“Nshafwa”

● Aya, mashiwi ya nsondwelelo ayaba mu mushikakulo wa ciNgeleshi uwaishibikwa nga nshi mu fyalo fya basungu. Kabili aya mashiwi baliyemba na mu lwimbo. Uyu mushikakulo walisansamusha abantu mu fyalo ifingi. Pa myaka iingi abantu balilumbula bakalemba balekanalekana aba mishikakulo ukuti e balembele uyu mushikakulo. Bamo batila aya mashiwi yalandilwe mwi pepo pa kushiika Navajo.

Imyaka iinono iyapita, abena Japan abengi balitemenwe sana ulwimbo ulwalelanda pali uyu mushikakulo nangu ca kutila lwalengele batendeke ukutwishika ifyo basumine. Abena Japan basumina ukuti umuntu nga afwa alatwalilila ukuba uwa mweo ku nshiishi, e ico ilingi balayako ku kucindika umuntu wabo. Apo ifyo ulu lwimbo lulanda fyalipusana ne fyo basumina, abengi balepusha ukuti: “Bushe abafwa baba kwi?”

Ukufuma fye na ku kale, abaBuddha ba ku Japan nga bafwilwa, balalongana ku kucindika uwafwa no kumwibukisha. Lelo abaBuddha abengi tabaishiba uko abafwa baba. Kabili balafilwa no kwasuka ifipusho fya kuti: Bushe aba mu mipepele imbi na mu fyalo fimbi nga bafwa, nabo baya ukuya abantu babo? Mulandu nshi abafwa bashilandila nabo?

Abengi bamona kwati takwaba ifyasuko kuli aya mepusho no kuti ukufwailisha ifyasuko kupoosa fye inshita. Na lyo line, nalimo mulaipushapo amuti, ‘Bushe umuntu aba shani nga afwa?’ Ni kwi twingasanga ifyasuko? Baibolo itila, ilyo Lesa abumbile Adamu na Efa bali abapwililika kabili alibapeele ne cifulo icisuma sana umwa kwikala. Abomfwila Lesa nga baikele umuyayaya muli ilya Paradaise pano pene pe sonde. Lelo tabali ne cumfwila.

E ico Lesa alibatamfishe mu Paradaise no kuleka ukubasakamana. Alondolwele ifyali no kufuma mu kubulwa icumfwila kwabo ilyo atile: “Pantu uli lukungu, kabili ku lukungu e ko ukabwelela.” Umuntu abumbilwe ku lukungu, kabili ilyo afwa e ko abwelela.—Ukutendeka 2:7; 3:19.

Umwaume umo uubombela ku nshiishi iikalamba sana ku Kofu, mu Japan atile: ‘Imito no tumafupa twa bafwa, fiba ifyaisula ilyo bafileta ku nshiishi. Lelo pa numa ya myaka 5 nelyo 10 umo bafibika tamuba nangu cimo.’ Imibili yesu yapangilwa ku fyaba mu mushili, kabili nga twafwa, mu kupita kwa nshita ilasanguka umushili na kabili. Nomba cinshi cishala?

Nangu ca kutila nga twafwa tatwishiba nangu cimo, Kabumba wesu, uwishiba ne filecitika ku luseba lumo na lumo, alatwibukisha pantu alitutemwa. (Mateo 10:29-31) Nga fintu alaya, akatwita no kutubuusha ku bafwa.—Yobo 14:13-15; Yohane 11:21-23, 38-44.

Nga mulefwaya ukwishiba na fimbi pali ili lyashi, lembeleni abalemba ino magazini. Bakatemwa sana ukumulondolwela na fimbi pali ili lyashi. Nelyo belengeni ifyebo na fimbi pa intaneti pa www.watchtower.org.