BUSHE CAPANGILWE FYE?

Umucila wa kwa Malinso Beta ati Agama

KA MALINSO ako beta ati agama (mu cibemba ni kolyokolyo) kalatoloka ukufuma pa cibumba ica batama ukuya ku cibumba caololoka ukwabula no bwafya. Nomba icibumba nga nacitelela, kalafilwa ukutoloka bwino lelo ukulambata kwena kalalambata ku cibumba. Kacita shani? Kabomfya umucila.

Tontonkanyenipo: Ilyo ka agama katoloka ukufuma ku cintu icakalabana icilenga katoloke bwino, kalalosha umucila wakako panshi pa kuti umubili ulungatane no ko kaletolokela. Ici cilenga katoloke ninshi nakololoka. Lelo nga kalefuma apatelela sana, kalafilwa ukutoloka bwino, katoloka ninshi nakabeyama. Nomba lilya line kali mu muulu, kalalosha umucila mu muulu kabili ici cilenga ukuti kololoke. Ifi kacita fyalyafya nga nshi. Lipoti ya ba University of California, Berkeley yatile: “Aka ka malinso lyonse ilyo kali mu muulu, kalaseshanya umucila pa kuti fye katwalilile ukuba akaololoka.” Nga kaletoloka ukufuma apatelela sana, e lyo kemya sana no mucila pa kuti ilyo kafika, kabalishepo amolu.

Napamo abapanga ifya kupanapanga kuti basambililako ku fyo ka agama kabomfya umucila wakako ilyo bakafwaya ukupanga utumyotoka twa kuti te kuti tupilibuke nga tule-enda uto bengabomfya ukufwayafwaya abapuswike ubusanso bukalamba nangu icinkukuma. Ba Thomas Libby abafwailisha ifishinka batile: “Amaroboti te kuti yende no kupilibuka filya ificita inama, kanshi nga mwapanga iroboti ililecita ifintu ukwabula ubwafya ninshi namubomba icine cine.”

Muletipo Shani? Bushe filya umucila wa ka agama ubomba kuti mwatila wasangwike fye? Nelyo bushe Lesa e waupangile muli ulya musango?

[Abatusuminishe]

© Ariadne Van Zandbergen