2 | Mulecingilila Ifyo Mwakwata

ICO CACINDAMINA

Cila bushiku abantu balacula sana pa kuti basange ifyo bakabila kabili ifi mu calo mwaba sana amafya cilakoselako. Cinshi twalandila ifi?

• Mu ncende umwaba sana amafya ifya kulya no mwakwikala filakosa umutengo.

• Mu calo nga muli amafya, incito shilafya sana ukusanga kabili ici cilenga abantu ukukanakwata indalama.

• Amasanso ayakalamba yalalenga abantu baba abapiina pantu yalabonawila amakwebo, amayanda e lyo ne fyo bakwata.

Ifyo Mulingile Ukwishiba

• Nga mulesungako indalama, nangu mwakwata amafya kuti mwashalapo ne sha kubomfya.

• Inshita shimo nangu mwingasunga indalama tacilepilibula ukuti shikatwalilila ukumwafwa pantu shilapwa amaka.

• Pa kuti mube ne nsansa mu lupwa no kutwalilila ukwikatana tamukabila ukubomfya indalama.

Ifyo Mwingacita Pali ino Nshita

Baibolo itila: “Pa kuba ne fya kulya ne fya kufwala no mwa kwikala, tuteke imitima kuli ifi fine.”—1 Timote 6:8.

Nga natuteka imitima tubika fye amano ku fyo tukwete ifyo twingabomfya pali ubo bwine ubushiku. Calicindama ukucita ifi maka maka nga tamukwete indalama ishingi.

Pa kuti muteke imitima mulingile ukusambilila ukulabomfya fye indalama ishinono. Nga muleshita ifintu ifingi ukucila pa ndalama mukwete mukailetela amafya.