Ifya Kwishiba Ukupepa Kwa Cine

Bamo bepusha ukuti, ‘nga ca kuti icine ukufuma kuli Lesa e ko caba, mulandu nshi te kuti ncisangile bwangu bwangu? Nga ca kuti Lesa alikwata ifyebo ifyacindama ifyo afwaya ukuti abantu bonse beshibe, mulandu nshi te kuti afilandile mu nshila iyaumfwika bwino sana pa kuti abantu belacula ukufisanga?’

CA CINE Lesa alikwata maka ya kucite fyo. Lelo, iyo te nshila intu asala iya kupeelelamo icine ku bantu.

Ifyo Lesa Atupeela Icine

Lesa apeela ubukombe bwakwe mu nshila iilenga abafumacumi abalefwaya icine ukucisanga. (Amalumbo 14:2) Ku ca kumwenako, natulande pa bukombe ubo Lesa apeele abantu bakwe ukupitila muli kasesema Yeremia kale sana. Lesa apeele ubu bukombe ku bantu bakwe, abamupondokele, pa fyo Yerusalemu ali no konaulwa ku bena Babiloni.—Yeremia 25:8-11; 52:12-14.

Pa nshita Lesa alepeela ubu bukombe, kwali na bambi bakasesema abaleitunga ukuti balelanda ubukombe ubwafuma kuli Lesa. Hanania aseseme ukuti mukaba umutende mu Yerusalemu. Ifyo aseseme, fyalipusene no bukombe ubo Yeremia aleeba abantu. Kanshi ni nani uo abantu pali ilya nshita bali no kucetekela, Yeremia nelyo abalemulengulula?—Yeremia 23:16, 17; 28:1, 2, 10-17.

Pa kuti beshibe uwalesesema ifya cine, abaYuda abafumacumi balekabila ukwishiba Yehova. Balekabila ukwishiba amafunde yakwe ne fishinte, ne fyo Lesa amona abatoba amafunde yakwe. AbaYuda abacite fyo, nga balisumine amashiwi ya kwa Lesa ayo alandile ukupitila muli Yeremia ayatila, ‘tapali umuntu uwalelanguluka pa bubi ubo alecita.’ (Yeremia 8:5-7) Na kabili, bali no kwiluka ukuti ifisuma tafyali no kucitika pali Yerusalemu e lyo na bekashi baleikalamo.—Amalango 28:15-68; Yeremia 52:4-14.

Ifyo Yeremia aseseme pali Yerusalemu fyalicitike. Abena Babiloni baonawile umusumba mu 607 B.C.E.

Nangu ca kuti amafya ayali no kwisa pa baYuda pa mulandu wa bucintomfwa bwabo yalisobelwe kale, balekabila ukukosapo ukwishiba ukuti inshita ya kwa Lesa iyakuleta ubonaushi yalifikile.

Finshi Twingalandapo pa Cine Yesu Asambilishe?

Bushe ifyo Yesu Kristu asambilishe fyali cine? Bushe abantu bonse balimwene ukuti fyafumine kuli Lesa? Awe. Nangu ca kuti Yesu ali mu kati ka bena Israele ilyo alesambilisha no kucita ifipesha amano, abengi abalekutika tabailwike ukuti Yesu ali e Mesia uwasobelwe nelyo Kristu nelyo Uwasubwa.

Ilyo abaFarise bamwipushe ilyo Ubufumu bwa kwa Lesa bwali no kwisa, Yesu abaswike ukuti: “Ubufumu bwa kwa Lesa tabwakese ne fya kubumwenako ifya kucebusha.” Kabili alundilepo ukuti: “Ubufumu bwa kwa Lesa buli mu kati ka imwe.” (Luka 17:20, 21) Yesu Imfumu iyo Lesa asalile, yali mu kati kabo! Lelo balya abaFarise balikene ukusumina ukuti Yesu alefikilisha amasesemo ayalelanda pali wena nga Mesia. Kabili tabamupokelele nga “Kristu, Umwana wa kwa Lesa wa mweo.”—Mateo 16:16.

Ilyo Abena Kristu aba mu mwanda wa mwaka uwa kubalilapo baleshimikila abantu balikene ukusumina icine, nga filya fine cali mu nshiku sha kwa Kristu. Nangu ca kutila ifipesha amano fyalelanga ukuti Lesa ali na basambi, na lyo line ku bengi icine tacaishibikwe bwino bwino. (Imilimo 8:1-8; 9:32-41) Yesu aebele abasambi bakwe ukuya balesambilisha abantu ‘ukubalenga abasambi.’ Pa mulandu wa kuti abafumacumi abalefwaya ukusambilila icine balekutika ku cebo ca kwa Lesa no kucisambilila, calengele babe Abena Kristu.—Mateo 28:19; Imilimo 5:42; 17:2-4, 32-34.

Na lelo line e fyo caba, ‘imbila nsuma iya bufumu ileshimikilwa pano isonde ponse ku kuba ubunte ku nko shonse.’ (Mateo 24:14) Uyu mulimo taulebombwa “ne fya kubumwenako ifya kucebusha,” e kutila taulebombwa mu nshila ya kuti abantu bonse pa calo baishiba ukuti ubu bukombe bwafuma kuli Lesa. Lelo, kuti twaishiba icine ca kwa Lesa kabili ici cilalenga abantu aba mitima ya bufumacumi abalefwaya ukupepa Lesa mu nshila iyo asuminisha ukumwishiba.—Yohane 10:4, 27.

Apo mulebelenga ino magazini iilanda pali Baibolo, cilelanga fye ukuti na imwe mulefwaya ukwishiba icine. Bushe kuti mwaishiba shani ukuti ici icilonganino ca mapepo e cisambilisha icine?

Inshila Iisuma Iya Kwishibilamo Ukupepa kwa Cine

Umutumwa Paulo alitashishe abekashi ba mu Berea abaliko mu nshita sha batumwa pa fyo bacitile ilyo abasambilishe cine. Tabasumine apo pene ifyo Paulo alebasambilisha nge cine, lelo balebikako amano ku kukutika ku fyo alelanda. Kuti twasambililako ku fyo abena Berea bacitile pa numa yakumfwa ubukombe.

Moneni ifyo Baibolo ilondolola: “Awe aba [abena Berea] bali ne mitima iikankaala ukucila balya aba mu Tesalonika, pantu bena bapokelele icebo ne mitima iyaswatuka, balebebeta Amalembo cila bushiku beshibe ifi fintu nge fyo fyali. E ico abengi pali bene balisumine.” (Imilimo 17:10-12) Kanshi balipooseleko sana amano ku kufwaya icine. Tabali no kusondwelela ukuti ici e cine pa kusambilila fye umuku umo nelyo ibili na Paulo.

Na cimbi ico abena Berea bacitile ‘kupokelela icebo ne mitima iyaswatuka.’ Aya amashiwi yaletulanga fye umutima bali na o pa kusambilila Amalembo. Tabalesumina fye ifili fyonse ifyo Paulo alandile, lelo baleipusha pa kuti beshibe ifyasuko. Na kabili tabalekaana fye fyonse ifyo alandile lelo baletala batontonkanyapo bwino bwino. Tabalelengulula ifyo Paulo alelanda uwaleimininako Lesa.

Na kabili uyu wali e muku wa kubalilapo ku bena Berea ukumfwa amasambilisho ya Bwina Kristu. Yaleumfwika ayasuma nga nshi, lelo ayakosa ukusumina ukuti cine. Lelo mu nshita ya kuti bakaane amasambilisho ya bwina Kristu, balebebeta bwino bwino Amalembo beshibe ‘ifintu Paulo alelanda nga e fyo fyali.’ Na kabili bonse abali mu Berea na mu Tesalonika abalebebeta bwino bwino Amalembo baishileba abena Kristu. (Imilimo 17:4, 12) Tabalekele ukusambilila, lyena no kutontonkanya ukuti te kuti beshibe icine. Balisangile ukupepa kwa cine.

Ifyo Abantu Bacita nga Baishiba Icine

Umuntu nga aishiba icine kwati fintu cali ku bena Berea, alafwaisha ukwebako bambi. Bamo te kuti batemwe uyu muntu nga aleebako bambi icine, batontonkanya ukuti umuntu uucite fyo ninshi taicefya pantu imipepele yonse isuma. Lelo umuntu nga aishiba icine icaba mu Baibolo, tatwishika na kutwishika ukuti ici e cine. Tashala aletontonkanya ukuti talasaga icine kabili tatontonkanya ukuti imipepele yonse ikalenga umuntu ukupusuka. Pa kuti umuntu eshibe icine afwile ukubikako sana amano ku kusambilila Amalembo kabili pa kucite fyo afwile ukuicefya.

Inte sha kwa Yehova balisambilila sana Baibolo. E mulandu wine basuminina ukuti balisanga ukupepa kwa cine. Na kabili balemulomba ukuti musambilile Baibolo pa kuti mukaimwene mwe bene abapepa ifya cine. Nangu ca kuti kwaliba ifingi ifya kwishibilako ukupepa kwa cine, ifyebo ifilelanda pa Bena Kristu ba kubalilapo ifili mu mukululo pali lino line bula kuti fyamwafwa ukwishiba ukupepa kwa cine.

Nga mwasumina ukusambilila Baibolo ne Nte sha kwa Yehova mukeshiba bwino bwino ifyo isambilisha kabili tabakamulipilishe. Ukusambilila Baibolo kukamulenga ukwishiba ukupepa kwa cine.

[Akabokoshi pe bula 31]

Ifya Kwishibilako Ukupepa kwa Cine

Natumone ifyo Abena Kristu ba kubalilapo balecita ne fyo balesambilisha:

◼ Baletungululwa ne Cebo ca kwa Lesa.—2 Timote 3:16; 2 Petro 1:21.

◼ Balesambilisha ukuti Yesu Mwana wa kwa Lesa kabili alipusana na Wishi, tababa umo kabili alanakila Wishi.—1 Abena Korinti 11:3; 1 Petro 1:3.

◼ Balesambilisha ukuti abafwa bakabuuka ku nshita ya ku ntanshi.—Imilimo 24:15.

◼ Bonse balibeshibe ukuti balitemwanene.—Yohane 13:34, 35.

◼ Tabalepepa umo umo, lelo balelongana pamo kabili balikatene no kutungululwa na bakangalila ne bumba lya bakalamba abalecindika Yesu ngo Mutwe wa cilonganino.—Imilimo 14:21-23; 15:1-31; Abena Efese 1:22; 1 Timote 3:1-13.

◼ Balicincile mu kushimikila pa Ubufumu bwa kwa Lesa ukuti e bukawamye fintu.—Mateo 24:14; 28:19, 20; Imilimo 1:8.

[Icikope pe bula 29]

Apo kwali bambi abalesesema ifyapusene ku fyo Yeremia alesesema, bushe abantu bali no kwishiba shani ukuti Yeremia aali e kasesema wa cine?

[Ifikope pe bula 30, 31]

Abena Berea tabalekutika fye ifyo Paulo alelanda lelo balebebeta na Malembo pa kuti bashininkishe nga ca kuti alelanda icine

[Ifikope pe bula 30, 31]

Ukubikako amano pa kusambilila Baibolo kuti kwamwafwa ukwishiba ukupepa kwa cine