Isambililo 2

Lesa Nani?

Lesa wa cine nani, kabili nani ishina lyakwe? (1, 2)

Musango nshi uwa mubili akwata? (3)

Mibele nshi akwata iyapulamo? (4)

Bushe tulingile ukubomfya ifilubi ne fipasho pa kumupepa? (5)

Ni mu nshila nshi shibili twingeshibilamo Lesa? (6)

1. Abantu bapepa ifintu ifingi. Lelo Baibolo itwebo kuti kwabako fye Lesa WA CINE umo. E wabumbile fyonse ifyaba mu muulu na pano isonde. Pa mulandu wa kuti e watupeele ubumi, e Untu tufwile fye ukupepa.—1 Abena Korinti 8:5, 6; Ukusokolola 4:11.

2. Lesa alikwata amalumbo ayengi lelo akwata fye ishina limo. Ilyo ishina ni YEHOVA. Mu maBaibolo ayengi, ishina lya kwa Lesa lyalifumishiwamo no kupyanikwapo na malumbo SHIKULU nelyo LESA. Lelo lintu Baibolo yalembelwe, ishina Yehova e mo lyali ukufika ku miku mupepi na 7,000!—Ukufuma 3:15; Ilumbo 83:18.

3. Yehova alikwata umubili, lelo tawaba ngo wesu. “Lesa Mupashi,” e fisosa Baibolo. (Yohane 4:24) Umupashi musango wa bumi ubwacilapo nga nshi pa bumi bwesu. Takwatala akubako umuntu uwamona Lesa. Yehova ekala mu muulu, lelo kuti amona ifintu fyonse. (Ilumbo 11:4, 5; Yohane 1:18) Nangu ni fyo, cinshi caba umupashi wa mushilo? Te muntu ukupala Lesa. Ukucila, waba maka yabomba aya kwa Lesa.—Ilumbo 104:30.

4. Baibolo ilatusokolwela imibele ya kwa Yehova. Ilangisha ukuti imibele yakwe iyapulamo kutemwa, ubupingushi, amano, na maka. (Amalango 32:4; Yobo 12:13; Esaya 40:26; 1 Yohane 4:8) Baibolo ilatweba ukuti aliba na kabili uwa nkumbu, uwa cikuuku, uulekelela, kapekape, kabili uwatekanya. Ifwe, ukupala abana ba cumfwila, tulingile ukwesha ukumupashanya.—Abena Efese 5:1, 2.

5. Bushe tulingile ukukontamina nelyo ukushinshimuna ifilubi, ifikope, nelyo ifipasho mu kupepa kwesu? Iyo! (Ukufuma 20:4, 5) Yehova atila tufwile ukupepa fye wene eka. Ubukata bwakwe tabupeela ku uuli onse nelyo ku cili conse cimbi. Ifilubi tafyakwata amaka ya kutwaafwa.—Ilumbo 115:4-8; Esaya 42:8.

6. Ni shani fintu twingeshiba Lesa mu kuwaminako? Inshila imo ni pa kumona ifintu aabumba no kwetetula mu kushika pa fyo fitusambilisha. Ububumbo bwa kwa Lesa butulanga ukuti alikwata amaka ayengi na mano. Tulamona ukutemwa kwakwe muli conse ico apanga. (Ilumbo 19:1-6; Abena Roma 1:20) Inshila na imbi twingeshibilamo Lesa ni pa kusambilila Baibolo. Muli yene alatweba ifyafulilako pa lwa musango wa kwa Lesa untu aaba. Na kabili alatweba pa lwa mifwaile yakwe na cintu afwaya ifwe ukucita.—Amose 3:7; 2 Timote 3:16, 17.

[Ifikope pe bula 5]

Tusambilila pa lwa kwa Lesa ukufuma ku bubumbo no kufuma muli Baibolo