ICIPANDE ICIKALAMBA

Bushe Ifilonganino fya Mapepo Fyalitendeka Ukuwa?

Balupwa nabeminina pa nse ye calici ilyaisalikwa

Ba Gaffar, abafyalilwe mu Turkey, babasambilishe uko balepepa ukuti Lesa alitemwisha ukulandula. Ilyo abena mwabo ba Hediye baali fye ne myaka 9, balitendeke ukutwishika nga ca kuti ifyo balebasambilisha uko balepepa fyali fya cine. Batile: “Uko nalepepa batusambilishe ukuti Lesa alatantikila libela ificitikila abantu. Nomba apo abafyashi bandi balifwa, naletontonkanya nati bushe finshi nacita pa kuti abafyashi bandi bafwe? Ilingi line, nalelila ubushiku. Ilyo nali ne myaka 15, nalilekele ukusumina ifyo baletusambilisha ku calici.”

BUSHE na imwe mwalileka ukucetekela ifilonganino fya mapepo? Nga mwalileka, ninshi te imwe mweka. Mu fyalo ifingi, abantu abatila tabakwata uko bapepa baleya balefulilako fye, kanshi ici cilelanga fye ifili no kucitikila ifilonganino fya mapepo. Natulande pa fyo abafwailisha pa fintu basanga mu fyalo fimo.

AUSTRALIA

Ifyo bafwailishe filanga ukuti mupepi na hafu ya bantu abekala mu Australia batila tabaya ku mapepo. Abantu 10 pa bantu 100 bena tabasumina fye no kuti Lesa e ko aba. Mu 2010, shimapepo umo atile “mu myaka nalimo 40 iyapita, abantu abengi balileka ukuba Abena Kristu.”

FRANCE

Abantu fye 37 pa bantu 100 e batile balaya ku mapepo. Abantu bambi abashala batile tabasumina ukuti Lesa e ko aba, kabili bambi bena tabaya na ku mapepo. Magazini ya The Economist yatile, mu ncende shimo isha muli ici calo umwafulile sana ba Katolika, “mwashala fye ba Katolika abanono sana.”

IRELAND

Cilemoneka kwati abena Ireland abengi baleleka ukuya ku mapepo. Mupepi na hafu ya bantu abo baipwishe batile tabaya ku mapepo, e lyo abantu 10 pa bantu 100 batile tabasumina ukuti Lesa e ko aba. Ireland yali pa fyalo 10 mwi sonde lyonse umwafulile abantu abashasumiine ukuti Lesa e ko aba. Abalanda amalyashi pa mulabasa batila “ba Katolika bali no kupwa mu Ireland.”

JAPAN

Abantu 16 pa bantu 100 mu Japan, batile balaya ku mapepo. Abantu 62 pa bantu 100 tabaya ku mapepo e lyo bambi pali aba tabasumiina ukuti Lesa e ko aba.

SOUTH AFRICA

Ukufuma mu 2005 ukufika mu 2012, abena South Africa 19 pa bantu 100 abaleti balaya ku mapepo, balilekele ukuyako.

TUNISIA

Mu 2013, abantu 60 pa bantu 100 mu Tunisia batile balileka ukuya ku mapepo, lelo bapepela fye pa mayanda. Balandile ukuti icalenga baleke ukulaya ku mapepo ni co balatiina ulukakaala ulucitika ku mapepo.

UNITED STATES

Ukutula mu 2005, abantu 13 pa bantu 100 abaleti balaya ku mapepo, balileka. Umuntu umo pa bantu 5 abo baipwishe alelanda ukuti tafwaya ifya mapepo. Umuntu umo pa bantu batatu abakalamba abashilafisha imyaka 30, alileka ukuya ku mapepo. Cila mwaka, amacalici ayengi balayesala.

VIETNAM

Ukufuma mu 2005 ukufika mu 2012, abantu 53 pa bantu 100 e baleya ku mapepo, lelo pali ino nshita abantu fye 30 pa bantu 100 e baya ku mapepo.

Ifipendo fya mu fyalo fyonse ifyo tulandilepo, ukufumyako fye icalo ca Tunisia, fifumine mu citabo ca mu 2012 ica Global Index of Religion and Atheism, icasabankanishiwa na ba Gallup International. Abo baipwishe bantu ba mu fyalo 57. Kanshi mu calo conse, baleimininako abantu 73 pa bantu 100.

Cinshi abantu balekela ukuya ku mapepo?

Kwaliba ifintu ifingi ifilenga abantu baleke ukuya ku mapepo. Fimo pali ifi, lukakaala ulo aba mu filonganino bacita, ubupulumushi ubo bashimapepo bacita, e lyo ne fintu fimbi ifyabipisha ifilenga abantu abengi basuula ifilonganino fya mapepo. Pali ifi paba:

Ukufwaisha ifyuma: Icitabo icitila Global Index of Religion and Atheism calanda ukuti, “Abantu nga bakwata sana indalama, balaleka ukubika sana amano ku fya mapepo.” Ifi icitabo calanda fya cine pantu mu fyalo ifingi abantu balekwata sana ifyuma. Ba John V. C. Nye, ba profesa batile, “Abantu bamo balekala bwino sana ukucila ne fyo imfumu ishakwatishe icuma imyaka 200 iyapita shaleikala.”

IFYO BAIBOLO ILANDA: Baibolo yalisobele ukuti mu “nshiku sha kulekelesha” abantu bakatemwa indalama no kwangala ukucila ifyo batemwa Lesa na bantu banabo. (2 Timote 3:1-5) Kalemba wa Baibolo umo uwaishibe ububi ubwingaba mu kukwatisha ifyuma aebele Yehova Lesa ukuti: “Mwimpeela ubupiina nangu ifyuma.” Cinshi calengele alande ifi? Atile: “Epali naikuta no kumusuula.”—Amapinda 30:8, 9.
Ifyabipa ifyo bashimapepo bacita e lyo ne fyo bafunda: Abantu abengi, maka maka abacaice, bamona ukuti ukuya ku mapepo kwa cabe cabe. Abantu bamo balileka ukucetekela ifyo babasambilisha kuli bashimapepo. Ba Tim Maguire ababomba ku Humanist Society mu Scotland batile: “Abantu abengi balileka ukucetekela bashimapepo ukuti e bengabasambilisha imibele iisuma pantu pa myaka iingi, balimona ifyo bashimapepo bacita.”

IFYO BAIBOLO ILANDA: Yesu Kristu alandile pali bashimapepo ba bufi ati: “Mukabeshibila ku fisabo fyabo. . . . Umuti onse uusuma utwala ifisabo ifisuma, lelo umuti onse uubi utwala ifisabo ifibi.” (Mateo 7:15-18) Pali ifi “ifisabo ifibi” paba ne fyabipa ifyo bashimapepo bacita, pamo nga ukuibimba mu fikansa fya calo e lyo kulasuminisha ifyo Lesa apata pamo nga ukulasuminisha abaume ukulaala na baume banabo, na abanakashi ukulaala na banakashi banabo. (Yohane 15:19; Abena Roma 1:25-27) Mu nshita ya kulakonka ifyo Baibolo ilanda, bena basambilisha abantu intambi. (Mateo 15:3, 9) E co Yesu alandile ukuti: “Liisha utwana twandi utwa mpaanga.” (Yohane 21:17) Na lyo line, abantu abengi pali lelo balikwata insala ya fya kwa Lesa pantu bashimapepo wabo tababasambilisha.
Ifyo bashimapepo babomfya indalama: Aba mu kabungwe ka Pew Research Center balandile ukuti, abantu abengi basanga ukuti bashimapepo balalanda sana pa ndalama. Ne cabipisha ca kuti bashimapepo balekala bwino icine cine e lyo abantu babo balacula. Ku ca kumwenako, mu calo ca German, abantu abengi abaya ku calici balacula, lelo bashikofu babo bena bakankaala icine cine kabili balekala bwino. Aba bashikofu balilenga ba Katolika abengi ukuleka ukuya ku calici. Magazini ya GEO yatile, “Cila bushiku, abantu amamilioni 100 mu Nigeria, babomfya fye 1 euro (K8) ku kushita ifya kulya, lelo bashimapepo bena balekala bwino icine cine.”

IFYO BAIBOLO ILANDA: Paulo uwalembeleko Baibolo atile: “Tatuli nga abengi abaya baleshitisha icebo ca kwa Lesa.” (2 Abena Korinti 2:17) Nangu ca kuti Paulo ali ni kabila wa mbila nsuma uwaishibikwe sana mu cilonganino ca Bena Kristu ica kubalilapo, aleibombela pa kuti alekwata ifyo alekabila. (Imilimo 20:34) Ifi alecita, filanga fye ukuti aleumfwila ifyo Yesu alandile ilyo atile: “Mwapeelwe fye ubupe, na imwe mulepeela fye.”—Mateo 10:7, 8.

Apo ba Nte balomfwila ili ifunde, tabashitisha impapulo shabo kabili tabapoka ica pe kumi nelyo ukupoka imituulo pa kulongana. Indalama isho abantu basangula mu kuitemenwa, e sho babomfya.—Mateo 6:2, 3.

Abantu Bakafuma mu Filonganino fya Mapepo

Kale, abengi tabaletontonkanya ukuti abantu bakatendeka ukulafuma mu filonganino fya mapepo nga fintu caba muno nshiku. Na lyo line, Lesa alilandile libeela mu Baibolo ukuti ifi fikalacitika. Lesa apashanye ifilonganino fya mapepo ya bufi kuli cilende uwitwa ukuti “Babiloni Mukalamba.”—Ukusokolola 17:1, 5.

Ishina lya kuti Babiloni Mukalamba lyalilinga pantu bashimapepo ba mu mipepele ya bufi balabepa ukuti bacishinka kuli Lesa, lelo balabombela pamo na bakateka ba pano calo pa kuti balebapelako indalama. Baibolo pa Ukusokolola 18:9 itila, “Ishamfumu sha pe sonde shacitile nankwe ubulalelale.” Cimbi ico twalandila ukuti ishiwi lya kuti “Babiloni” lyalilinga, ni co aba mu mipepele ya bufi basambilisha ukuti muli Lesa umo mwaba abene batatu, umweo taufwa, e lyo balasumina na mu mipashi. Ifi ifisambilisho fyonse e fyo abaleikala mu Babiloni ya ku kale basumiine.a—Esaya 47:1, 8-11.

Umusumba wa Babiloni bawonawile ilyo abashilika ba bena Madai na Persia ‘bakamishe’ amenshi ayashingulwike uyu musumba ayalefuma mu mumana wa Yufrate. (Yeremia 50:1, 2, 38) Na kuba, uyu umusumba bawonawile mu bushiku fye bumo.—Daniele 5:7, 28, 30.

Babiloni Mukalamba na o “aikala pa menshi ayengi.” Baibolo ilanda pali aya “amenshi ayengi,” ukuti bantu ba mu “nko shonse na ba ndimi shonse,” abaafwilisha ukupepa kwa bufi. (Ukusokolola 17:1, 15) Baibolo yasobele ukuti aya amenshi ya mampalanya yakakama, ukulangilila ifyo Babiloni wa muno nshiku akonaulwa mu kwangufyanya. (Ukusokolola 16:12; 18:8) Nomba ni bani bakonaula Babiloni Mukalamba? Ba mu mapolitiki abomfwana nankwe, lelo abakamupata. Bakamupokolola fyonse kabili bakalya umubili wakwe uwa mampalanya.—Ukusokolola 17:16, 17.b

Balebelenga Baibolo kabili baleelenganya ifyo amenshi ayashingulwike umusumba wa Babiloni yacepele ne fyo abantu balefuma muli Babiloni Mukalamba — Filya amenshi ya mu Babiloni yakamine fimininako ifyo abantu bafuma muli Babiloni Mukalamba

“Fumenimo Muli Ena”!

Apo Babiloni Mukalamba ali no konaulwa, Lesa atweba ukuti: “Fumenimo muli ena, mwe bantu bandi, nga tamulefwaya ukuwila mu membu shakwe, kabili nga tamulefwaya ifinkunka fyakwe ukwisa pali imwe.” (Ukusokolola 18:4) Muli ili ilembo babomfya ishiwi lya kuti “nga,” imiku ibili. Abo Lesa asoka, bantu pamo nga ba Gaffar na ba Hediye abapata ubufi ubo bashimapepo basambilisha kabili abafwaya ukucita ifyo Lesa afwaya.

Ilyo ba Gaffar bashilatendeka ukusambilila Baibolo, baishibe ukuti bafwile ukulabombela Lesa pantu balemutiina. Ba Gaffar batile: “Nalitemenwe icine cine ilyo naishibe ukuti Yehova, ni Lesa wa kutemwa kabili afwaya tulemumfwila pa mulandu wa kuti twalimutemwa.” (1 Yohane 4:8; 5:3) Ba Hediye balitemenwe ilyo baishibe ukuti Lesa te walengele abafyashi babo bafwe, kabili tatantikiile libela ukuti bakafwe. Ilembo lya kwa Yakobo 1:13 lyalibasansamwishe sana pantu lilanda ukuti Lesa tesha abantu ku bubi. Ba Gaffar na ba Hediye balisambilile ifyo Baibolo ilanda kabili balifuma muli “Babiloni.”—Yohane 17:17.

Ilyo Babiloni Mukalamba akonaulwa, abantu “bakalepepela Tata [Lesa] mu mupashi na mu cine,” pantu takwakabe uukalasambilisha ifya bufi. (Yohane 4:23) Abafuma muli Babiloni balikwata isubilo lya kuti isonde “likesulamo ukwishiba Yehova filya amenshi yaisula muli bemba.”—Esaya 11:9.

Ukupepa kwa bufi ne mibele yabipa fili no kupwa pantu Lesa, ni Lesa “uushingabepa.” (Tito 1:2) Ukupepa kwa cine kwena takwakatale akupwa.

a Nga mulefwaya ukwishibilapo na fimbi pali Babiloni Mukalamba e lyo na pa fyo Baibolo isambilisha pa fyo abafwa baaba, pa fyo Lesa aaba, na pa mipashi, kuti mwabelenga icitabo icitila Bushe Cinshi Baibolo Isambilisha? Ici icitabo kuti mwacisanga pa www.jw.org/bem.

b Belengeni icipande icileti: “Ifyo Baibolo Isambilisha—Impela ya Calo,” muli ino ine Loleni!