IFYO MWINGABA NE NSANSA NANGU IMITENGO ILEILAKO PA MUULU

Muleteka Umutima ku fyo Mukwete

Abantu abateka umutima ku fyo bakwete balekala bwino. Kabili ifintu nga fya-aluka nabo balaaluka pa kuti belashita ifyo bashingakumanisha.

UMULANDU UKUCITA IFI KWACINDAMINA

Ba Jessica Koehler abasambilila pa fyo bongobongo ya muntu ibomba balandile ukuti, abantu abateka imitima ku fyo bakwete tabasakamikwa sana. Na kabili balandile ukuti tabafimbila sana abantu banabo. E mulandu wine abantu abateka imitima ku fyo bakwete babela abansansa kabili tabakwata sana amasakamika. Na kuba, abantu bamo abakwata sana insansa tabakwata ne fyuma ifingi. Ifi twalandapo filacitika maka maka ku bantu ababika sana amano ku fintu ifyo indalama shishingashita pamo nga insansa tukwata nga tuli pamo no lupwa lwesu e lyo ne fibusa.

“Nga natukwata ifya kulya ne fya kufwala, tuteke imitima kuli ifi fine fintu.”—1 Timote 6:8.

IFYO MWINGACITA

Mwilailinganya kuli bambi. Nga mwatendeka ukuilinganya ku bantu abalemoneka kwati balekala bwino ukumucila kuti mwatendeka ukubakumbwa nangu fye ukubafimbila. Nomba tamufwile ukulaba ukuti ing’anda ushilala baikumbwa umutenge. Abantu abengi abamoneka kwati balikwata indalama balikwata sana inkongole. Ba Nicole abekala ku Senegal batile: “Nshikabila ukukwata ifintu ifingi pa kuti mbe ne sansa. Ndateeka umutima ku fyo nkwete kabili kuti naba ne nsansa nangu ca kuti abantu bambi nabakwata ifingi ukuncila.”

Esheniko ukucita ifi: Mwilatamba ifyo babika pa Intaneti ifilangilila ifyo abantu abakankala bekala.

“Umuntu nangu akwate shani ifingi, ubumi bwakwe tabuba mu fintu akwata.”—Luka 12:15.

Muletasha pa fyo mwakwata. Abantu abatasha balateka imitima ku fyo bakwete kabili tabatontonkanya ukuti balingile ukukwatilapo na fimbi pa kuti babe ne nsansa. Ba Roberton, aba ku Haiti, batile: “Ndatontonkanya sana pa fyo abantu bangafwilisha pamo no lupwa lwandi. Lyena ndabeba ifyo ntasha pa fyo batucitila. Na kabili ndasambilisha umwana wandi umulumendo uli ne myaka 8 ukulatasha pali fyonse ifyo bamucitila.”

Esheniko ukucita ifi: Cila bushiku mulelemba ifisuma ificitike ifyo mwingatemwa ukutashishapo. Kuti mwalemba ifintu pamo nga ubumi ubusuma, ulupwa ulusuma, ifibusa ifisuma, nelyo ifyo akasuba kamoneka bwino nga kalewa.

“Uwakwata umutima wa nsansa lyonse aba ngo muntu uukwata umutebeto cila bushiku.”—Amapinda 15:15.

Inshita shimo bonse fye cilatukosela ukuteka imitima ku fyo tukwete. Na lyo line tulingile ukulaesha apo twingapesha ukuteka imitima ku fyo tukwete. Nga twateka imitima ku fyo tukwete tukalaba ne nsansa isho indalama shishingashita.