Umulandu Cacindamina Ukwishiba nga ca Kuti Kwaliba Kabumba

Cinshi cacindamina ukwishiba nga ca kuti kwaliba Kabumba nelyo iyo? Nga kwaliba ifishinka ifingalenga mwashininkisha ukuti Lesa wa Maka Yonse e ko aba, ninshi nalimo kuti mwatemwa no kufwaya ifishinka ifilanga ukuti Baibolo yafuma kuli ena. Nga mwacetekela ifyo Baibolo ilanda, ninshi kuti mwanonkelamo mu nshila shakonkapo.

Kuti mwalaba ne nsansa

IFYO BAIBOLO ILANDA: “[Lesa] acitile icisuma, pa kumupeela imfula ukufuma mu muulu ne nshita sha kutwala ifisabo, ukumupeela ifya kulya ifingi no kulenga imitima yenu ukusangalala.”—Imilimo 14:17.

UMO AYA MASHIWI YALOLA: Fyonse ifilenga twaba ne nsansa fyafuma kuli Kabumba. Kabili nga mwaishiba ifyo uwamupeela ifi fintu amusakamana, mukalamutasha sana.

Mukasanga ifyebo ifyo mwingacetekela ifingalenga mwaba ne nsansa

IFYO BAIBOLO ILANDA: “Ukomfwikisha ubulungami no bupingushi no bololoke, e kutila inshila yonse iisuma.”—Amapinda 2:9.

UMO AYA MASHIWI YALOLA: Apo Lesa ni Kabumba wesu, alishiba ifyo tukabila pa kuti tuleba ne nsansa. Nga muleisambilisha Baibolo, mukasanga ifintu ifingamwafwa pali ino inshita.

Kuti mwasanga amasuko ku mepusho mwakwata

IFYO BAIBOLO ILANDA: “Ukwishiba Lesa ukakusanga.”—Amapinda 2:5.

UMO AYA MASHIWI YALOLA: Ukwishiba ukuti kwaliba Kabumba kuti kwalenga mwasanga amasuko ku mepusho yacindama pamo nga: Cinshi twabela pano calo? Mulandu nshi tuculila? Bushe tuba shani nga twafwa? Mukwai kuti mwasanga amasuko kuli ifi fipusho muli Baibolo.

Muleba ne subilo

IFYO BAIBOLO ILANDA: “‘Ninjishiba amatontonkanyo ayo ndetontonkanya pali imwe,’ e fyasosa Yehova, ‘amatontonkanyo ya mutende, te ya bubi iyo, aya kumupeela inshita ya ku ntanshi iisuma ne subilo.’”—Yeremia 29:11.

UMO AYA MASHIWI YALOLA: Lesa alitulaya ukuti ku ntanshi akafumyapo ifyabipa pamo nga ukucula e lyo ne mfwa. Nga mwacetekela ifyo Lesa atulaya, mukalashipikisha amafya mukwata cila bushiku.

Ifyo bamo banonkelamo pa mulandu wa kucetekela ukuti kwaliba Kabumba

“Ndapapa sana nga namona ifyo Lesa atwafwa cila bushiku. Alalenga twaishiba ifyacilapo ukucindama, alatweba ifya kulaumfwana na bantu e lyo ne fyo twingaba ifibusa fyakwe.”—E fyalandile ba Cyndi, aba ku U.S.A.

“Ifi nacetekela muli Kabumba naliba ne nsansa. Pantu ndasambilila ifingi pali ena, pa fyo abumba, e lyo na pa Cebo cakwe.” —E fyalandile ba Elise, aba ku France.

“Nga ndecita ifyo Kabumba atweba muli Baibolo ndaba ne nsansa. Ici cilalenga nilabika amano ku filubo fya bambi, ndebabikako amano e lyo ndateka no mutima. Kabili calilenga naba umufyashi umusuma.” —E fyalandile ba Peter, aba ku Netherlands.

“Ilyo nshilasambilila pali Lesa, ifyo nalecita fye kulya no kulaala kabili naleceelwa no kuya ku ncito. Nshali ne nsansa! Pali ino nshita nalisambilila ukuti ubumi bupe ubusuma sana kabili naliba ne nsansa.” —E fyalandile ba Liz, aba ku Estonia.

“Ndasakamikwa sana. Nomba ukwishiba fye ukuti Lesa akafumyapo ifyabipa, ulufyengo e lyo no kucula kulalenga ndeshipikisha.”—E fyalandile ba Adrien, aba ku France.