4. Bushe Lesa Atupangile Ukuti Tulecula?

Umulandu Cacindamina Ukwishiba Icasuko

Icasuko kuli ici icipusho cilakuma ifyo tumona ubumi.

Tontonkanyeni Pali Ifi

Bushe Lesa nga alefwaya ukuti tulecula, nga alipangile isonde ilisuma ifi?

Abantu abashabika amano ku fya mapepo balanda ukuti ifi tucula filanga ukuti, (1) Lesa takwata amaka ya kupwisha amafya tukwata, (2) tatubikako amano, nelyo (3) tabako.

Bushe ifi balanda ca cine e filenga tulecula?

Ifyo Baibolo Ilanda

Lesa tatupangile ukuti tulecula.

Afwaya tuleipakisha ubumi.

Baibolo itila: “Takuli icawama kuli bena [abantu] kano ukusekelela no kucita ifisuma mu nshita ya bumi bwabo; kabili ninjishiba ukuti umuntu onse alingile ukulya no kunwa, no kusekelamo mu kubombesha kwakwe konse. Ubu e bupe bwa kwa Lesa.”—LUKALA MILANDU 3:12, 13.

Ilyo Lesa apangile abantu bakubalilapo babili, alibapeele fyonse ifyo balekabila pantu talefwaya balecula.

Talefwaya bena nelyo abana babo ukulacula.

Baibolo itila Lesa aebele abantu bakubalilapo ukuti: “Fyaleni, fuleni, kumaneni pe sonde no kulimapo.”—UKUTENDEKA 1:28.

Abantu bakubalilapo babili balikene ukuti Lesa alebatungulula.

Ici calengele batendeke ukucula pamo na bana babo ukubikako fye na ifwe bene.

Baibolo itila: “Filya ulubembu lwaingilile mu muntu umo pano calo ne mfwa yaingilile mu lubembu, e fyo ne mfwa yasalanganine ku bantu bonse pantu bonse balibembwike.”—ABENA ROMA 5:12.a

Lesa atupangile ukuti e o aletutungulula.

Lesa tatupangile ukuti tuleitungulula nga filya fine ashatupangile ukuti tuleikala mu menshi.

Baibolo itila: “Umuntu te kuti ayendele umwine. Takwata amaka ya kutungulula intampulo shakwe.”—YEREMIA 10:23.

Lesa tafwaya kuti tulecula.

Lesa tafwaya tulecita ifintu ifingatuletelela.

“Nga wabika fye amano ku mafunde yandi, umutende obe kuti waba ngo mumana.”—ESAYA 48:18.