Bakasesema ba Bufi

Ubulondoloshi: Abantu umo umo na mateyanyo ayabilisha ubukombe ubo basoso kuti bufuma ku ntulo yacile cifyalilwa lelo ubushifuma kuli Lesa wa cine kabili ubushumfwana no kufwaya kwakwe ukwasokololwa.

Ni shani fintu bakasesema ba cine na ba bufi bengeshibikwa?

Bakasesema ba cine beshibisha icitetekelo cabo muli Yesu, lelo ifingi filafwaikwa ukucila pa kutunga ukushimikila mwi shina lyakwe

1 Yoh. 4:1-3: “Mulelinge mipashi, mwishibe nga yafuma kuli Lesa; ico bakasesema wa bufi abengi nabafumina pano isonde. E mo kuti mwaishibilo mupashi wa kwa Lesa; umupashi onse uusumino kuti Yesu Kristu naisa mu mubili, e wa kwa Lesa; no mupashi onse uushisumina Yesu te wa kwa Lesa iyo.”

Mat. 7:21-23: “Te onse uutila kuli ine, Shikulu, Shikulu, akengila mu bufumu bwa mu mulu iyo; kano uucite cifwaya Tata wa mu mulu. Abengi muli bulya bushiku bakatila kuli ine, Mwe Shikulu, mwe Shikulu, bushe tatwasesemene mwi shina lyenu? . . . E lyo nkasosa kuli bene, nkatila, Nshamwishiba nakalya; fumeni apa, mwe bacita amampuulu.”

Bakasesema ba cine balandila mwi shina lya kwa Lesa, lelo ukutunga fye ukumwimininako takwakumanina

Amala. 18:18-20: “Nkabemisha kasesema uwa muli bamunyinabo, uwaba nga iwe; kabili nkabike fyebo fyandi mu kanwa kakwe, na o akasosa kuli bene conse ico nkamweba. Nomba, umuntu uukaano kuumfwa ku fyebo fyandi ifyo akasosela mwi shina lyandi ine nkamulubulwishapo. Lelo kasesema uwatusaukilo kusosela mwi shina lyandi icebo ico nshimwebele ukusosa, napamo uukasosela mwi shina lya milungu imbi, akafwe uyo kasesema.” (Linganyako Yeremia 14:14; 28:11, 15.)

Yesu asosele ukuti: “Nshicita kantu neka nangu kamo, lelo nanda ifi fintu nge fyo Tata ansambilishe.” (Yoh. 8:28) Asosele ukuti: “Naishila mwi shina lya kwa Tata.” (Yoh. 5:43) Yesu na kabili asosele ukuti: “Uusose fyafuma mu mwine, ninshi bukata bwakwe afwaya.—Yoh. 7:18.

Nga ca kuti abantu abali bonse umo umo nelyo amateyanyo batunga ukwimininako Lesa lelo balakaana ukubomfya ishina lya pa lwakwe ilya kwa Lesa, kabili bacicite cibelesho ukulumbulula amatontonkanyo yabo pa lwa milandu, bushe balelinga kuli uyu mulingo wacindama uwa kwa kasesema wa cine?

Amaka ya kucite “fishibilo fikalamba,” nelyo “ifisungusho,” mu kufwaikwa te bushininkisho bwa kwa kasesema wa cine

Mat. 24:24: “Bakasesema wa bufi bakema, no kulange fishibilo fikalamba [“ifisungusho,” TEV] ne fya kupapa; ifya kuti balufye na basalwa bene, nga cabe cingacitwa.”

2 Tes. 2:9, 10: “Mupulumushi ukwisa kwakwe kwabelo mwalolo kubomba kwa kwa Satana, mu maka yonse ne fishibilo ne fipesha amano fya bufi, kabili mu longolo lonse lwa kuulungana ku baleonaika; pantu bakaano kupokelelo kutemwe Cine no kupusukilamo.”

Pa lubali lumbi, Mose acitile ifisungusho pa kutungulula kwa kwa Yehova. (Ukufu. 4:1-9) Yehova na kabili apeele Yesu amaka ya kucite fisungusho. (Imil. 2:22) Lelo ifyacila pa fisungusho fyapeele ubushininkisho bwa kuti Lesa mu cine cine alibatumine.

Cintu bakasesema ba cine basobela cilacitika, lelo pambi te kuti bomfwikishe inshita na fintu cikaba

Dan. 12:9: “Kabiye, we Daniele; pantu ifyebo ifi fyalikakwa kabili fyalikomenenwa ukufika pa nshita ya ku mpela.”

1 Pet. 1:10, 11: “Bakasesema, . . . balesapiko kuti ni ku nshita nshi nalimo ku musango nshi umupashi wa kwa Kristu uwali muli bene walesontelako kabela ifya kucula fya kwa Kristu, ne fya bukata ifikakonkapo pali ifyo.”

1 Kor. 13:9, 10: “Twaishibako fye lubali, kabili tusesemako fye lubali; lelo ilyo icafikapo cikesa, ica lubali fye cikafubalishiwa.”

Amapi. 4:18: “Inshila ya balungami yaba ngo lubuuto ulwabalika, ululeya no kubuuta kasuka akasuba kasaama.”

Abatumwa na basambi ba bwina Kristu bambi aba mu kubangilila balikwete ukwenekela kumo ukwalubana, lelo Baibolo taibabika mwi bumba lya “bakasesema wa bufi.”—Mona Luka 19:11; Yohane 21:22, 23; Imilimo 1:6, 7.

Natani kasesema akoseleshe Imfumu Davidi ukutwalilila ne cali mu mutima wakwe ukukuma ku kukuula iŋanda ya kupepelamo Yehova. Lelo pa numa Yehova aebele Natani ukweba Davidi ukuti te wali no kuikuula. Yehova takeene Natani pa cintu asosele mu kubangilila lelo alitwalilile ukumubomfya pa mulandu wa kuti mu kuicefya alilungike umulandu lintu Yehova acilengele ukumfwikwa kuli wene.—1 Imila. 17:1-4, 15.

Ukulanda kwa kwa kasesema wa cine kutwala pa ntanshi ukupepa kwa cine kabili kumfwana no kufwaya kwasokololwa ukwa kwa Lesa

Amala. 13:1-4: “Nga aima mu kati ka imwe kasesema napamo uulote filoto, no kumupeele cishibilo napamo ica kupapa, kabili caisacitika icishibilo ico napamo ica kupapa ico asosele kuli imwe; nga atila Natuye tukonke imilungu imbi (iyo mushaishibe), no kuibombela; mwikomfwa ku fyebo fya kwa kasesema uyo napamo ku ulote filoto; pantu Yehova Lesa wenu alemwesha ku kwishiba nga muli abatemwa Yehova Lesa wenu imitima yenu yonse ne myeo yenu yonse. Yehova Lesa wenu e o mukalekonka, kabili wene e o mukaletiina, kabili amafunde yakwe e yo mukalebaka, ne shiwi lyakwe e lyo mukaleumfwa, kabili e o mukalebombela, na kuli wene e ko mukalelambatila.”

Apantu Baibolo isoso kuti ‘cibusa wa calo’ mulwani kuli Lesa, bushe bashibutotelo abacincisha abantu babo ukuibimba mu milandu ya calo balalundulula ukupepa kwa cine? (Yako. 4:4; 1 Yoh. 2:15-17) Lesa wa cine asosele ukuti inko “shikeshibo kuti ni ne Yehova,” kabili Baibolo ilondololo kuti Lesa aali no kufumya mu nko “abantu ba pe shina lyakwe,” lelo bushe amateyanyo ya butotelo ayacefya ukucindama kwa kubomfya ishina lya pa lwakwe ilya kwa Lesa balebomba mu kumfwana no kufwaya kwa kwa Lesa ukwasokololwa? (Esek. 38:23; Imil. 15:14, NW) Yesu asambilishe abakonshi bakwe ukupepela ubufumu bwa kwa Lesa, kabili Baibolo isoka pa lwa kubika ukutetekela kwa umo mu muntunse, e co bushe bashibutotelo nelyo amateyanyo ya bupolitiki ayacincisha abantu ukubika ukutetekela kwabo mu mitekele ya buntunse ni bakasesema ba cine?—Mat. 6:9, 10; Amalu. 146:3-6; linganyako Ukusokolola 16:13, 14.

Bakasesema ba cine na ba bufi kuti baishibikilwa ku fisabo fimoneka mu bumi bwabo no bumi bwa abo ababakonka

Mat. 7:15-20: “Cenjeleni kuli bakasesema wa bufi, abeshila kuli imwe mu fya kufwala fya mpaanga, lelo mu kati mimbuulu ya kutaakanya. Mukabeshibila ku fisabo fyabo; . . . umuti onse uusuma utwale fisabo fisuma, lelo umuti uwa fye utwale fisabo fyabipa. . . . Awe mukabeshibila ku fisabo fyabo.”

Finshi fishibisha inshila yabo iya bumi? “Imilimo ya bumubili . . . ni yi, ubulalelale, ukukowela, bucilende, ukupepo tulubi, ubuloshi, ulupato, ifikansa, akalumwa, icipyu, akafindwe, akapaatulula, bucaibela, akaso, ukukolwakolwa, iciwowo, ne fyalingana ne fi. . . . abalecite fyabe fi tabakapyane ubufumu bwa kwa Lesa. Lelo ifisabo fya mupashi kutemwa, ukusekelela, umutende, ukutekanya, icongwe, ubusuma, icishinka, ukunakilila, ukuteko mutima.”—Gal. 5:19-23; mona na kabili 2 Petro 2:1-3.

Bushe Inte sha kwa Yehova tabapanga filubo mu kusambilisha kwabo?

Inte sha kwa Yehova tabaitunga ukuba bakasesema bapuutwamo. Balipanga ifilubo. Ukupala abatumwa ba kwa Yesu Kristu, pa nshita shimo balikwete ukwenekela kwalubana.—Luka 19:11; Imil. 1:6.

Amalembo yapayanya ifya kusangwilako fya nshita ifyakuma ku kubapo kwa kwa Kristu, kabili Inte sha kwa Yehova balisambilila ifi mu kuba no kwenekela kwaswatuka. (Luka 21:24; Dan. 4:10-17) Yesu na kabili alondolwele icishibilo ca mbali ishingi icali no kulundanishiwa ne nshita ya kufikilishiwa kwa masesemo ku kwishibisha inkulo iyali no kuba iya mweo ku kumona impela ya micitile ibifi iya fintu iya kwa Satana. (Luka 21:7-36) Inte sha kwa Yehova balisonta ku bushininkisho mu kufikilishiwa kwa ici cishibilo. Cili ica cine ukuti Inte shalipanga ifilubo mu kumfwikisha kwabo ukwa caali no kucitika pa mpela ya fiputulwa fimo ifya nshita, lelo tabapanga cilubo ca kulufya icitetekelo nelyo ukuleka ukuba abalola ukukuma ku kufikilishiwa kwa mifwaile ya kwa Yehova. Balitwalilila ukubika pa ntanshi mu kutontonkanya kwabo ukufunda kwapeelwe na Yesu ukwa kuti: “E ico, loleni, pa kuti tamwaishibo bushiku Shikulwinwe akesamo.”—Mat. 24:42.

Imilandu iyo ukulungikwa kwa mimwene kwabo kwakabilwa mu kulinganishiwako yaba inono lintu yalinganishiwa ku cine cakatama ica mu Baibolo ico bailuka no kusabankanya. Pa kati ka ici paba ifyakonkapo: Yehova ni Lesa eka uwa cine. Yesu Kristu taba ulubali lwa bulesa butatu lelo aba Mwana wafyalwa eka uwa kwa Lesa. Ukulubulwa ukufuma ku lubembu kuti kwabako fye ukupitila mu citetekelo ca mwi lambo lya cilubula ilya kwa Kristu. Umupashi wa mushilo te muntu lelo maka yabomba aya kwa Yehova, kabili ifisabo fya uko fifwile ukumoneka mu bumi bwa bakapepa ba cine. Umweo wa buntunse tauli umunshifwa, nga fintu abasenshi ba pa kale batungile; ulafwa, kabili isubilo lya bumi bwa nshita ya ku ntanshi lyaba mu kubuushiwa. Ukusuminisha kwa kwa Lesa ukwa bubifi kwaba pa mulandu wa fikansa fya bumulopwe bwa mu kubumbwa konse. Ubufumu bwa kwa Lesa e subilo lyeka ilya mutundu wa muntu. Ukutula 1914 twaikala mu nshiku sha kulekelesha isha micitile ibifi iya fintu iya mu cibulungwa. Abena Kristu ba busumino 144,000 fye e bakaba ishamfumu na bashimapepo pamo na Kristu mu mulu, ilintu abashala aba mutundu wa muntu uwa cumfwila bakapokelela ubumi bwa muyayaya pe sonde lya paradise.

Ica kusangwilako cimbi ica kulanguluka ukukuma ku kusambilisha kwa Nte sha kwa Yehova ni ici: Bushe uku kwalisumbula abantu mu mibele isuma? Bushe abo bekatilila kuli ifi fisambilisho baba abapulamo mu mekalo yabo pa mulandu wa bufumacumi bwabo? Bushe ubumi bwabo ubwa lupwa bulasongwa mu kumwenamo pa kubomfya ifi fisambilisho? Yesu asosele ukuti abasambi bakwe baali no kwishibikwa mu kwanguka pa mulandu wa kukwata ukutemwa pa kati kabo. (Yoh. 13:35) Bushe iyi mibele yalibe yapulamo pa kati ka Nte sha kwa Yehova? Tuleke fishinka ifiine ukuilandila.

Nga Umo Asoso Kuti—

‘Minisita wandi asosele ukuti Inte sha kwa Yehova e bakasesema wa bufi’

Pambi kuti wayasuko kuti: ‘Bushe kuti naipushako, Bushe alimulangile icili conse muli Baibolo icilondolola ico twasuminamo nelyo ukucita kabili icisosa ukuti abantu aba uyu musango ni bakasesema ba bufi? . . . Bushe kuti namulanga ifyo Baibolo ilondolola bakasesema wa bufi? (Lyene bomfya cimo nelyo ifyafulilako ifya fishinka fitantikwe pa mabula 72-75.)’

Nelyo kuti wasoso kuti: ‘Ndi uwashininkisha ukuti mulesumina ifyo ubushinino bwa kulungatika bulingile ukwafwilisha ukupeelo mulandu kwabipisha ukwa musango yo. Bushe minisita wenu alilondolwele ifya kumwenako ifili fyonse ifya kulungatika? (Nga ca kuti mwine ŋanda alosha ku “kusobela” kwatunganishiwa kumo ukushacitike, bomfya ifyebo pe bula 73, no kufuma pa nshi ye bula 74 ukufika pa mulu wa 76.)’

Ukucitikako kumbi: ‘Ndi uwashininkisha ukuti nga ca kuti umuntu umo amupeele umulandu wapalako, kuti mwapokelela ishuko lya mu nshita mu kucefyako ilya kulondolola icifulo cenu nelyo imimwene, bushe te ifyo? . . . E co bushe kuti namulanga ukufuma muli Baibolo . . .?’