Ukulingana na Baibolo

Bushe Mufwile Ukupepa kuli Maria Virigine?

MARIA muntu uwaishibikwa sana ku bantu abengi abaishibako fimo pa Bwina Kristu. Amalembo yalanda ukuti Lesa Wa maka yonse alipaalile uyu mukashana pa kumusala ukuba nyina kwa Yesu. Ukufyalwa kwa kwa Yesu kwali ukwaibela pantu Maria ali nacisunga lintu aimite. Amacalici yamo aya batila bena Kristu balapepa Maria mu nshila imo iyaibela. Mu 431 C.E., icilye caleitwa ati, Council of Ephesus catile Maria ni “Nyina wa kwa Lesa,” na muno nshiku abantu basambilishiwa ukulapepa Maria.a

Abapepa Lesa mu bufumacumi balishiba uo bafwile ukulungatikako amapepo yabo. Cinshi Baibolo yalanda pali uyu mulandu? Bushe Abena Kristu bafwile ukupepa kuli Maria Virigine?

“Tusambilisheni Ukupepa”

Ilandwe lya kwa Luka litila umusambi wa kwa Yesu umo amulombele ukuti: “Mwe Shikulu, tusambilisheni ukupepa.” Yesu atendeke ukwasuka umusambi na mashiwi ya kutila: “Lyonse ilyo mulepepa, muletila, ‘Mwe Shifwe, ishina lyenu lishishiwe.’” Ne lyo alelanda Ilyashi lyakwe pa Lupili, Yesu afundile abasambi bakwe ukupepa ukuti: “Shifwe wa mu muulu, ishina lyenu lishishiwe.”—Luka 11:1, 2; Mateo 6:9.

Ica kubalilapo twasambilila kanshi ca kuti, amapepo yesu yafwile ukulungatikwa kuli Wishi wa kwa Yesu, Yehova. Mu Baibolo tapaba apo batweba ukuti tufwile ukupepa ku muntu umbi. E fyo cifwile ukuba pantu ilyo Mose alepokelela Amafunde Ikumi, bamwebele ukuti Yehova ni “Lesa uufwaya ukupepwa fye eka.”—Ukufuma 20:5, NW.

Bushe Tufwile Ukubomfya Kolona pa Kupepa?

Abengi abapepa kuli Maria basambilishiwa ukutila kuti basenaminwa nga balepepa amapepo ya kubwekeshabwekeshapo ayaba mu fipande fyatantikwa. Na yo mapepo ni, Nakucelela Maria, We Shifwe, e lyo na mapepo yambi. Icitabo citila, Symbols of Catholicism (Ifipasho fya baKatolika) citila “icikalamba icibomfiwa kuli baKatolika pa kupepa Maria ni kolona.” Kolona mapepo bacindikilako Maria Virigine. Kabili, kolona imo ine ni nseke bafwala mu mukoshi ngo bulungu isho bapendelako amapepo. Icitabo cimo cine catila, “kwaba inseke 50 ishayakanishiwa mu fipande fisano. Cila cipande cakwate nseke 10. Pa mpela ya cipande cimo na cimo paba uluseke lumo ulwaibela. Shilya nseke 50 e miku ya kupepa ipepo lya ‘Nakucelela Maria.’ Inseke shisano ishilekanya ifipande e miku ya kupepa ipepo lya ‘We Shifwe.’ E lyo shimbi shisano, miku isano iya kupepa ipepo lya ‘Amalumbo kuli Tata.’” Bushe Lesa alakutika ku mapepo ya kusungila ku mutwe umo babomfya kolona pa kupepa?

Na kabili kuti twasanga icasuko ca cine nga twamona ifyo Yesu afundile abasambi bakwe pa kupepa. Atile: “Lelo ilyo ulepepa, wilabwekeshapo ukusosa fimo fine, nge ficita abena fyalo, pantu bamona kwati kuti babomfwa nga basosa ifyebo ifingi.” (Mateo 6:7) Kanshi ico Yesu aebele abasambi bakwe ca kuti tabafwile ukupepa amapepo yamo yene ayo basungile ku mutwe.

Abantu bamo kuti batila, ‘bushe Yesu te waebele abasambi bakwe ukuti balebwekeshapo ipepo lya We Shifwe ilyaba pa mapepo ya pali kolona?’ Ico tufwile ukwishiba ca kutila ico Yesu asambilishe cali lipepo lya kutulangilila fye ifya kupepa ilyaishibikwa ukuti ipepo lya We Shifwe, nelyo Ipepo lya kwa Shikulu. Na lyo line ico tufwile ukwibukisha ca kuti, Yesu alandile aya mashiwi ya kutila We Shifwe pa numa fye ya kusoka ati, “wilabwekeshapo ukusosa fimo fine.” Kuti twamona na kabili ukuti Yesu talefwaya tulebwekeshapo ipepo lya cilangililo pantu pa miku ibili iyalembwa mu Baibolo iyo asambilisha abasambi bakwe ifya kupepa, talandile amashiwi yamo yene. (Mateo 6:9-15; Luka 11:2-4) Ifyo Yesu alandile pa nshita isho ishalekanalekana fyali fimo fine, lelo amashiwi abomfeshe yalipusene. Kanshi kuti twasondwelela ukuti ico Yesu apeele cali fye cilangililo ca fyo abasambi bakwe bengapepa ne fintu ifyalinga ukupepela. Ne cacilapo ukucindama, amashiwi ya kwa Yesu yalelanga uo tufwile ukulungatikako amapepo.

Ukucindika Maria

Nangu ca kutila Amalembo tayasambilisha Abena Kristu ukupepa kuli Maria, tacipilibula ukuti tatumucindika pa mulimo abombele mu kufikilisha imifwaile ya kwa Lesa. Amapaalo yesa ukupitila mu mwana wakwe yakaleta ubusuma ku bantunse abacumfwila. Maria umwine atile, “Inkulo shonse shikatila ndi wa nsansa.” Nangu fye ni lupwa lwakwe Elisabete atile Maria “alipaalwa mu banakashi.” Cine cine alipaalilwe. Cali lipaalo likalamba kuli Maria ukusalwa ukuba nyina wa kwa Mesia.—Luka 1:42, 48, 49.

Nomba, Maria te walumbulwa fye eka mu Malembo ukuti alipaalwa. Yaele na o bamulumbula ukutila ali “uwapaalwa mu banakashi” pantu imilimo abombele yalengele uluko lwa bena Israele ukunonkelamo. (Abapingushi 5:24) Ca cine tufwile ukukonka ica kumwenako ca aba banakashi ba busumino pamo nga Yaele, Maria na banakashi bambi abaipeeleshe muli bukapepa abalumbulwa mu Baibolo, lelo tatufwile ukubapepa.

Maria ali musambi wa cishinka uwa kwa Yesu. Ilingi line aleba pamo na Yesu lintu aleshimikila na lintu fye Yesu alefwa epo ali. Ilyo Yesu abuukile, Maria ‘ali uwa mukoosha mu kupepa’ pamo na bamunyina kwa Yesu. Ici catulangilila umulandu twingasuminina ukuti Maria ukubikapo na bambi abalongene pa Pentekoste mu 33 C.E. balisubilwe no mupashi wa mushilo kabili bakwete isubilo lya kuba banabwinga abakateka pamo na Kristu mu muulu.—Mateo 19:28; Imilimo 1:14; 2:1-4; Ukusokolola 21:2, 9.

Na lyo line, ifi fyonse twalandapo pali Maria tafitupeele nsambu ya kumupepa. Ipepo lya kufuma pa nshi ya mutima lubali lwacindama mu kupepa, kabili Abena Kristu bakoseleshiwa ukuba “no mute wa kupepa.” (Rom. 12:12) Lelo ukupepa konse kufwile fye ukulungatikwa kuli Yehova epela, ukupitila muli Yesu Kristu.—Mateo 4:10; 1 Timote 2:5.

[Futunoti]