IFYO BAIBOLO ISAMBILISHA
Ubulalelale
Bushe calibipa ukucita ubulalelale?
“Pantu ici e co Lesa afwaya, . . . ukuti muletaluka ku bulalelale.”—1 Abena Tesalonika 4:3.
IFYO ABANTU BALANDA Mu fyalo fimo mwaliba intambi ishisuminisha abantu abakalamba lelo abashaupana ukucita ubulalelale kulila fye basuminishanya. E lyo mu ncende shimo namo bamona kwati caliba fye bwino ku misepela ukulacitako imisango imo iyabipa iya kulangilamo icitemwiko iyakuma ubulalelale.
IFYO BAIBOLO ISAMBILISHA Baibolo nga yatila “ubulalelale” ninshi ilelanda pa bantu abashaupana abalelala pamo. Lesa enekela abamupepa “ukutaluka ku bulalelale.” (1 Abena Tesalonika 4:3) Ubulalelale lubembu ulukalamba filya fine fyaba ubucende, ukumfwana ne mipashi, bucakolwa, ukupepa utulubi, ukwipaya umuntu, no kwiba.—1 Abena Korinti 6:9, 10; Ukusokolola 21:8.
UMULANDU AYA MASHIWI YACINDAMINE Umulandu umo wa kuti, Baibolo ilatusoka ukuti abacita ‘ubulalelale Lesa akabakanda.’ (AbaHebere 13:4) Ne cacindamisha ca kuti, nga tuleumfwila amafunde ya kwa Lesa ayalesha ubulalelale, tulanga ukuti twalitemwa sana Yehova Lesa. (1 Yohane 5:3) Na kabili, Lesa alapaala abakonka amafunde yakwe. —Esaya 48:18.
Bushe calibipa ku bashaupana ukupalamana sana ica kuti ni cikanga fye bacite ubulalelale?
“Ubulalelale no kukowela kwa musango onse nelyo ukufwaisha ukukwata ifingi te kwesha no kulafilumbula apo muli.”—Abena Efese 5:3.
IFYO ABANTU BALANDA Abantu abengi balishiba ukuti ubulalelale bubi lelo batila tacabipa ku bashaupana ukupalamana sana nelyo ukucita fimo ifyabipa ifilelanga ukuti balitemwana cikulu fye tabacitile ubulalelale.
IFYO BAIBOLO ISAMBILISHA Ilyo Baibolo ilanda ukuti ubulalelale bubi, ilalanda na pa “kukowela” e lyo ne ‘mibele iya kuilekelesha.’ (2 Abena Korinti 12:21) Kanshi nangu ca kuti umuntu tacitile ubulalelale, kwaba imisango yabipa iingi iyakuma ubulalelale iyo engacita iyo Lesa apata icine cine.
Baibolo ilanda ukuti abafwile fye ukulaala pamo bantu baupana epela. Na kabili, Baibolo yalilesha “insuuna yalubana.” (1 Abena Tesalonika 4:5) Bushe aya mashiwi yalola mwi? NatuIangilile, umwaume no mwanakashi abalepanga ukuupana, kuti batila tabakatale abacita ubulalelale. Na lyo line, kuti balecita imisango yabipa iya kulangilamo icitemwiko. Nga balecita ifi, ninshi bali no lunkumbwa lwalubana kabili balekumbwa icintu icishili te cabo. E ico balaba no mulandu wa kukwata “insuuna yalubana.” Baibolo itila ulunkumbwa lwa bulalelale ulwa musango yu lwalibipa nga nshi.—Abena Efese 5:3-5.
Kuti mwacita shani pa kuti tamucitile ubulalelale?
“Fulumuka ubulalelale.”—1 Abena Korinti 6:18.
UMULANDU AYA MASHIWI YACINDAMINE Baibolo itila abacita ubulalelale balonaula bucibusa bakwata na Lesa.—Abena Kolose 3:5, 6.
IFYO BAIBOLO ISAMBILISHA Baibolo ikoselesha abantu ukuti “fulumuka ubulalelale.” (1 Abena Korinti 6:18) Ici cilolele mu kuti umuntu afwile ukutaluka sana ku fintu ifingamulenga ukucita ubulalelale. (Amapinda 22:3) Ku ca kumwenako, ngo muntu alefwaya ukuba ne mibele iisuma, calicindama ukuti elaumfwana na bantu abashifwaya ukukonka amafunde ya kwa Lesa ayalanda pa bulalelale. Baibolo ilatusoka ukuti: “Uule-enda na ba mano akaba uwa mano, lelo uwangala na bawelewele akacula.” —Amapinda 13:20.
Ukulatontonkanya pa bulalelale kuti kwalenga umuntu ukucita ubulalelale. (Abena Roma 8:5, 6) Kanshi kuti cawama ukukanacita ifintu ifingalenga mwacita ubulalelale pamo nga ukutamba nelyo ukukutika ku nyimbo na mafilimu umwaba ubulalelale, e lyo no kubelenga ifitabo ne fintu fimbi ifilanda pa bulalelale.—Amalumbo 101:3.
[Icikope pe bula 13]