1. Bushe Lesa E Ulenga Tulecula?
Umulandu Cacindamina Ukwishiba Icasuko
Abantu abengi tabatemwa Lesa pantu bamona kwati e ulenga tulecula.
Tontonkanyeni Pali Ifi
Ilingi line, bashimapepo abengi basambilisha ukuti, Lesa e ulenga tulecula. Ku ca kumwenako bamo balanda ukuti:
Lesa e ulenga kuleba utuyofi.
Icilenga abana ukufwa ni co Lesa alafwaya bamalaika na bambi ku muulu.
Lesa alatungilila amabumba ya bashilika yamo ilyo balelwa inkondo, ne ci cilalenga abantu abengi ukucula.
Bushe ifi bashimapepo balanda pali Lesa kuti bwaba bufi? Bushe nga ca kuti Lesa alipata ifyo balanda pali ena, tufwile ukubacetekela nga balanda ukuti Lesa e ulenga tulecula?
ISHIBILENIPO NA FIMBI
Tambeni vidio itila Mulandu Nshi Mulingiile Ukusambilila Baibolo? pa jw.org/bem.
Ifyo Baibolo Ilanda
Lesa te ulenga tulecula.
Baibolo ilanda ukuti Lesa alikwata imibele iisuma, kanshi te kuti alenge abantu ukulacula. Ku ca kumwenako:
BAIBOLO PA AMALANGO 32:4 itila, “Inshila shakwe [Lesa] shonse mulinganya. . . . Alilungama kabili alitambalala.”
BAIBOLO PALI YOBO 34:10 itila, “Lesa wa cine te kuti acite ifyabipa, Uwa Maka Yonse te kuti afyenge umuntu nakalya!”
BAIBOLO PALI YOBO 34:12 itila, “Cine cine, Lesa tacita ifyabipa, Kabili Uwa Maka Yonse tapondamika ubupingushi.”
Lesa tafwaya imipepele iilanda ifya bufi pali ena.
Pa mipepele Lesa ashifwaya paba na ilya ilanda ukuti e ulenga tulecula, ne itungilila inkondo no bunkalwe.
PALI YEREMIA 14:14 Lesa atile “Bufi e bo bakasesema balesesemena mwi shina lyandi. Nshabatuma nangu kubeba ukuti balesesema nangu kulanda na bo. Balesesema kuli imwe ifiloto fya bufi . . . no bucenjeshi bwa mitima yabo.”
Yesu alipatile bashimapepo babumbimunda.
BAIBOLO PALI MATEO 7:21-23 itila: “Te onse uutila kuli ine, ‘Shikulu, Shikulu’ akengila mu bufumu bwa mu muulu, kano uucita ififwaya Tata uwaba mu muulu e ukengilamo. Abengi muli bulya bushiku bakatila kuli ine, ‘Mwe Shikulu, mwe Shikulu, bushe tatwasesemene mwi shina lyenu, no kufumisha ifibanda mwi shina lyenu, no kucitila ifipesha amano ifingi mwi shina lyenu?’ Lelo nkabebelapo nkatila: ‘Nshatalile imwishiba! Fumeni apa, mwe bampulamafunde mwe.’”