Yakobo Akwata Ulupwa Ulukalamba

MONA ulu lupwa ulukalamba. Bana abaume 12 aba kwa Yakobo. Alikwete na bana abanakashi. Bushe pali abo waishiba amashina pa bana ba kwa Yakobo? Natulandeko pa mashina yamo.

Abana abo Leya akwete ni Rubene, Simeone, Lebi na Yuda. Ilyo Rakele amwene ukuti talekwata abana, ali no bulanda sana. E ico abuulile umubomfi wakwe umwanakashi Bilha no kumupeela kuli Yakobo. Bilha akwete abana abaume babili, Dani na Naftali. Lyena Leya na o abuulile umubomfi wakwe umwanakashi, Silupa no kumupeela kuli Yakobo na Silupa afyele Gadi na Ashere. Leya alishilekwata abana na bambi babili, Isakari na Sebuluni.

Rakele asukile akwata umwana uo ainike ati Yosefe. Tuli no kusambilila ifingi pali Yosefe pantu aishileba umuntu uwacindama sana. Aba e bana baume 11 abo Yakobo akwete ilyo aleikala na Labani, wishi wa kwa Rakele.

Yakobo alikwete na bana abanakashi, lelo Baibolo yalumbulapo fye umo. Ishina lyakwe ni Dina.

Yakobo asukile aeba Labani ukuti alefwaya ukubwelelamo ku Kanaani. E ico alongenye ulupwa lwakwe ulukalamba e lyo ne mpaanga ne ng’ombe shakwe shonse fye no kwima ubulendo bwa kubwelelamo ku Kanaani.

Ilyo Yakobo no lupwa lwakwe bafikile fye mu Kanaani, Rakele aliimite no kukwata umwana na umbi umwaume. Ico cacitike ilyo bali pa lwendo. Rakele afwile ilyo alepaapa pantu alishupikwe sana. Lelo umwana ena tafwile. Yakobo amwinike ati, Benjamini.

Calicindama ukulaibukisha amashina ya bana baume 12 aba kwa Yakobo pantu abena Israele bonse e ko bafumine. Na kuba, amashina ya mikowa 12 iya bena Israele yafuma ku bana baume 10 aba kwa Yakobo e lyo na babili aba kwa Yosefe. Isaki alikele imyaka iingi. Abana ba kwa Yakobo bonse bafyelwe ninshi Isaki talafwa. Kanshi ali nabo pa myaka iingi. Isaki afwile alitemenwe filya akwete abeshikulu abengi. Lelo natumone icacitikile umwishikulu wakwe Dina.