Ifyebo Fyabamo Lyonse Filabomba Kabili Kuti Fyayafwa Umuntu Fye Onse—Ukutemwa

IFYO BAIBOLO ILANDA: “Fwalilenipo no kutemwa, pantu e cikakilo cafikapo ica kwikatana.”—Abena Kolose 3:14.

IFISUMA IFIFUMAMO: Ukutemwa uko balandapo sana mu Baibolo te kutemwa ukwaba pa mwaume no mwanakashi. Lelo kutemwa kwa cine cine ukulenga umuntu aba ne nkumbu, ukwelela, ukuicefya, icishinka, icikuuku, ukufuuka e lyo na ukutekanya. (Mika 6:8; Abena Kolose 3:12, 13) Ukutemwa kwa cine cine kulaya kulekoselako fye, lelo ukutemwa kwa cimbepa kwena kulapwa.

Ba Brenda, abaupwa pa myaka mupepi na 30, batile: “Ukutemwa uko abaupana fye nomba line bakwata te kuti kulingane no kutemwa uko abaupana pa myaka iingi bakwata, pantu ukutemwa kulaya kulekoselako.”

Ba Sam, abaupa pa myaka ukucila pali 12, batile: “Ine no mwina mwandi twalitemwa ukufunda ukwaba muli Baibolo, e lyo limo tulapapa ifyo uku kufunda kutwafwa ne fyo kwayanguka ukukonka! Nga mulekukonka, ifintu filaba bwino sana. Lelo, limo ndafilwa ukukonka ukufunda kwa mu Baibolo, maka maka nga na kuntukilwa bwangu, nangu ndefwaya ukuti ifintu fingwamine, nelyo nga ninaka. Nga naumfwa ifi, ndapepa kuli Yehova ukuti angafwe ndeke ukumfwa ifyo ndeumfwa. Lyena ndakumbatila umukashi wandi, kabili tapakokola na kukokola ninshi ifintu fyaba bwino kwati tapaciba na bwafya!”

Yesu Kristu atile “ifyalungama ifyo umuntu acita e filanga ukuti wa mano.” (Mateo 11:19) Kanshi, mu Baibolo e mwaba amano yene yene. Ifyebo fya bamo kabili ifyo itusambilisha filabomba icine cine. Ukufunda kwabamo takuleka ukubomba. Kulabomba ku bantu bonse te mulandu no mutundu wabo nelyo icalo bafumako. Apo ifyebo fyaba mu Baibolo filabomba, cilanga ukuti uwalembele alishiba sana ifyo abantu baba, no uyu ni Kabumba wesu, Yehova Lesa. Nomba pa kuti tushininkishe ukutila Baibolo kuti yatwafwa tulingile ukulakonka ifyo ilanda. Eco Baibolo itwebela ukuti, “Sondeni no kumona ukuti Yehova musuma.” (Amalumbo 34:8) Bushe te kuti mutemwe ukumona ubusuma bwa kwa Yehova?