Ukufuma pa Nshita Lesa Atendeke Ukupanga Ifintu Ukufika pa Lyeshi

Nani wapangile umuulu ne sonde? Bushe nani wapangile akasuba, umweshi ne ntanda, na fyonse ifyaba pe sonde? Baibolo itweba ukuti Lesa e wapangile ifi fyonse. Kanshi muli cino citabo twalatendekela ukulanda pa malyashi ya fintu ifyo Lesa apanga.

Baibolo itweba ukuti Lesa abalilepo ukupanga bamalaika, ababa nga ena. Kabili Lesa apangile ne sonde ilya kwikalamo fwe bantu. Na pa numa, Lesa apangile umwaume no mwanakashi abo ainike ati Adamu na Efa no kubabika mu cifulo icalemoneka bwino sana. Lelo aba bantu tabaumfwilile Lesa, ne co calengele bekwata ishuko lya kwikala umuyayaya.

Ukutula apo Lesa abumbiile Adamu ukufika pa Lyeshi ilikalamba, papitile imyaka 1,656. Pali iyi nshita, pano calo pali abantu abengi abalecita ifyabipa. Ku muulu, kwali Satana pamo na bamalaika bakwe ababipa. Pe sonde, pali Kaini na bantu abengi abalecita ifyabipa, e lyo na bantu abo baleita ati amapaka. Lelo pali na bantu pamo nga Abele, Enoke, na Noa abalecita ifisuma. Mu CIPANDE 1, e muli amalyashi ayalelanda pali aba bonse ne fyo balecita.