Abacaice Bepusha Ukuti
Bushe Takwaba Ico Ningacita Bwino?
“Pali umunandi umo uo nalemona kwati alecita bwino ukuncila. Tapali ifyalemwafya kabili talemoneka kwati alabombesha! Naleyumfwa fye kwati tapali ifyo ningacita bwino. Limo ndailengulula sana.”—E fyalandile Annette.a
BUSHE ulafilwa ukucita fimo pa mulandu wa kuti tawaicetekela? Bushe inshita shimo abantu abo wacetekela, balalanda ifintu ifikulenga ukukanaicetekela? Bushe paliba fimo ifyo ushacitile bwino ifikufuupula ica kuti ulafilwa no kweshako ukucita fimbi? Nga e fyo cili, kuti wacita shani pa kuti wilamona kwati tapaba ifine fine ifyo wingacita?
Nacicindama sana ukuti wishibe icasuko kuli ici cipusho ca kulekeleshako pantu bonse tulalufyanya. (Abena Roma 3:23) Kanshi umuntu nga alufyanya talingile ukufuupulwa. Ici cilepilibula ukuti nga twalufyanya tatufwile ukuyumfwa sana ububi ica kuti twafilwa no kweshako na kabili. Abashifuupulwa ilingi line balasuka batendeka ukulacita bwino! Natumone nomba ifyo wingacita nga ca kuti, (1) ulefwaya ukucita fimo e lyo watendeka ukulatontonkanya ukuti walafilwa, (2) ilyo wacita fimo, walamona kwati taucitile bwino pantu uleilinganya kuli bambi, nelyo (3) walifuupulwa pa mulandu wa fyo wafilwapo ukucita.
UBWAFYA BWA KUBALILAPO → UKULATONTONKANYA UKUTI WALAFILWA Kuti wafilwa ukweshako kucita fimo pantu uletontonkanya fye ukuti te kuti ukumanishe ukuficita.
Ishiba ubwafya ukwete. Pa fili pe samba, congapo ✔ ico wingafwaisha ukucita—lelo ico ulemona kwati, te kuti ukumanishe ukucicita.
◯ Ukulanda na bo usambilila nabo pa Cebo ca kwa Lesa
◯ Ukufwaya incito
◯ Ukulanda ku bantu abengi
◯ Ukwangalako icangalo cimo
◯ Ukwimba nelyo ukulishako ifilimba
◯ Fimbi ․․․․․
Tontonkanyapo bwino bwino. Tontonkanya pa co ucongele ico ulefwaya ukucita, kabili mona ifyo amepusho yakonkelepo yengakwafwa ukwishiba ifingafumamo:
‘Finshi ifyo ningatemwa ukuti ficitike?’
․․․․․
‘Finshi ndetiina ukuti e fyalacitika?’
․․․․․
Nomba lemba ico ufwile ukucitila ico cintu, nangu ca kuti uletontonkanya ati walafilwa.
․․․․․
Uwalembwa mu Baibolo uo wingasambililako. Ilyo Yehova Lesa atumine Mose ukutungulula uluko lwa bena Israele, Mose abalilepo fye ukutontonkanya pa fingalubana. Aipwishe Lesa ukuti: “Tutile bonse bakaana ukukutika kwi shiwi lyandi?” Lyena atwalilile ukulatontonkanya pa bwafya akwete atile: “Ine nshilanda bwino, nshishibe ne fyo ningalanda.” Nangu fye ni lintu Yehova amwebele ukuti alamwafwa, Mose atwalilile fye ukupaapata Yehova ati: “Shi tumeniko umbi.” (Ukufuma 4:1, 10, 13, Baibolo ya Contemporary English Version) Mose asukile asumina ukucita ifyo Yehova amwebele, kabili twalishiba ne fyo Lesa amwafwile ukutungulula abena Israele pa myaka 40.
Ifyo wingacita. Imfumu Solomone yalembele ati: “Umulimo onse uo iminwe yobe yasanga ubombe na maka yobe yonse.” (Lukala Milandu 9:10) Kanshi mu nshita ya kulatiina ukuti walafilwa, ulingile fye ukubombesha. Tontonkanya pa fintu ifyo ushale-enekela ukucita bwino lelo ifyo wacitile bwino, finshi wingasambililako? Kuti fyakwafwa shani ukukanakwata umwenso?
Ifingawama ukucita: Kuti cawama waipusha abafyashi bobe nelyo abanobe bambi abengakwafwa pa kuti uleicetekela.b
UBWAFYA BWA BUBILI → UKULAMONA KWATI TAUCITILE BWINO Ukuilinganya ku muntu umbi uucita bwino ukukucila kuti kwakulenga walaimona kwati tapaba ifyo ucita bwino.
Ishiba ubwafya ukwete. Bushe uilinganya kuli nani kabili finshi acita bwino ifilenga iwe ukulaimona kwati tapaba ifyo ucita bwino?
․․․․․
Tontonkanyapo bwino bwino. Bushe uyo muntu nga acita bwino ukukucila ninshi cilepilibula ukuti iwe taucitile bwino? Lemba pe samba ifyacitike, ku ca kumwenako amashindano mwalembele pa sukulu ayo wacitile fye BWINO lelo umunobe alicitilepo bwino ukukucila.
․․․․․
Nomba lemba umulandu cingawamina ukweshako ukucita ico ucongele.
․․․․․
Uwalembwa mu Baibolo uo wingasambililako. Kaini ‘alikalipe’ ilyo amwene ukuti Yehova atemenwe ifyo Abele munyina acitile ukucila ifyo ena acitile. Yehova alisokele Kaini pa mulandu wa kalumwa akwete, kabili alimwebele no kuti na o nga alefwaya kuti acita icisuma. Amwebele ati: “Bushe na iwe nga wacita icisuma, te kuti utashiwe?”c—Ukutendeka 4:6, 7.
Ifyo wingacita. Mu nshita ya ‘kulasonsomba’ bambi nelyo ukulabomfwila akalumwa pa fyo bacita bwino, ulesekelela nabo. (Abena Galatia 5:26; Abena Roma 12:15) Pa nshita imo ine, ulingile ukulayumfwa bwino pa fyo ucita bwino lelo taufwile ukukwata icilumba. Baibolo itila: “Umo na umo alange umulimo wakwe, e lyo akasansamuka pa mulimo wakwe.”—Abena Galatia 6:4.
UBWAFYA BWA BUTATU → WALIFUUPULWA PANTU WALIFILWAPO Ulatontonkanya pa fyo wafililwe ica kuti umona kwati nangu waesheko te kuti ucite bwino.
Ishiba ubwafya ukwete. Pa fyo ufilwa ukucita bwino, ni cili kwi icikulenga ukumfwa ububi sana?
․․․․․
Tontonkanyapo bwino bwino. Bushe ici walemba ukuti e co ufilwa, cilelangilila ukuti tapaba ifisuma ifyo ucita? Ku ca kumwenako, nga wacita fimo ifyalubana, bushe ninshi tapali ifyo wingacitapo? Bushe ici tacilelangilila fye ukuti ulekabila ukukwafwa? Tutile uleteya icangalo cimo e lyo wapona, bushe kuti wakana abantu nga balefwaya ukukwimyako. Kanshi nga uleyumfwa kwati tapaba ifisuma ifyo ucita, kuti cawama waleka bambi bakwafwa. Lemba ishina lya muntu wingebako ubwafya ukwete.d
․․․․․
Uwalembwa mu Baibolo uo wingasambililako. Limo umutumwa Paulo na o aleumfwa ububi pa fyo alelufyanya. Atile “Yangu ne mulanda wine wine.” (Abena Roma 7:24) Ukwabula no kutwishika, Paulo alishibe ukuti ifyo alelufyanya tafyalelangilila ukuti tapaali ifisuma ifyo alecita. Alembele ukuti: “Nindwa ubulwi ubusuma, nimbutuka ulubilo ukufika na ku mpela, ninsunga icitetekelo.”—2 Timote 4:7.
Ifyo wingacita. Mu nshita ya kulatontonkanya fye pa filubo ucita, kuti cawama nga uletontonkanya na pa fisuma ifyo ucita. Yehova alamona ifisuma ifyo ucita. Baibolo itila: “Lesa taba uushalungama, takalabe umulimo wenu no kutemwa uko mwalangile kwi shina lyakwe.”—AbaHebere 6:10; Amalumbo 110:3.
Uleibukisha ukuti, tatwapwilika kabili inshita shimo bonse tulalufyanya. Nga wasambilila ukukanafuupulwa, cikakwafwa na mu bukalamba. Amapinda 24:16 yatila: “Umulungami kuti awa imiku cinelubali (7), lelo ukwima akema.” E fyo na iwe ulingile ukuba!
Amalyashi na yambi aya kuti “Ifipusho Abacaice Bepusha,” yalasangwa na pa Intaneti pa www.watchtower.org/ype
[Amafutunoti]
a Ishina nalyalulwa.
b Nga ulefwaya ifyebo na fimbi, mona Awake! ya May 2010, pa mabula 26-28.
c Kaini apingwilepo ukukanaumfwila Lesa. Ifya mucitikile filanga fye ifyo cacindama ukukanaba na kalumwa nga wamona umunobe alecita bwino ukukucila.—Abena Filipi 2:3.
d Umwina Kristu nga acita ulubembu afwile ukulanda na ba eluda mu cilonganino pa kuti bamwafwe.—Yakobo 5:14, 16.
[Akabokoshi ne Fikope pe bula 15]
IFYO ABAICE BANOBE BALANDAPO
“Nga taweshako ukucita ifyo umona ati fyalyafya ukucita, lelo ucita fye ifyo waishibisha ninshi uleibepa fye.”
“Nga pali ifyo ushicitile bwino, ulingile ukusambililako fimo no kubombesha pa kuti umuku wakonkapo waisa cita bwino, nelyo kuti walatontonkanya fye pa fyo walufyenye ica kuti walacita fye ifyo ushingalufyanya. Cili kuli iwe ukusalapo ifyo wingacita.”
“Nga ninjishiba ukuti nalafilwa ukucita fimo, nseka fye. Cawamapo ukuiseka ukucila ukuba no bulanda. Te kuti ube ne nsansa nga ule-enekela ukulacita fyonse ukwabula ukulufyanya.”
[Ifikope]
Andrea
Trenton
Naomi
[Akabokoshi pe bula 16]
IPUSHA ABAFYASHI BOBE
Mafya nshi mwalekwata ilyo mwali abaice? Mwalecita shani nga mwakwata aya mafya? Bushe na nomba mulakwata aya amafya?
․․․․․
[Icikope pe bula 16]
Umuntu uushifuupulwa nga apona aleema, limo kuti akabila na bakumwafwa