Isonde Likaba Paradaise

Yehova akafumyapo fyonse ifyabipa ifyo Satana acita. Yehova alilenga Yesu ukuba Imfumu pe sonde lyonse. Ilyo Yesu akalateka isonde, akalilenga ukuba paradaise.—Daniele 7:13, 14; Luka 23:43.

Yehova alilaya ifi fintu:

• IFYA KULYA FIKAFULA: “Isonde likamesha ifilimwa fya liko; Lesa, Lesa wesu, akatupaala.” “Ingano shikafula nga nshi pano isonde; Pa muulu wa mpili shikafula icine cine.”—Amalumbo 67:6; 72:16.

• INKONDO IKAPWA: “Iseni, moneni imilimo ya kwa Yehova, Ifyo acita ifipesha amano pano isonde. Alelenga inkondo ukupwa ukufika ku mpela sha pano isonde.”—Amalumbo 46:8, 9.

• TAKWAKABE ABANTU ABACITA IFYABIPA: “Pantu incitatubi shikaloba . . . Pashala fye panono no mubifi takabepo; Awe ukalolekesha apo aali, no kusanga talipo.”—Amalumbo 37:9, 10.

• 

  TAKWAKABE UKULWALA, UKULOOSHA NELYO UKUFWA: “Pali iyo nshita amenso ya mpofu yakamona, na matwi ya bankomamatwi yakakomonwa. Pali iyo nshita uwalemana amolu akacilauka nge nsebula, kabili ululimi lwa kwa cibulu lukaula akapundu.”—Esaya 35:5, 6.

  “Na Lesa umwine akaba pamo na bo. Kabili akafuuta ifilamba fyonse ku menso yabo, ne mfwa tayakabeko na kabili, takwakabe no kuloosha nangu ukuteta nangu ukukalipwa na kabili. Ifya ntanshi nafiya.”—Ukusokolola 21:3, 4.

Yehova tabepa nga filya Satana ne fibanda fyakwe babepa. Fyonse ifyo alaya fifwile ukucitika. (Luka 1:36, 37) Yehova alimutemwa kabili afwaya ukuti mukekale muli Paradaise iyo akaleta. Kanshi kuti mwaeba Inte sha kwa Yehova nga mulefwaya ukusambilila icine icaba mu Cebo ca kwa Lesa. Nga mulebomfya ifyo bakalamusambilisha mu bumi bwenu, mukaba abantungwa ku fisambilisho fya bufi, ku mipashi yabipa kabili mukeshiba icine. Mu kuya kwa nshita, mukalubuka na ku lubembu ne mfwa, nga filya Yesu alandile ukuti: “Mukeshiba icine, ne cine cikamulenga ukuba abantungwa.”—Yohane 8:32.