11 Ukubombesha

UMO UKUBOMBESHA KWALOLA

Abantu ababombesha tabatiina ukubomba imilimo, lelo balabombesha pa kuti baleisakamana no kusakamana abantu bambi, nangu fye incito balebomba yalisuulwa.

ICO UKUBOMBESHA KWACINDAMINA

Nampo nga tulefwaya nangu tatulefwaya, tulingile fye ukubomba imilimo. Abantu abengi muno calo tabafwaya ukubombesha, kanshi nga ulebombesha, ifintu kuti fyakuwamina.—Lukala Milandu 3:13.

“Nalisanga ukuti ukubombesha kulalenga umuntu aba ne nsansa, kabili ici calilenga natemwa ukubomba imilimo. Nga ulebombesha, abantu baleshiba kabili kuti bakucindika.”—E fyalandile Reyon.

ILEMBO ILINGAKWAFWA: “Mu kucucutika konse mwaba no busuma.”—Amapinda 14:23.

IFYO WINGACITA

Ulecita ifyakonkapo pa kuti utemwe ukulabomba imilimo.

Ulefwaisha ukusambilila ukubomba bwino imilimo. Nampo nga ulebomba imilimo ya pa ng’anda, ulesanga ifya ku sukulu nelyo ulebomba imilimo imbi, ulingile ukubikako sana amano. Nga waishiba ifya kubomba bwino umulimo, ulingile ukutwalilila ukwishibilapo na fimbi pa kuti uleubomba bwino sana na pa kuti uleupwisha bwangu. Nga waishiba ukubomba bwino imilimo, e lyo wa kulabomba ne nsansa.

ILEMBO ILINGAKWAFWA: “Bushe naumona uwacenjela mu mulimo wakwe? Akeminina ku cinso ca shamfumu; takeminine ku cinso ca bantu yaweyawe.”—Amapinda 22:29.

Uletontonkanya na pa bantu bambi. Ilingi line nga ulebomba bwino imilimo, abantu bambi nabo balanonkelamo. Ku ca kumwenako, nga ulebomba bwino imilimo ya pa ng’anda, kuti walenga imilimo ya pa ng’anda ukwanguka.

ILEMBO ILINGAKWAFWA: “Mwaba insansa ishingi mu kupeela ukucila ishaba mu kupokelela.”—Imilimo 20:35.

Ulebombesha. Wilabomba fye imilimo bakupeele nelyo iyo ulingile ukubomba, lelo ulebombesha. Nga ulecita ifi, tabakulakupatikisha fye ukubomba imilimo, lelo wakulabomba mu kuitemenwa.—Mateo 5:41.

ILEMBO ILINGAKWAFWA: “Wicita icisuma pa mulandu wa kupatikishiwa, lelo mu kuitemenwa.”—Filemone 14.

Wilabomba ukucila mu cipimo. Abantu ababombesha tababomba ukucila mu cipimo, na lyo line ici tacalola mu kuti banang’ani. Abantu ba musango uyu balaba ne nsansa pantu balakwata inshita ya kubombesha e lyo ne nshita ya kutuusha.

ILEMBO ILINGAKWAFWA: “Ukutuusha panono kwawama ukucila ukucishamo ukubombesha no kuuma fye umwela.”—Lukala Milandu 4:6.