ICIPANDE ICIKALAMBA | CINSHI MU FYA KULESESHAMO ICITENDWE MUBELA SANA IFYA MIPASHI?
Abantu Nabatemwa Amalyashi Ayalanda pa Mipashi Yabipa
Inyunshipepala ya The Wall Street Journal yatile: “Abantu nomba nabaleka ukutemwa amalyashi ayalelanda pa bantu abanwa umulopa wa banabo, abasangukila mu finama e lyo ne fipuuku, lelo batendeke ukutemwa sana amalyashi ayalanda pa bantu ababa ne fibanda e lyo na yalanda pa fyo ifibanda ficita.”
ABALOSHI abaice na bakalamba na balya abanwa umulopa wa banabo, baba pa fya kumwenako fimo ifya bantu ababomfya amaka ya mipashi yabipa, kabili ifi fine e filesangwa sana mu mabuuku, mu mafilimu na mu fyangalo fya pa kompyuta. Cinshi calenga abantu batemwe aya malyashi?
Ba Claude Fischer, abasambilila sana imikalile ya bantu, balembele ukuti: “Abantu abacetekela mu maka ya mipashi yabipa nabafula sana mu America ukucila kale.” Na kabili batile, “Mu America mwaliba abacaice abengi ukucila abakalamba abayapo mu kubukisha, abacetekela ukuti ifiwa e ko fyaba e lyo na basumina ukuti kwaliba amayanda umwaba ifiwa.”
Te ca kupapusha ukwishiba ukuti amalyashi ayalanda pa mipashi yabipa nayafula sana. Ba Michael Calia balembele mu nyunshipepala ya The Wall Street Journal ukuti: “Icalenga amalyashi ayalanda pa fibanda ukufula sana, malyashi ya kale ayalelanda pa fipuuku, abasangukila mu finama e lyo na bantu abanwa umulopa wa banabo.”
Lipoti imo yalandile ukuti, “mupepi na hafu ya bantu mwi sonde lyonse balicetekela mu fiwa. Mu fyalo fimo, amalyashi ayalanda pa fiwa yaliseeka sana.” Ukufwailikisha kumo uko ba Christopher Bader na ba Carson Mencken abasambilila sana imikalile ya bantu bafwailikishe mu America batile, “Abena America abengi balicetekelapo mu musango umo uwa maka yafibanda.”
Bushe caliba fye bwino ukulaumfwana ne mipashi yabipa no kulabomfya amaka ya mipashi yabipa ukucita ifinjelengwe?