Timote Atendeka Ukwafwa Paulo

UYU umulumendo ulemona uuli na Paulo ni Timote. Timote aleikala no lupwa lwakwe ku Lustra. Banyina bali ni ba Yunike, e lyo banakulu bali ni ba Loisi.

Uyu wali muku wa butatu uo Paulo aile ku Lustra ninshi palipita umwaka umo ukutula apo Paulo na Barnaba bailiile ku Lustra umuku wa kubalilapo. Apa Paulo no munankwe Sila ninshi nababwelela ku Lustra na kabili.

Bushe nawishiba ifyo Paulo ale-eba Timote? Alemwipusha ati: ‘Bushe kuti watemwa ukuya na ine na Sila pa kuti tuleshimikila nobe mu fifulo fya kutali?’

Timote ayaswike ati: ‘Ee, kuti natemwa ukukonka.’ Tapakokwele, Timote ashile ulupwa lwakwe no kuya na Paulo na Sila. Lelo ilyo tatulalanda pa lwendo lwabo, natubale tulande pa fyacitike kuli Paulo. Ilyo asendele Timote, ninshi palipita imyaka 17 ukutula apo Yesu amonekele kuli ena pa musebo waya ku Damaseke.

Ibukisha ukuti, Paulo aile ku Damaseke ku kucusha abasambi ba kwa Yesu, lelo iyi inshita ali ku Lustra ninshi na o musambi! Ilyo ali umusambi, abalwani bafwaile ukumwipaya pantu tabatemenwe ifyo alesambilisha pali Yesu. Lelo abasambi balyafwile Paulo ukubutuka. Bamubikile mu museke no kumufumisha ku nse ya musumba.

Pa numa Paulo aile ku Antioke ku kushimikila. Ku Antioke e ko abasambi ba kwa Yesu babalilepo ukulaitwa ati Abena Kristu. Paulo na Barnaba balibatumine ukufuma ku Antioke ukuya ku fyalo fya kutali ku kushimikila. Umusumba umo uo baileko ni Lustra, ukwaleikala Timote.

Nomba pa numa ya mwaka umo, Paulo alibwelelemo ku Lustra pa lwendo lwa bubili. Bushe walishiba uko Paulo na Sila baile ilyo Timote abakonkele? Lolesha pali mapu pa kuti umone ififulo fimo fimo uko baile.

Babalilepo ukuya ku Ikonia, umusumba uwali fye mupepi e lyo baya ku Antioke. Lyena baile ku Troa, e lyo baya na ku Filipi, na ku Tesalonika e lyo na ku Berea. Bushe nau-umona umusumba wa Atena pa mapu? Paulo alishimikilemo. Na pa numa, baikele umwaka umo na hafu mu Korinti baleshimikila. Na mu kulekelesha baliminineko panono mu Efese. E lyo babwelela ku Kaisarea no bwato no kuya ku Antioke, uko Paulo aleikala.

E ico Timote alyendele mu fifulo ifingi mu kwafwa Paulo ukushimikila “imbila nsuma” no kutendeka ifilonganino fya Bwina Kristu ifingi. Bushe nga wakula ukaba umubomfi wa kwa Lesa uwa cishinka nga Timote?