IFYO BAIBOLO ISAMBILISHA

Ukuba Sana No Bulanda

Bulanda bwa musango nshi ubo twingatila bulwele?

“Nafulungana, nakontama icibi; Akasuba konse naendauka fye uwa bulanda.”—Amalumbo 38:6.

IFYO ABASAMBILILA PALI UBU BULWELE BALANDA Bonse limo tulomfwapo ubulanda, lelo nga ca kuti ubulanda buleya bulekulilako fye kabili tabulepwa, ninshi nomba ubo bulanda bwaba bulwele. Kwena, abasambilila pali ubu bulwele balanda ifyapusanapusana pa fyo twingeshibilako ukuti ubulanda umuntu aleumfwa tabuibelele, na buba bulwele. Abengi abalwala ubu ubulwele bwa kuba sana no bulanda bayumfwa ukuti tabacindama kabili balaipeela sana imilandu.

IFYO BAIBOLO ISAMBILISHA Baibolo yalilanda pa baume na banakashi abengi abaumfwilepo ubulanda. Ku ca kumwenako, Baibolo itila ‘umutima wa kwa Hana walecula.’ Na kuba mu maBaibolo yambi aya mashiwi bayapilibula ukuti “ukushikitiko umutima” nelyo ukuba “uwa nkumba-bulili.” (1 Samwele 1:10) Inshita imo, kasesema Eliya alyumfwile sana ubulanda ica kuti alombele kuli Lesa ukuti afwe!—1 Ishamfumu 19:4.

Abena Kristu bakubalilapo babebele ukuti ‘balesansamusha abali no bulanda.’ (1 Abena Tesalonika 5:14) Icitabo cimo citila, amashiwi ya pali ili ilembo aya kuti “abali no bulanda” yalanda pa bantu “abali no bulanda pa nshita iinono pa mulandu wa masakamika.” Kanshi nangu fye babomfi ba kwa Lesa abalembwa mu Baibolo inshita shimo baleba sana no bulanda.

Bushe uuleba sana no bulanda ninshi e ukwete ubwafya?

“Pantu twalishiba ukuti ifibumbwa fyonse fitetela capamo no kucululukila capamo.”—Abena Roma 8:22.

IFYO BAIBOLO ISAMBILISHA Baibolo itila icalenga ukuti abantu balelwala, lubembu lwa bafyashi besu Adamu na Efa. Pa Amalumbo 51:5 patila: “Mu lubembu e mo nafyalilwe, Kabili mu lubembu e mo mayo anjimitile.” Kabili pa Abena Roma 5:12 napo patila, “ulubembu lwaingilile mu muntu umo [Adamu] pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.” Apo twalipyana ukukanapwililika ukufuma kuli Adamu, bonse tulalwala. Eco Baibolo ilandila ukuti “ifibumbwa fyonse fitetela capamo.” (Abena Roma 8:22) Na lyo line, Baibolo yalilaya ukuti ku ntanshi Lesa akaleta icalo cipya umushakabe ukulwala, ica kuti nangu fye bulwele bwa kumfwa sana ubulanda ubo tulelandapo tabwakabeko. Takwaba dokota nangu umo uwingatupeela ubulayo ubwawama ifi.—Ukusokolola 21:4.

Bushe kuti mwacita shani nga mulaba sana no bulanda?

“Yehova ali mupepi ku baba ne mitima ya bulanda; Kabili apususha abasakamikwa imitima.” —Amalumbo. 34:18.

ICO AYA MASHIWI YACINDAMINE Kwena limo tapali ifyo mwingacita pa fintu fimo ifimucitikila, kabili inshita shimo ifyabipa fikalamucitikila. (Lukala Milandu 9:11, 12) Na lyo line, kwaliba ifyo mwingacita pa kuti mwilaba sana no bulanda.

IFYO BAIBOLO ISAMBILISHA Baibolo itila abalwele balakabila uwa kubondapa. (Luka 5:31) Kanshi nga mwamona ukuti ubulanda muleumfwa tabuibelele lelo bulemoneka ukuti bulwele, tacalubana ukuya ku cipatala pa kuti bamwafwe. Na kabili Baibolo itila ipepo kuti lyamwafwa. Pa Amalumbo 55:22 patila: “Poosa icisendo cobe pali Yehova, Na o akakukosha. Takaleke uwalungama ukutelententa.” Ipepo talyaba kwati muti wa kulenga fye umuntu ukumfwako bwino; lelo ipepo kulanda na Yehova Lesa uwaba “mupepi ku baba ne mitima ya bulanda.”—Amalumbo 34:18.

Cimbi icingamwafwa kulanda kuli cibusa uo mwacetekela. (Amapinda 17:17) Ba Daniela, Inte ya kwa Yehova batile, “Naleba sana no bulanda, nshalefwaya no kulanshanyapo no muntu uuli onse pali ubu bwafya. Bushiku bumo Nte munandi uo tulongana nankwe alinjipwishepo bwino bwino pa bwafya nakwete ubwa kumfwa sana ubulanda mpaka twalanshanyapo. Nalyumfwileko bwino ica kuti natile fye kanshi nga kale nasumine ukulanshanyapo no muntu pa bwafya bwandi.”

[Icikope pe bula 15]