IFINGAFWA ULUPWA | ICUPO
Ifyo Mwingapwisha Ubwafya bwa Kukanasoshanya
UBWAFYA UBUBAPO
Cinshi cilenga umulume no mukashi abalapile ukuti bakulatemwana lyonse ukukalifyanya ica kuti baleka no kusoshanya pa nshita iitali nelyo pa nshiku ishingi? Ilyo baleka ukukansana, abaupana napamo kuti baletontonkanya ukuti, ‘Naciwama ukuti natuleka ukukansana.’ Kwena nga baleka ukukansana lelo tabalesoshanya ninshi ubwafya bwena e po bucili pantu teti babe ne nsansa.
UMULANDU KUBELA UBU BWAFYA
Ukufwaya ukulandula. Abaupana bamo balaleka ukusosha abena mwabo pa kuti fye babapeshe. Ku ca kumwenako, tutile abalume bapekanya ifya kucita pa mpela ya mulungu ukwabula ukwipushako abakashi babo. Nomba ilyo abakashi baishiba, bakalipa icine cine e lyo baeba abalume ati, mucita fye ifyo mulefwaya. Abalume nabo baeba abakashi ati bafulwa fye na pashilingile. Abakashi bafumapo ne cipyu kabili baleka no kusosha abalume babo. Mu nshila imbi abakashi baleti, “Apo mwankalifya, na ine wine nalamukalifya.”
Pa kuti babacitile ifyo balefwaya. Bamo balaleka ukusosha abena mwabo pa kuti babapeele ifyo balefwaya. Natulangilile, elenganyeni ukuti umulume no mukashi bapekanya ukuyapo kumo, lelo umukashi alefwaya ukusenda na bafyashi bakwe. Abalume bakaana. Batila: “Iwe waupwa kuli ine, te ku bafyashi bobe.” Lyena baleka ukusosha umukashi pa kuti umukashi akonke ifyo balefwaya.
Kwena, inshita shimo cilawama ukwikala tondolo nga ca kuti ukukansana kwaya kulecilamo pantu ukucita ifi kuti kwalenga imitima ukwikala. Ukwikala tondolo ukwa musango yu takwabipa. Baibolo itila kwaliba “inshita ya kwikala tondolo.” (Lukala Milandu 3:7) Lelo abaupana te kuti bapwishe ubwafya bakwete nga ca kuti baleka ukusoshanya pa kufwaya fye ukulandula nelyo pa kuti abena mwabo babacitile ifyo balefwaya kabili ukucite ifi kuti kwalenga baleka no kucindikana. Nomba kuti mwacita shani pa kuti ica musango yu cimucitikila?
IFYO MWINGACITA
Ica kubalilapo ukucita pa kupwisha ubwafya bwa kukanasoshanya kwishiba ukuti ukuleka ukusoshanya takupwisha ubwafya ubulipo. Ca cine ukuti ukuleka ukusosha abena mwenu kuti kwalenga mwalandula nelyo ukulenga abena mwenu ukucita ifyo mulefwaya. Nomba bushe kwena ifi e fyo mwingatemwa ukucita ku muntu uo mwalapile ukuti mukalamutemwa? Mu nshita ya kuleka ukusoshanya, kwaliba inshila shimbi ishisuma isho mwingapwishishamo ukukanaumfwana.
Muleiluka. Baibolo itila mu kutemwa “tamwaba ukukalifiwa.” (1 Abena Korinti 13:4, 5) Kanshi mwilakalipa nga bamweba amashiwi yaluma pamo nga, “Ubwafya tamumfwa nga ndelanda” nelyo aya kuti “Imwe lyonse mulacelwa.” Lelo muleiluka icalenga ukuti balande ayo mashiwi. Ku ca kumwenako, nga batila “Ubwafya tamumfwa nga ndelanda,” limbi kuti baletila fye “Nga ndelanda, imona kwati tamubikako amano.”—Icishinte ca mu Baibolo: Amapinda 14:29.
Mulebweshako ishiwi. Abantu nga batendeka ukukansana ilingi line balaya balekalipilako. Lelo kwaliba ifyo mwingacita pa kuti ukukansana kwicilamo. Finshi mwingacita? Icitabo ca Fighting for Your Marriage citila: “Ukubwesha ishiwi pa nshi no kulakutika ku fyo abena mwenu balelanda kuti kwacefyako ukukansana nelyo fye ukupwisha ukukansana. Ukucita ifi ilingi kulafwa.”—Icishinte ca mu Baibolo: Amapinda 26:20.
Muletontonkanya pa fingawamina bonse babili. Baibolo itila: “Mwilafwaya fye ifingamuwamina, lelo mulefwaya ne fingawamina abanenu.” (1 Abena Korinti 10:24) Nga mulemona abena mwenu ukuti bali ku lubali lwenu ukucila ukulabamona kwati balemulwisha, napamo te kuti mulekalipa nelyo ukukansana nabo, e lyo kabili te kuti muleke ukubasosha.—Icishinte ca mu Baibolo: Lukala Milandu 7:9.
Nga mwaleka ukusosha abena mwenu ninshi tamulekonka ifyo Baibolo isambilisha ukuti: “Na imwe umo umo, onse atemwe umukashi wakwe ifyo aitemwa umwine; umukashi na o abe na katiina ku mulume wakwe.” (Abena Efese 5:33) Kanshi kuti cawama mwasuminishanya na bena mwenu ukuti mu cupo cenu lyonse mukalasoshanya!
[Amashiwi pe bula 6]
Mulemona abena mwenu ukuti bali ku lubali lwenu ukucila ukumona kwati balemulwisha
[Akabokoshi pe bula 6]
AMALEMBO AYENGAMWAFWA SANA
“Uukokola ukukalipa muntu uwiluka nga nshi.”—Amapinda 14:29.
“Umulilo ulashima apashili inkuni.”—Amapinda 26:20.
“Wilakalipa bwangu.”—Lukala Milandu 7:9.
[Akabokoshi pe bula 6]
MULELANDA CIKUUKU CIKUUKU
Baibolo itila: “Imilandile yenu yonse ibe iisuma, iyalungwamo umucele, pa kuti mwishibe ifya kwasuka bwino umuntu onse.” (Abena Kolose 4:6) Ili ilembo lilabomba bwino sana ku baba mu cupo! Natulangilile: Nga muleangala ubwangalo bwa kupooselana umupila, mupoosa mu kunakilila pa kuti umunenu anke bwino bwino. Tamupoosa na maka ica kuti mwacena umunenu. Ifi fine e fyo mulingile ukucita ilyo mulelanshanya na bena mwenu. Nga mulebomfya amashiwi ayaluma, kuti mwakalifya abena mwenu. Lelo nga mulelanda cikuuku cikuuku, abena mwenu kuti baumfwa ico mulelandapo.—Ici cishinka cali muli Loleni! ya January, 2001.