IFYO MWINGABA NE NSANSA NANGU IMITENGO ILEILAKO PA MUULU
Mulepeela
Nga ca kuti cilemukosela ukushita ifintu pa mulandu wa kuti imitengo ileilako fye pa muulu, nalimo kuti mwalatontonkanya amuti te kuti mupeeleko bambi. Na lyo line, ukuitemenwa ukupeelako bambi kuti kwalenga mwalashipikisha nangu ca kuti imitengo ya fintu ileilako fye pa muulu. Kuti mwakumanisha ukupeelako bambi ifintu nangu ca kuti tamubomfya indalama ishingi.
UMULANDU UKUCITA IFI KWACINDAMINA
Ukuitemenwa ukupeelako bambi kulalenga tuleba ne nsansa nangu ifyo tubapeele finono sana. Na kuba badokota bamo balanda ukuti ukupeela kuti kwalenga twaba no bumi ubusuma. Ku ca kumwenako, ukupeela kuti kwalenga twaleka ukulwala amasakamika, kuti kwalenga umulopa wilabutuka sana, kabili kuti kwacefyako ne fya kukalipa mu mubili. Ukupeela kuti kwalenga twalakwata no tulo utusuma.
Nga ca kuti tuleafwilishako abantu pamo nga ukubapeela indalama nelyo ukubafwilisha mu nshila imbi, na ifwe cikatwangukila sana ukusumina ukuti batwafwe nga twakwata amafya. Ba Howard abekala ku England balandile abati: “Ine no mwina mwandi nga tuleafwilishako abantu bambi cilalenga na ifwe twilaumfwa kwati tuli cisendo nga ca kuti bambi batwafwilisha.” Kwena abantu abaitemenwa ukupeelako bambi tabenekela ukuti nabo bakabapeelako fimo. Na lyo line, ukupeela kulalenga bakwata ifibusa ifisuma ifi-itemenwa ukubafwilisha nga ca kuti balekabila ubwafwilisho.
IFYO MWINGACITA
Mulepeelako bambi ifyo mukwete. Nangu ca kuti tamwakwata ifingi kuti mwapeelako bambi ifyo mukwete nangu fye kubepikilako ifya kulya. Ba Duncan no lupwa lwabo abekala ku Uganda tebakankaala, lelo balaitemenwa ukupeelako abantu ifyo bakwete. Ba Duncan batile: “Pa Mulungu ine na bena mwandi tuletako umuntu umo ku ng’anda pa kuti tuliile pamo ica kulya. Twalitemwa sana ukuba pamo na bantu.”
Na lyo line, ilyo tulepeela tatulingile ukupeela ifingi ica kuti no lupwa lwesu lwatendeka ukucula.—Yobo 17:5.
Esheniko ukucita ifi: Iteniko umuntu pa kuti muliile ca pamo ifya kulya. Nga ca kuti mwalikwata ifintu fimo ifyo mushibomfya kuti mwapeelako abalefikabila.
Fimbi ifyo mwingacita pa kupeela. Fimo ifyo twingacita pa kupeela tafikabila indalama. Ku ca kumwenako kuti twa-afwilishako abantu ukubomfya amaka yesu ne nshita yesu. Na mashiwi ayasuma kuti yaba bupe ubusuma nga nshi. Kanshi kuti mwaebako bamo ifyo mutasha pa fyo bamucitila nelyo ukubeba ifyo mwabatemwa.
Esheniko ukucita ifi: Kuti mwa-afwako bambi imilimo ya pa ng’anda nelyo ukubafwako ukulungisha ifyonaike. Kuti mwalembelako ifibusa fyenu kadi nelyo meseji iya kubeba fye ukuti muletontonkanya pali bena.
Nga mulepeela ifintu fikalamuwamina.