Ico Babatamfishe Umo Baleikala

MONA ifilecitika apa. Adamu na Efa babatamfya mu Edeni, icifulo icali icisuma sana. Bushe nawishiba ico babatamfishe?

Ifyo bacitile fyalibipile sana. E calengele ukuti Yehova abatamfye. Bushe walishiba ifyabipa ifyo Adamu na Efa bacitile?

Bacitile ifyo Lesa abakeenye. Alibebele ukulalya ku fimuti ifyali mu Edeni. Lelo kwali icimuti cimo ico Lesa abakeenye ukulyako. Atile nga balyako bakafwa. Cilya cimuti cali ca kwa Lesa epela. Kabili bonse twalishiba ukuti cibi ukusenda icintu ca mwine, bushe te ifyo? Cinshi Adamu na Efa bacitile?

Bushiku bumo ilyo Efa ali eka mu Edeni, insoka yatendeke ukulanda nankwe. Tontonkanya ifyo cali! Insoka yaebele Efa ukulya ku cimuti ico Lesa abakeenye ukulyako. Ilyo Yehova apangile insoka tashipangile ukuti shilelanda. Kanshi kufwile kwali uwalengele ukuti insoka ilande na Efa. Nani uyo wine?

Apo te Adamu, ninshi uwalandile na Efa afwile ni umo pali bamalaika abo Yehova apangile ilyo ashilapanga isonde. Fwe bantu te kuti tumone bamalaika. Malaika uwalandiile mu nsoka ali ne cilumba sana. Aleimona ukuti na o afwile ukulatungulula abantu nga Lesa. Kabili alefwaya ukuti abantu balemumfwila ukucila ukulaumfwila Yehova. Uyu malaika e walandiile mu nsoka.

Uyu malaika alibepele Efa. Aebele Efa ati akaba nga Lesa nga alya icisabo. Efa alimucetekele, alya ne cisabo e lyo apeelako na Adamu, na o alya. Adamu na Efa tabaumfwilile Lesa, e calengele ukuti abatamfye mu cifulo icisuma sana umo baleikala.

Lelo, bushiku bumo Lesa akalenga isonde lyonse ukuwama nga filya mu Edeni mwali. Tuli no kusambilila ifyo na iwe wingacita ifingalenga isonde ukuwama. Nomba natumone ifyacitike kuli Adamu na Efa.