Ifyebo Fyabamo Lyonse Filabomba Kabili Kuti Fyayafwa Umuntu Fye Onse—Bucishinka Ku Bena Mwenu

IFYO BAIBOLO ILANDA: “Icupo cifwile ukuba ica mucinshi kuli bonse, kabili tacifwile ukuba icakowela.”—AbaHebere 13:4.

IFISUMA IFIFUMAMO: Abantu bamo bamona kwati aya mashiwi ya kale, te kuti yabombe no kubomba. Nomba ubu bufi icine cine! Ifyo abantu bomfwa ububi nga ca kuti umwina mwabo acita ubulalelale, e fyo na bantu baliko pali ilya nshita Baibolo yalelembwa baleumfwa.—Amapinda 6:34, 35.

Ba Jessie, abaume abaupa kabili abakwata na bana, batile: “Ukuba na bucishinka mu cupo kwalilenga twalaumfwana sana no mwina mwandi kabili twaliba ne nsansa nga nshi. Ca cine, ukucetekelana kwalicindama sana mu cupo. Ukukaanaba ne cishinka mu cupo kuti kwalenga twalafilwa ukucetekelana” kabili ici kuti cakuma na bana!

Kwashele fye panono ukuti icupo ca ba Ligayaa cipwe. Batile: “Natendeke ukwangala na bantu abali ne mibele yabipa. Ne ci calengele ukuti ndeya mu kwangala ubushiku kabili nshali uwa cishinka ku balume bandi.” Bushe ifi balecita fyalibalengele ukuba ne nsansa? Ba Ligaya na bena mwabo baleumana fye lyonse, kabili tabali ne nsansa. Batile: “Ilyo natontonkenye pa fyabipa ifyo nalecita e lyo nashininkishe ukuti filya abafyashi balenjeba kuti, ‘ukwampana pamo na babi kulonaula imibele isuma’ fya cine”—1 Abena Korinti 15:33.

Ba Ligaya batile: “Ilyo ifintu fishilabipa sana, napingwilepo ukuleka imibele yabipa kabili natendeke ukusambilila Baibolo no kukonka ifyo isambilisha.” Cinshi cafuminemo? Ba Ligaya tabalekene na bena mwabo, e lyo na balume babo batendeke ukuba ne cikuuku kuli bena no kubacindika. Ba Ligaya batile: “Baibolo yalyalula ubumi bwandi, kabili nalitemwa ukuti nalileka imibele yabipa e lyo no kwangala pamo ne fibusa ifyali ne mibele iibi.”