Isambililo 1

Ifyo Wingeshiba Ico Lesa Afwaya

Fyebo nshi ifyacindama ifisangwa mu Baibolo? (1)

Nani katendeka wa Baibolo? (2)

Mulandu nshi untu ulingile ukusambilila Baibolo? (3)

1. Baibolo yaba bupe bwaumo mutengo ukufuma kuli Lesa. Yaba kwati ni kalata uyo wishi wa kutemwa alembela abana bakwe. Itweba icine pa lwa kwa Lesa—untu aaba na cintu afwaya. Ilondolola ifya kupwisha amafya ne fya kusanga insansa sha cine cine. Ni Baibolo fye yeka e itweba ico tufwile ukucita pa kuteemuna Lesa.—Ilumbo 1:1-3; Esaya 48:17, 18.

2. Baibolo yalembelwe na bantu bapusanapusana mupepi na 40 pa ciputulwa ca nshita ica myaka ukucila 1,600, ukutendeka mu 1513 B.C.E. Yapangwa na mabuuku yanono 66. Abalembele Baibolo balipuutilwemo kuli Lesa. Balembele amatontonkanyo yakwe, te matontonkanyo yabo abene. E co Lesa mu muulu, e Katendeka wa Baibolo, te muntunse uuli onse pe sonde.—2 Timote 3:16, 17; 2 Petro 1:20, 21.

3. Lesa ashininkishe ukuti Baibolo yalikopolwelwe mu kulungika kabili no kusungililwa bwino bwino. AmaBaibolo yafulilako yalipulintwa ukucila icitabo icili conse cimbi. Te bantu bonse bakatemwa ukukumona ulesambilila Baibolo, lelo wileka ico cikucilikile. Inshita yobe iya ku ntanshi iya ciyayaya yashintilila pa kwishiba Lesa no kucito kufwaya kwakwe te mulandu no kukaanya ukuli konse.—Mateo 5:10-12; Yohane 17:3.