenwa nshi?’ nelyo, ‘Tulefwala nshi?’ . . . Pantu Shinwe wa mu muulu alishiba ukuti mulakabila ifi fyonse.”—Mateo 6:30-32.
Ericka ulya tulandilepo kale, na bantu bambi abengi nga nshi, balishiba ukuti aya mashiwi yalembwa pali ili lembo ya cine. Umfweni ifyo alanda mu mashiwi ayanono, atila: “Nalitemwa sana incito momba ino nshita. Lelo nalishiba ukuti ifintu kuti fyayaluka. Na lyo line, ukukonka ifishinte fya mafunde aya mu Baibolo no kutetekela Yehova, kwalenga nacefyanyako ukusakamana ilyo naba pa bulofwa kabili nalishiba ne fyo ningacita pa kuti incito fye yonse iyo naingila njitemwe.”
[Icikope pe bula 10]
Nga tamulekutika ilyo mulelanshanya ku ncito, kuti bamufumya incito