Impela ya Calo

Bushe “icalo” icikapwa e cinshi?

IFYO BAIBOLO ILANDA

Apo icalo tulelandapo caba no “lunkumbwa,” ulukalenga Lesa akaconaule, kuti twatila te calo cino cine umo twikala. Icalo Baibolo yalandapo, balwani ba kwa Lesa, e kutila abakaana ukumumfwila. (Yakobo 4:4) Aba bantu “bakapingwilwa ukonaulwa umuyayaya.” (2 Abena Tesalonika 1:​7-9) Lelo abantu abomfwila Yesu Kristu kabili abakaana ukuba aba “muli ici calo” bakekala umuyayaya.​—Yohane 15:19.

Ilembo lya 1 Yohane 2:17 lyapwa na mashiwi ayatila: “Uucita ukufwaya kwa kwa Lesa akekalilila umuyayaya.” Kanshi abacita ifyo Lesa afwaya bakekala umuyayaya pano pene pa calo nga fintu ilembo lya Amalumbo 37:29 lilanda. Litila: “Abalungama e bakekala mu calo, kabili bakekalamo umuyayaya.”

“Mwitemwa ici calo nelyo ifya muli ici calo. Ngo muntu atemwa icalo, ninshi tatemwa Shifwe.”​—1 Yohane 2:15.

Bushe icalo cikapwa shani?

IFYO BAIBOLO ILANDA

Kwaliba ifintu fibili ifikacitika ilyo icalo cikapwa. Ica kubalilapo, Lesa akonaula imipepele ya bufi iyo Baibolo iita ukuti “Babiloni Mukalamba” nelyo cilende. (Ukusokolola 17:​1-5; 18:8) Nangu ca kuti aba mu mipepele ya bufi batila ba cishinka kuli Lesa, balabombela pamo na bakateka ba ici calo. Na lyo line, aba bakateka abo babombela pamo nabo, e bakabalukila. Baibolo itila, ‘Bakapata cilende no kumupokolola fyonse ukumusha ubwamba, kabili bakalya umubili wakwe [nelyo ifyuma] no kumoca fye onse mu mulilo.’​—Ukusokolola 17:16.

Ica bubili ca kuti Lesa akonaula aba mu mapolitiki, e kutila “ishamfumu sha ba pano isonde shonse.” Aba aba mu mapolitiki bakonawilwa capamo na bantu ababipa mu “nkondo ya bushiku bukalamba ubwa kwa Lesa Wa Maka Yonse,” iyo beta no kuti “Armagedone.”​—Ukusokolola 16:​14, 16.

“Fwayeni Yehova, mwe bafuuka bonse aba mwi sonde . . . Fwayeni ubulungami, fwayeni ubufuuke. Napamo kuti mwabelama mu bushiku bwa bukali ubwa kwa Yehova.”​—Sefania 2:3.

Ni lilali icalo cikapwa?

IFYO BAIBOLO ILANDA

Abantu nga babashimikila pa Bufumu bwa kwa Lesa, ubukafumyapo ama bufumu ya bantunse, e lyo impela ikesa. (Daniele 7:​13, 14) Yesu Kristu atile: “Imbila nsuma iyi iya Bufumu ikabilwa ku bantu bonse aba pe sonde ku kuba ubunte ku nko shonse; e lyo impela ikesa.” (Mateo 24:14) Apo Lesa taba na lufyengo kabili wa luse, ukubila imbila nsuma kwaba pa ‘cishibilo,’ icilanga ukutila tuleikala mu nshita ya mpela. Muli ici icishibilo mwaba inkondo, ifinkukuma, ifipowe e lyo na malwele.​—Mateo 24:3; Luka 21:​10, 11.

Baibolo tayalanda fye pa fikalacitika mu calo, lelo yalilanda na pa fyo abantu bakaba “mu nshiku sha kulekelesha.” Baibolo itila: “Mu nshiku sha kulekelesha mukesaba inshita ishayafya nga nshi. Pantu abantu bakaba abaitemwa, abatemwa indalama, . . . abashumfwila abafyashi babo, . . . abashailama, abankalwe, abashatemwa ­ubusuma, . . . abatemwa ukwangala ukucila ukutemwa Lesa.”a—2 Timote 3:​1-5.

Ifi fyonse ificitika ifilanga ukuti tuleikala mu nshiku sha kulekelesha, fyatendeke ukucitika mu 1914, ilyo kwali Inkondo ya Calo iya Kubalilapo. Ukutula mu 1914, ba Nte balashimikila abantu imbila nsuma iya Bufumu bwa kwa Lesa mu calo conse, kabili balitemwa pa fyo abantu babeshiba ukuti e babila imbila nsuma. Na kuba, magazini iyo basabankanya sana yakwata umutwe uutila Ulupungu lwa kwa Kalinda Ulusabankanya Ubufumu bwa kwa Yehova.

“E ico mulelola, pantu tamwaishiba ubushiku nangu ni nshita.”​—Mateo 25:13.