Yobo Alicetekele Sana Lesa

BUSHE taumfwile uluse ukumona uyu mwaume uwalwala? Ishina lyakwe ni Yobo kabili umwanakashi uwiminine, mukashi wakwe. Bushe nawishiba ifyo ale-eba Yobo? Aleti: ‘Tuka Lesa no kufwa.’ Natumone ico alandiile ica musango uyu, ne co Yobo aculile sana.

Yobo ali ne citetekelo kabili aleumfwila Yehova. Aleikala mu calo ca Usi, icali mupepi na Kanaani. Yehova alitemenwe sana Yobo, lelo kwali uwamupatile. Bushe naumwishiba?

Ni Satana Kaseebanya. Satana ni malaika umubi uwapata Yehova. E walengele Adamu na Efa beumfwila Yehova. Alemona kwati kuti alenga na bantu bonse ukuleka ukumfwila Yehova. Bushe alicitile ico? Awe. Tontonkanya pa baume na banakashi ubwingi abakwete icitetekelo, abo twalandapo. Ni banga uleibukisha amashina?

Ilyo Yakobo na Yosefe bafwile mu Egupti, uwali ne citetekelo sana pano calo ponse ni Yobo. Yehova alefwaya Satana ukwishiba ukuti te kuti alenge abantu bonse ukuba ababi. E ico aebele Satana ati: ‘Mona ifyo umubomfi wandi Yobo aba ne citetekelo.’

Satana aebele Lesa ati: ‘Ico Yobo amutiinina ni co mwalimupaala kabili alikwata ifintu ifisuma ifingi. Lelo nga mwamupoka ifi fintu akamutuka.’

E ico Yehova atile: ‘Ale, mupoke fyonse ifyo akwata. Cita ifibi fyonse ifyo ulefwaya ukucita kuli Yobo. Tukamona nga ca kuti akantuka. Lelo wiesha ukwikata pa mweo wakwe.’

Intanshi Satana alekele abantu baiba ing’ombe sha kwa Yobo ne ngamila no kwipaya impaanga shakwe. Lyena Satana aipeye abana ba kwa Yobo 10, abaume na banakashi ku mfula ya cimwela. Pa numa, alwalike Yobo ubulwele ububi. Yobo aliculile icine cine. E calengele umukashi wakwe amwebe ati: ‘Tuka Lesa no kufwa.’ Yobo tacitile ico. Kwali na banankwe batatu abaile mu kumweba ati pali ifibi ifyo alecita. Lelo Yobo atwalilile fye ukuba ne citetekelo kuli Lesa.

Ici calengele Yehova ukutemwa sana, kabili pa numa, alipaalile Yobo nga fintu ulemona pa cikope. Alimuposeshe kabili aishilekwata abana na bambi 10 abasuma. Aishilekwata ne ng’ombe, ne mpaanga, e lyo ne ngamila ishingi ukucila isho akwete pa kubala.

Bushe na iwe ukalacetekela Yehova lyonse nga Yobo? Nga ukalacita ico, na iwe Lesa akakupaala. Ukekala umuyayaya ilyo calo cikawama nga filya fine mu Edeni mwaweme.