Finshi Fikacitika Inshiku sha Kulekelesha nga Shapita?
ABANTU bamo nga batontonkanya pa “nshiku sha kulekelesha” balomfwa umwenso. (2 Timote 3:1) Bena ifyo batontonkanyapo fye ni nshiku sha bucushi sheka sheka. Nomba mulandu nshi abantu abengi pa myanda ne myanda iya myaka bafwaila ukuti inshiku sha kulekelesha shikese? Ni pa mulandu wa kuti inshiku sha kulekelesha nga shapita kukesa ne fintu ifisuma.
Ica kumwenako fye, Sir Isaac Newton alisumine ukuti inshita ya mpela ikalenga kukabe inkulo iipya iya mutende no lubanda icalo fye conse, pantu Ubufumu bwa kwa Lesa e bukateka pa myaka ikana limo. Alandile ukuti ubusesemo bwa pali Mika 4:3, e lyo no bwa pali Esaya 2:4, bukafikilishiwa pali ilya nshita, aya malembo yatila: “Bakasuke abafule mpanga shabo shibe baplao, na mafumo yabo yabe ifya kutungwilako imiti; uluko talwakasumbwile ku luko lunankwe ulupanga, nangu kusambilila kabili ubulwi.”
Ilyo Yesu alandile pa nshita ya mpela, akoseleshe abakonshi bakwe ukuba ne citetekelo. Pa numa ya kubeba pa mafya yali no kwisa, na pa fyo abantu bali no kusakamikwa, e lyo no mwenso abantu baali no kukwata mu nshiku sha bucushi bukalamba, abebele no kuti: “Lelo ilyo ifi fintu fyatendeka ukucitika, inukeni, no kwinune mitwe, pantu ukulubuka kwenu nakupalama.” (Luka 21:28) Ukulubuka kuli finshi?
Ifyo Lesa Alaya
Inkondo, ukulwishanya kwa tubungwe twalekanalekana utwa bana calo, ulukaakala, ifimfulunganya, e lyo ne nsala, e fintu fye fimo ifinono pa fintu ifingi ificusha abantu muno nshiku kabili e filenga ukuti abantu amamilioni baleikala mu mwenso na mu munsokwe. Bushe pali ifi twalumbula paliba ifyamucitikilapo? Moneni ifyo Lesa alaya:
“Pashala panono, e lyo umubifi takabepo . . . abalanda bakapyaninine calo, no kuilemeno bwingi bwa mutende.”—Amalumbo 37:10, 11.
“Abantu bandi bakekala mu bwikalo bwa mutende, mu mekalo ya mutelelwe, mu fya kutushamo fya cibote.”—Esaya 32:18.
“[Yehova] aputulo bulwi ukufika ku mpela ya calo; ubuta abufuna, afuna ne fumo, amaceleta ayoca mu mulilo.”—Amalumbo 46:9.
“Bakekalo muntu onse mwi samba lya mwangashi wakwe, kabili mwi samba lya mukunyu wakwe, tapakabe na wa kututumya.”—Mika 4:4.
“Mube ukupaka kwa ngano mu calo, na pa muulu wa mpili.”—Amalumbo 72:16.
“Lelo uumfwa kuli ine akekalo mutelelwe, akekale cibote ukubulwo mwenso wa bubi.”—Amapinda 1:33.
Nangu fye nga ca kuti uko twikala imikalile yalibako bwino, bonse fye tulenekela ukulwala no kufwa. Mu calo cipya ica kwa Lesa tamwakabe imfwa no kulwala. Kanshi kuti twaenekela ukwisamona na kabili abantu besu abafwa kale. Moneni amashiwi yakonkapo:
“Umwikashi wa mu calo takasose, ati, Nindwala.”—Esaya 33:24.
“[Lesa] kabili akafuute filamba fyonse ku menso yabo, ne mfwa tayakabeko kabili iyo; nangu kuloosha nangu kukuuta nangu kukalipwa tafyakabeko kabili iyo. Ifya ntanshi nafiya.”—Ukusokolola 21:4.
“No mulwani wa kupelekesha ukonaulwa ni mfwa.”—1 Abena Korinti 15:26.
“Inshita ileisa ilyo bonse ababa mu nshiishi bakebukishiwa kabili bakomfwa ishiwi lya kwe [Yesu] no kufumamo.”—Yohane 5:28, 29.
Umutumwa Petro alisupawilile ilyashi bwino nga nshi ilyo alembele ukuti: “Lelo kuli imyulu ipya ne sonde lipya ifyo tulelolela umwabela ubulayo bwakwe, na muli fyene e mukekala ubulungami.” (2 Petro 3:13) Pa kuti kwingaba ubulungami kano kwaba ukufumyapo abantu bonse abengafulunganya umutende. E cimo cine na muno nshiku shesu kuti calinga ukufumyapo inko sha bantu abaleta ifimfulunganya no kwipaulula abantu pa kuti fye bengaisekesha abene no kunonka ifyo balefwaya. Ilyo Kristu akalateka mu Bufumu bwa kwa Lesa, ubu Ubufumu bukafumyapo bakateka bonse aba pano calo. Twalishininkisha ukuti ilyo Kristu akalateka: “Ku kukula kwa bukateka bwakwe, na ku mutende, takwakabe mpela, pa cipuna ca kwa Davidi, na pa bufumu bwakwe, ku kucipampamika no kucitungilila ku bupingushi kabili ku bulungami, ukutula pali nomba ukufika na ku muyayaya. Ukucincila kwa kwa Yehova wa milalo kukacite ci.”—Esaya 9:7.
Ifi e fyo mwingesaikala ku ntanshi, pantu Baibolo itweba ukuti ‘[Lesa] afwaya ukuti abantu ba misango yonse bakapusuke no kufika ku kwishiba bwino bwino icine.’ (1 Timote 2:4) Mwilawayawaya. Tampeni ukusambilila icine icikalenga ukuti mukakwate ubumi bwa muyayaya. (Yohane 17:3) Bangililenipo ukulembela abalemba ino magazini e lyo kabili mulingile ukubeba ukuti mulefwaya ukulasambilila Baibolo.
[Ifikope pe bula 24, 25]
Kuti mwaisaikala pe na pe mu mutende no bumi ubusuma muli Paradaise pano pene pa calo