Ukulingana na Baibolo

Bushe Mufwile Ukutiina Armagedone?

BUSHE “Armagedone” cinshi? Nga kwangusha, kuti twatila fye ni lintu mu mampalanya bakateka ba calo bakalonganikwa ku kulwisha Lesa no Bufumu bwakwe ubo apeela Yesu Kristu. Mwi buuku lya mu Baibolo ilya Ukusokolola, umutumwa Yohane amwene icimonwa ca bakateka ninshi nabalongana pa cifulo ca mampalanya icitwa Armagedone ku kulwisha Lesa.

Ishiwi ilya kuti “Armagedone” lisangwa fye umuku umo mu Malembo, lelo mu ndimi ishingi pali lelo, lilabomfiwa sana mu nsoselo shabo. Lyalibomfiwa ku kulanda pa tuyofi utukalamba no tunono, pamo nga ubonaushi bwa calo conse ku mabomba nelyo ukufuuta ifyebo fyonse ifyabikwa mu makompyuta yonse. Ifitabo ifingi ifyo abantu batemwa sana ukushita, filanda pa mpela ya calo, nelyo pa fikalacitika ilyo fye Armagedone tailaisa. Ifitabo ukucila pali 60 milioni ifilundulula ilyashi limo line nge li fyalishitishiwe mu myaka 10 iyapita.

Abantu bamo balatiina Armagedone. Batontonkanya ukuti utupondo, ifyalo fishitiina inkondo, nelyo amasanso yakalamba ayafuma ku fyabumbwa e fikalenga kukabe ubonaushi bwa calo conse ubukonaula fyonse ifyaba pe sonde. Bambi na bo batila Lesa umwine akonaula cipyu cipyu lino isonde na fyonse ifyabamo pa nshita umwine aishiba. Ala ubulondoloshi bwa musango yu pa fikesacitika bulatiinya! Lelo bushe ubulondoloshi bwa cine pa “nkondo ya bushiku bukalamba bwa kwa Lesa Uwa maka yonse” pa cifulo citwa Armagedone, bulondoloshi nshi?—Ukusokolola 16:14, 16.

Bushe Isonde Likonaulwa?

Te bantu bonse abakonaulwa pa Armagedone. Twaishiba shani? Baibolo yatulaya ukuti “Yehova alishiba ukupokolola abaipeelesha kuli bukapepa ku ca kwesha, no kusunga abashalungama ku kuputulwa pa bushiku bwa bupingushi.” (2 Petro 2:9) E ico kanshi, kuti twacetekela ukuti Lesa takabomfye amaka yakwe ayapulamo bubi bubi. Abakakandwa fye pa Armagedone, bantu basuula ukuteka kwa kwa Lesa epela. Takwakabe abakepaiwa mu kukanaishiba.—Amalumbo 2:2, 9; Ukutendeka 18:23, 25.

Baibolo itwebo kuti Lesa “akonaula abaleonaula isonde.” (Ukusokolola 11:18) E ico kanshi Yehova Lesa tafwaya ukonaula isonde lyesu. Lelo akafumyamo fye ababifi abashatemwa bukateka bwakwe. Akacita nga filya acitile pa Lyeshi lyaliko mu nshiku sha kwa Noa.—Ukutendeka 6:11-14; 7:1; Mateo 24:37-39.

“Ubushiku bwa Kutiinya”

Kwena ca cine ukuti ifingi ifisobela ubu bonaushi ifyalembwa mu Baibolo filatiinya. Ku ca kumwenako kasesema Yoele alandile ulwa “bushiku bwa kwa Yehova, ubukulu kabili ubwa kutiinya.” (Yoele 2:31) Pa fyo Lesa engabomfya mu bulwi, paba ne mfula yabuuta, imfula ya mabwe, ifinkukuma, amalwele yambukila, ilyeshi, umulilo wa mingu ukufuma ku muulu, icimfulunganya, inkuba, kabili kuti alenga ne mibili ya bantu ukubola.a (Yobo 38:22, 23; Esekiele 38:14-23; Habakuki 3:10, 11; Sekaria 14:12, 13) Kabili Baibolo yalilondolola ne fyo cikaba ilyo ifitumbi fya bakafwa fikakupa isonde lyonse, ku kubo mufundo ku mushili, nelyo ifya kulya fya fyuni ne nama shimbi. (Yeremia 25:33, 34; Esekiele 39:17-20) Ilyo inkondo ikalacitika abalwani ba kwa Lesa bakaba no mwenso icine cine.—Ukusokolola 6:16, 17.

Bushe ici cilolele mu kuti bakapepa ba cumfwila abapepa Lesa wa cine bakatiina pa fya kupapusha ifikacitika pa Armagedone? Iyo, pantu ababomfi ba kwa Lesa pe sonde tabakalweko iyi nkondo. Kabili bakacingililwa na Yehova. Lelo, kwena bakapepa ba cine bakasunguka pa fyo Lesa akabomfya amaka yakwe.—Amalumbo 37:34; Amapinda 3:25, 26.

Umutumwa Yohane apuutilwemo ukulemba ukuti: “Wa nsansa uubelenga, na bomfwa ifyebo fya uku kusesema” kumo ne fyebo fya kusoka ifilanda pali Armagedone. (Ukusokolola 1:3; 22:7) Bushe kanshi umuntu nga atontonkanya sana pali Armagedone kuti aba ne nsansa mwa? Kuti aba shani ne nsansa?

Kusoka kwa kwa Lesa

Nga kwalaba icimwela ca maka, abalashi ba buteko balasoka abekala calo pa kuti baicingilile. Pa kuti umuntu fye onse eshibe icalacitika, bakapokola kuti batumwa mu mayanda ya bantu ku kubasoka. Ico bacitile fi, te kufwaya ukutiinya abantu, lelo kufwaya ukubafwilisha pa kuti baicingilile. Abantu ba mano balatemwa pa kubasoka, kabili nga baumfwila cilabawamina.

Cimo cine no kusoka kwa kwa Lesa pa bushiku bwa Armagedone ubo twingapashanya ku cikuuku ca mwela. (Amapinda 10:25) Yehova alilanda fyonse mu Cebo cakwe pa fikacitika pa nkondo yakwe. Ico alandile fi fyebo, te kufwaya ukutiinya abantu iyo, lelo ni pa kuti asokele libela bantu bonse, balapile no kutendeka ukulamubombela. (Sefania 2:2, 3; 2 Petro 3:9) Abomfwila ukusoka bakapaalwa pantu bakapusuka. E ico tatufwile ukutiina inkondo ya kwa Lesa iileisa ku ntanshi. Lelo tufwile ukucetekela ukuti “onse uwalilila kwi shina lya kwa Yehova akapusuka.”—Yoele 2:32.

[Futunoti]

[Icikope pe bula 30]

Nga kuleisa icimwela ca maka, abalashi ba buteko balasoka abekala calo pa kuti baicingilile

[Icikope on pe bula 31]

Ukusoka kwa kwa Lesa pali Armagedone kwa kwafwa abantu ukuicingilila