MU CALO MWALIBA SANA AMAFYA

1 | Mulecingilila Ubumi Bwenu

ICO CACINDAMINA

Amasanso nga yacitika kuti yalenga twakwata amafya mu nshila ishalekanalekana.

Amafya nga yacitika yalalenga abantu basakamikwa pa nshita iitali kabili ici cilenga balwala.
Amafya nga yacitika yalalenga ifintu ukwafya ica kuti nangu waya ku cipatala cilafya ukundapwa bwino.
Amafya nga yacitika cilafya ukukwata indalama kabili ici cilenga abantu balafilwa ukushita ifya kulya ifisuma e lyo no kulipila ku cipatala pa kuti babondape.

Ifyo Mufwile Ukwishiba

Nga namulwala sana kabili namusakamikwa te kuti mulepingula bwino pa fintu kabili mu kuya kwa nshita kuti mwaleka no kulasakamana bwino ubumi kabili kuti mwalwalilako.
Nga ca kuti mwalilwala ubulwele e lyo tamulebikako amano ukuisakamana kuti mwalwalilako kabili no kufwa fye kuti mwafwa.
Nga muli no bumi ubusuma, mukalapingula bwino pa fintu nangu muli na mafya.
Nangu tamwakwata indalama ishingi kuti mwakumanisha ukucingilila ubumi bwenu.

Ifyo Mwingacita Pali ino Nshita

Umuntu wa mano alabikako amano ukumona ifingamuletela amafya e lyo no kuicingilila. Ifi fine e fyo tulingile ukulacita na ku bumi bwesu. Ilingi line nga tuli no busaka kuti twaicingilila ku malwele kabili nga ca kuti natulwala ninshi te kuti tulwalishe. Batila bangilila ilyo mulamba talatulula.

“Nga tuleisakamana bwino kabili tulesunga amayanda yesu aya busaka, tatwakulalwalalwala kabili tatwakulapoosa indalama ishingi ukuya ku cipatala.”—E fyalandile ba Andreas.a

a Amashina yamo muli ino magazini nayalulwa.

IFINGAMWAFWA UKUSHIPIKISHA—Ifyebo Ifingamwafwa

Nga muli na mafya mulecita ifili pali lino ibula pa kusakamana ubumi bwenu

MULEISUNGA ABABUSAKA

Muleba no busaka

Baibolo itila: “Uwasalapuka nga amona ububi alabelama, lelo imbulwa mano shena shiya fye no kukandwa.” (Amapinda 22:3) Muleishiba ifingalenga mwalwala pa kuti mwaishiba ifyo mwingaicingilila.

Mulesamba ku minwe na sopo maka maka ilyo mushilaikata ifya kulya na lintu mwafuma ku cimbusu.
Mulewamya lyonse mu ng’anda kabili mulesansa umuti pa ncende apo mwikata sana no kupukutapo.
Nga kuti mwakumanisha mule-esha na maka ukukanalaaba pamo na bali no bulwele ubwambukila.

MULELYA IFYA KULYA IFISUMA

Mulelya ifya kulya ifisuma kabili ifya mulyo

Baibolo itila: “Takwatala akuba umuntu nangu umo uwapata umubili wakwe; lelo alauliisha no ku-usunga bwino.” (Abena Efese 5:29) Tulalanga ukuti tulaisakamana nga tulebika amano ku fyo tulelya.

Mulenwa amenshi ayengi.
Mulelya ifisabo ifyalekanalekana no musalu.
Mwilalya sana ifya kulya ifyakwata sana amafuta, umucele nelyo ifyalowa.
Mwilapeepa fwaka, ukunwesha ubwalwa nelyo ukubomfya imiti iyo babinda.

“Pa kuti twilalwalalwala tulesha na maka ukulalya ifya kulya ifisuma, pantu nga tatulecita ifyo kandalama konse ako tukwata nga kaya fye ku cipatala. Kanshi tulesha na maka ukulashita ifya kulya ifisuma.”—E fyalandile ba Carlos

MULETUKUSHA UMUBILI KABILI MULETUUSHA SANA

Muletukusha umubili

Baibolo itila: “Ukutuusha panono kwawama ukucila ukucishamo ukubombesha no kuuma fye umwela.” (Lukala Milandu 4:6) Tatulingile ukulacishamo ukubomba lelo tulingile no kulashako inshita ya kutuusha.

Muletukusha umubili. Inshita shimo kuti mule-enda fye. Nangu ca kuti muli bakalamba, mwalilemana nelyo mulalwalilila, ukutukusha umubili kuti kwalenga mwalaumfwako bwino.
Muletuusha sana

Muletuusha sana. Nga tamulelaala sana kuti mwalanaka kabili ici kuti calenga mwalafilwa no kulabika amano ku fintu kabili mu kuya kwa nshita kuti mwalwala.
Mulebika inshita iyo mulingile ukuya mu kulala kabili muleikonka. Mule-esha ukulaala pa nshita imo ine no kubuuka pa nshita imo ine cila bushiku.
Mule-esha na maka ukukanalatamba TV nelyo ukubomfya foni ilyo muli mu bedi.
Mwilalya sana ifya kulya ifingi ilyo tamulaya mu kulala, kabili mwilanwa ubwalwa nelyo ifya kulya fimbi ifingalenga mwafilwa ukulaala.

“Nasanga ukuti nga shilelaala sana ndalwalalwala. Ndatendeka ukumfwa umutwe ubukali kabili no mubili onse ulasashila. Nomba nga ndelala sana ndaba bwino kabili ndakwata na maka ya kubomba imilimo kabili nshilwalalwala.”—E fyalandile ba Justin.