Ifyo Yesu Alesambilisha Abantu

BUSHIKU bumo Yesu aebele umwaume umo ukuti alingile ukutemwa umunankwe. Umwaume aipwishe Yesu ati: ‘Ngo munandi nani?’ Yesu alishibe ifyo ulya muntu aletontonkanya. Ulya umwaume alemona kwati abanankwe fye, bantu ba mu mutundu wakwe e lyo na bo alepepa nabo. Kanshi natumone ifyo Yesu amwebele.

Limo pa kusambilisha abantu, Yesu alebashimikila amalyashi. Kabili ifi fine e fyo acitile na apa. Ashimikile ulya umwaume ilyashi pa muYuda no mwina Samaria. Twalisambililepo ukuti abaYuda na bena Samaria tabalaeumfwana. Umfwa ilyashi ilyo Yesu amushimikile.

Bushiku bumo kwali umuYuda uwale-enda mu musebo uwapita mu mbali ya lupili ninshi aleya ku Yeriko. Lelo ifipondo fyalimwikete. Kabili fyasendele indalama shakwe no kumupuma mpaka aba mupepi no kufwa.

Pa numa, shimapepo umuYuda apitile muli uyu musebo no kumona umuntu nalaala mu musebo ninshi nabamupuma. Cinshi acitile? Aile fye ku lubali lumbi ulwa musebo no kupita apita. Lyena kwaishile umuntu na umbi uwali kapepa. Ali mwina Lebi. Bushe ali-iminina? Awe taiminiine ukuti afwe ulya muntu baumine. Shimapepo no mwina Lebi e aba baleya mu musebo.

Nomba mona uuli no uyu muntu baumine. Mwina Samaria. E uleafwa umuYuda. Alemubika umuti pa cilonda. Pa numa asendele uyu umuYuda no kumutwala uko engatuusha bwino.

Ilyo apwishishe ukushimika ili ilyashi, Yesu aebele umwaume uwamwipwishe cilya cipusho ati: ‘Bushe ni nani pali aba batatu uwali umunankwe wa mwaume bapumine? Bushe ni shimapepo, nangu mwina Lebi nelyo mwina Samaria?’

Umwaume ayaswike ati: ‘Mwina Samaria. E wayafwile umwaume uo bapumine.’

Yesu atile: ‘Wayasuka bwino. Ifi fine e fyo ulecita ku bantu bambi.’

Bushe taulesumina ukuti Yesu alesambilisha bwino? Kuti twasambilila ifintu ifingi sana nga tulekutika ku fyo Yesu atweba mu Baibolo, bushe te ifyo?