Amatwi ya Cipelebesha ca Bushiku

ICIPELEBESHA ca bushiku cilomfwikisha ukucila pa fya mweo fyonse pe sonde. Lelo amatwi ya ciko yanono sana kwati litoni ilili pa mpela ya ino sentensi kabili ne fyo yapangwa tafyapikaana.

Tontonkanyeni pali ici: Pa myaka iingi abantu balafwailisha pa kuti bengeshiba ifyo icipelebesha ca bushiku cumfwa. Mu myaka ya nomba line fye basayantisti ba pa University of Strathclyde, ku Scotland, baleesha ukwishiba ifiunda ifyo icipelebesha ca bushiku cingomfwa. Ilyo balepanga ifiunda, balepimina kuli nakulukutwi no kulemba ifyo aalebomba. Basangile ukuti ici cipelebesha caleumfwa ne fiunda ukufika kuli 300 kilohertz e kutila ifiunda ifya pa nshi sana. Nomba akasusu kena komfwa ifiunda ukufika kuli 212 kilohertz, ama dolphin yena yomfwa ukufika kuli 160 kilohertz, e lyo nga bantu bena te kuti bomfwe ifiunda ifikulile ukucila pali 20 kilohertz.

Basayantisti balefwaya ukupanga fimo ifingalabomba kwati kutwi kwa cipelebesha ca bushiku. Finshi bengapanga? Dokota James Windmill uwa pa University of Strathclyde atile, “Balefwaya ukupanga ama maikrofoni ayanono sana nomba ayekata bwangu amashiwi, ayo bengalabika mu mafoni ya kwenda nayo na muli filya bapangila abantu abashumfwikisha sana pa kubafwa ukulaumfwa bwino.”

Muletipo shani? Bushe icipelebesha ca bushiku caikwatile fye amaka ya kumfwa sana muli uyu musango nelyo kwali uwacipangile?