Abalumendo 4 Mu Babiloni

IMFUMU Nebukadnesari yasendele abena Israele bonse abasambilile sana ku Babiloni. Pa numa, imfumu yasalilepo abaume abali abasuma kabili abacenjela pali bonse. Pabo imfumu yasalile pali na balumendo 4 abo ulemona pa cikope. Umo ni Daniele, e lyo aba bambi batatu, abena Babiloni balebeta ati Shadraki, Meshaki na Abednego.

Nebukadnesari alefwaya ukubasambilisha pa kuti balebombela pa ng’anda ya mfumu. Pa numa ya kubasambilisha pa myaka itatu, asalilepo abalumendo abacenjele sana pa kuti balemwafwa nga kwaba amafya. Imfumu yalefwaya abalumendo ukuba abakosa sana ilyo balesambilila. E ico yaebele ababomfi bakwe ukulapeela abalumendo bonse ifya kulya ifisuma sana e lyo no mwangashi ifyo yena no lupwa lwa iko balelya.

Mona Daniele pa cikope. Bushe nawishiba ico ale-eba Ashipenasi, umukalamba wa babomfi ba kwa Nebukadnesari? Alemweba ati talefwaya ukulalya ifya kulya ifyanona ifyalefuma ku mfumu. Lelo Ashipenasi alisakamene. Amwebele ati: ‘Imfumu e ilandile ifyo mufwile ukulalya no kunwa. Kabili nga tauli no mubili uusuma nga abalumendo bambi, imfumu ikanjipaya.’

E ico Daniele aile ku o Ashipenasi apeele umulimo wa kumusunga na banankwe batatu. Amwebele ati: ‘Esheni ukulatupeela fye umusalu na menshi ya kunwa pa nshiku 10. E lyo pa numa mukatulinganye na balumendo bambi aba kulalya ifya kulya fya mfumu, no kumona abakamoneka bwino.’

Uwalebasunga alisumine. Na pa numa ya nshiku 10, Daniele na banankwe batatu bali abakosa sana ne mibili yabo yali iisuma ukucila abalumendo bambi. E ico uwalebasunga alekele Daniele na banankwe ukutwalilila ukulya umusalu mu nshita ya kulalya ifyo imfumu yalebapeela.

Pa numa ya myaka itatu abalumendo balibatwele ku mfumu Nebukadnesari. Pa numa ya kulanshanya na bo bonse, imfumu yasangile ukuti Daniele na banankwe batatu e bali abacenjela sana. E ico e bo yasalile ukulabombela ku ng’anda yakwe. Kabili lyonse imfumu nga yaipusha Daniele, Shadraki, Meshaki, na Abednego ifipusho, nelyo yabeba ubwafya ubukulu, baleyasuka bwino sana kabili baleishiba sana ifya kupwisha ubwafya ukucila bashimapepo ba mfumu nelyo aba mano ba iko.