MU CALO MWALIBA SANA AMAFYA

3 | Mulekosha Bucibusa Mwakwata na Batemwikwa Benu

ICO CACINDAMINA

Apo amafya mu calo yalefulilako abantu balefilwa ukubika amano ku batemwikwa babo.

Abantu balaitalusha ku banabo.
Abaupana balaleka ukuba ne cikuuku ku bena mwabo.
Abafyashi balaleka ukubika amano ku bana babo ica kuti tabeshiba na mafya abana bakwata.

Ifyo Mufwile Ukwishiba

Ukukwata ifibusa kusuma pantu kulalenga tuleba no bumi ubusuma e lyo tuletontonkanya bwino.
Ificitika mu calo kuti fyalenga mu lupwa lwenu mwaba amafya ayabula ukwenekela.
Amalyashi ayabipa ayaba pa milabasa kuti yalenga abana benu balaikala mwenso mwenso ukwabula no kuti mwiluke.

Ifyo Mwingacita Pali ino Nshita

Baibolo itila: “Ukutemwa kwa kwa cibusa wa cishinka takupwa, kabili uyu cibusa ni munyina uufyalwa ilyo kuli ubucushi.”—Amapinda 17:17.

Mulelanshanyako ne fibusa abamutemwa kabili abengamupandako amano. Ifibusa fya musango uyu filalenga tuletwalilila ukushipikisha amafya tukwata cila bushiku.

IFINGAMWAFWA UKUSHIPIKISHA—Ifyebo Ifingamwafwa

Apo mu calo muli sana amafya mulecitako ifi pa kukosha bucibusa mwakwata na batemwikwa benu

MULEKOSHA ICUPO CENU

Mulekosha icupo cenu

Baibolo itila: “Ukuba babili kwawama ukucila ukuba weka . . . Pantu umo nga awa, umunankwe kuti amwimya.” (Lukala Milandu 4:9, 10) Abaupana bafwile ukulabombela pamo nga filya uule-ensha indeke na kafwa wakwe babombela pamo. Tabafwile ukulalwishanya.

Mulingile ukulanshanya ukuti tamulingile ukuleka amafya mukwete yalelenga mulekalifyanya. Muletekanya kabili mulesuulako ku fintu.
Cila mulungu mulelanda pa mafya mukwete. Mwilaumana lelo mulebika amano ku fyo mwingacita pa kupwisha ayo mafya.
Mulekwatako inshita ya kucitila pamo ifintu ifyo mwatemwa.
Mulelandako pa fisuma ifyacitike kale, pamo ngo kutambako ifikope mwakopelwe pa bwinga bwenu e lyo ne fintu fimbi.

“Te mu fintu fyonse umo abaupana bengasuminishanya, lelo ici tacilepilibula ukuti te kuti babombele pamo. Abaupana kuti bapingulapo ukucita ifintu fimo, kabili pa kuti ifyo bapingwilepo ficitike balingile ukulabombela pamo.”—E fyalandile ba David.

MULEBA CIBUSA UMUSUMA

Muletwalilila ukuba cibusa musuma

Mwilaleka fye ifibusa fyenu balemwafwa lelo naimwe muletontonkanyako pa fyo mwingabafwa. Nga ca kuti mulekosha bambi, na imwe mukaba abakosa.
Cila bushiku muletuminako abanenu bamo amafoni pa kuti muleishiba ifyo bali.
Mulebepushako ifyo bashipikisha amafya ayapalana na yo mukwatako.

“Ilyo mwakwata amafya ayakalamba muletontonkanya pa fyo abanenu bashipikishe. Pantu ukucita ifi kukalamwafwa ukushipikisha. Nga namukwata amafya ica kuti tamwishibe ne fya kucita, ifibusa fyenu kuti fyamwafwa. Abanenu balamusakamana kabili balishiba ukuti na imwe bene mulabasakamana.”—E fyalandile ba Nicole.

MULESAKAMANA ABANA BENU

Mulesakamana abana benu

Baibolo itila: ‘Muleba abayanguka ukumfwa, abakokola ukulanda, abakokola ukukalipa.’ (Yakobo 1:19) Inshita shimo abana te kuti bamwebe ilyo line fye ifyo baleumfwa, nomba nga namubatekanishisha mukalenga bakalande fyonse ifili ku mukoshi.

Mulecita ifingalenga cayangukila abana benu ukulanda ifyo baleumfwa. Abana bamo bafwaya ukulanda ifyo baleumfwa ninshi muli nabo muli motoka, mule-enda e lyo bambi bafwaya mwikele bonse e lyo balemweba.
Mwilaleka abana baleumfwa amalyashi yabipa.
Muleishibisha abana ifyo mulefwaya ukucita ngo lupwa pa kuti muicingilile.
Mulelanshanya na bana benu ifyo mulefwaya ukucita nga kwaba amasanso.

“Mulelanshanya na bana, kabili muleleka balelanda ifyo baleumfwa, pantu kuti bali no mwenso nelyo nabakalipa ukwabula ukuti mwishibe. Mulebeba ukuti na imwe mulomfwa ifi fine, kabili mulebeba ifyo mucita pa kuleka ukumfwa ifyo.”—E fyalandile ba Bethany.