Isambililo 3
Yesu Kristu Nani?
Mulandu nshi Yesu etilwa Umwana mwaume ‘ibeli’ lya kwa Lesa? (1)
Mulandu nshi etilwa “Cebo”? (1)
Mulandu nshi Yesu aishile kwi sonde mu buntu? (2-4)
Mulandu nshi acitiile ifipesha amano? (5)
Cinshi cintu Yesu akacita ku nshita ya ku ntanshi iipalamishe? (6)
1. Yesu aaleikala ku muulu ngo muntu wa mupashi ilyo ashilaisa kwi sonde. Aali e cibumbwa ca ntanshi ica kwa Lesa, na muli fyo etwa Umwana mwaume ‘ibeli’ lya kwa Lesa. (Abena Kolose 1:15; Ukusokolola 3:14) Yesu e Mwana fye eka uyo Lesa aibumbiile umwine. Yehova abomfeshe Yesu ilyo ashilaba umuntunse pamo nga “kabomba munankwe” mu kubumba ifintu fyonse fimbi mu muulu na pe sonde. (Amapinda 8:22-31, NW; Abena Kolose 1:16, 17) Lesa na kabili amubomfeshe ngo wa kulandilamo Wakwe umukalamba. E mulandu wine Yesu etilwa “Cebo.”—Yohane 1:1-3; Ukusokolola 19:13.
2. Lesa atumine Umwana Wakwe kwi sonde pa kukuushisha ubumi bwakwe mwi fumo lya kwa Maria. E co Yesu takwete wishi umuntunse. E mulandu wine ashapyanineko ulubembu ululi lonse nelyo ukukanapwililika. Lesa atumine Yesu kwi sonde pa milandu itatu: (1) Ku kutusambilisha icine pa lwa kwa Lesa (Yohane 18:37), (2) ku kusungilila bumpomfu bwapwililika, ukutupayanishisha icipasho ca kukonka (1 Petro 2:21), na (3) ku kupeela umweo wakwe bulilambo pa kutulubula ku lubembu ne mfwa. Mulandu nshi ici cakabilwe?—Mateo 20:28.
3. Pa kukanaumfwila ifunde lya kwa Lesa, umuntu wa ntanshi, Adamu, acitile ico Baibolo ita “ulubembu.” E co Lesa amupingwilile ukufwa. (Ukutendeka 3:17-19) Nomba alipelebele ukufika ku fipimo fya kwa Lesa, e co taali uwapwililika na kabili. Panono panono alikotele no kufwa. Adamu apishishe ulubembu ku bana bakwe bonse. E mulandu wine na ifwe tukotela, ukulwala, no kufwa. Ni shani fintu umutundu wa muntu wingapusushiwa?—Abena Roma 3:23; 5:12.
4. Yesu aali muntunse wapwililika kwati fye ni Adamu. Nangu cibe fyo, ukukanapala Adamu, Yesu aali uwa cumfwila nga nshi kuli Lesa nangu fye ni lintu alepita mu bwesho bwakulisha. E co kanshi alifikilepo ukupeela bulilambo ubumi bwakwe ubwa buntunse ubwapwililika ku kulipila ulubembu lwa kwa Adamu. Ici e co Baibolo iloshako nga “icilubula.” Abana ba kwa Adamu muli fyo baali no kulubulwa ukufuma ku bupingushi bwa mfwa. Bonse abacetekela Yesu kuti balekelelwa imembu shabo no kupokelela umweo wa muyayaya.—1 Timote 2:5, 6; Yohane 3:16; Abena Roma 5:18, 19.
5. Lintu aali pe sonde Yesu aundepe abalwala, aliishishe abaali ne nsala, kabili atalalike amabimbi. Abuushishe fye na bafwa. Mulandu nshi acitiile ifipesha amano? (1) Aikatilwe abantu balecula inkumbu, kabili alefwaya ukubaafwa. (2) Ifipesha amano fyakwe fyashinine ukuti aali Mwana wa kwa Lesa. (3) Fyalangishe ico akacitila umutundu wa muntu uwa cumfwila lintu akateka isonde nge Mfumu.—Mateo 14:14; Marko 2:10-12; Yohane 5:28, 29.
6. Yesu alifwile no kubuushiwa kuli Lesa nge cibumbwa ca mupashi, kabili abwelele ku muulu. (1 Petro 3:18) Mu kupita kwa nshita, Lesa alimucita Imfumu. Nomba line fye Yesu akafumyapo ububifi bonse no kucula pano isonde.—Ilumbo 37:9-11; Amapinda 2:21, 22.
[Ifikope pe bula 7]
Ubutumikishi bwa kwa Yesu bwasanshishemo ukusambilisha, ukucite ifipesha amano, no kupeela fye ubumi bwakwe pa mulandu wesu