Isambililo 5

Cinshi Caba Imifwaile ya kwa Lesa kwi Sonde?

Mulandu nshi Yehova abumbile isonde? (1, 2)

Mulandu nshi isonde lishabela paradise pali nomba? (3)

Cinshi cikacitika ku babifi? (4)

Ku nshita ya ku ntanshi, cinshi cintu Yesu akacitila abalwala? abakoloci? abafwa? (5, 6)

Pa kwisaipakishako amapaalo ya ku ntanshi, cinshi ulekabila ukucita? (7)

1. Yehova abumbile lino isonde pa kuti abantunse bengaipakisha ukwikala muli lyene kuli pe na pe. Afwaile isonde ukwikalwamo lyonse na bantu balungama, aba nsansa. (Ilumbo 115:16; Esaya 45:18) Isonde talyakabale alyonaulwa; likekalilila kuli pe na pe.—Ilumbo 104:5; Lukala Milandu 1:4.

2. Ilyo Lesa ashilabumba umuntu, Asalile ulubali lwe sonde lumo ulunono no kulucita paradise wayemba. Alwinike ibala lya Edene. Ni umu e mo abikile umwaume wa ntanshi no mwanakashi, Adamu na Efa. Imifwaile ya kwa Lesa yali ya kuti bakwate abana no kwisushe sonde lyonse. Mu kuya kwa nshita nga balilengele isonde lyonse ukuba paradise.—Ukutendeka 1:28; 2:8, 15.

3. Adamu na Efa balibembwike pa kutoba ifunde lya kwa Lesa ku mufulo. E co Yehova alibatamfishe mwi bala lya Edene. Paradise alilubile. (Ukutendeka 3:1-6, 23) Lelo Yehova talaba imifwaile yakwe kuli lino isonde. Alaya ukulisangula paradise, umo abantunse bakekala kuli pe na pe. Ni shani fintu akacite ci?—Ilumbo 37:29.

4. Ilyo lino isonde lishilaba paradise, ababifi bafwile ukufumishiwapo. (Ilumbo 37:38) Ici cikacitika pa Armagedone, icaba ni nkondo ya kwa Lesa iya kupwisha ububifi. Mu kukonkapo, Satana akakakwa pa myaka 1,000. Ici cilepilibula ukuti takuli ababifi abakashalako ku konaule sonde. Bantu ba kwa Lesa epela e bakapusunsuka.—Ukusokolola 16:14, 16; 20:1-3.

5. Lyene Yesu Kristu akateka nge Mfumu pe sonde pa myaka 1,000. (Ukusokolola 20:6) Panono panono akafumya ulubembu mu mintontonkanya yesu ne mibili. Tukaba abantunse bapwililika pamo fye nga fintu Adamu na Efa baali ilyo bashilabembuka. Lyene takwakabeko ukulwala na kabili, ubukote, ne mfwa. Abalwala bakondapwa, kabili abakote bakaba abaice na kabili.—Yobo 33:25; Esaya 33:24; Ukusokolola 21:3, 4.

6. Mu kati ka Kuteka kwa Myaka Ikana Limo ukwa kwa Yesu, abantunse ba busumino bakabombela pa kwalwila isonde lyonse muli paradise. (Luka 23:43) Na kabili, amamilioni ya bafwa bakabuushiwa ku kuba no bumi bwa buntunse pe sonde. (Imilimo 24:15) Nga bacita ico Lesa afwaya kuli bene, bakatwalilila ukwikala pe sonde kuli pe na pe. Nga tabacitile ico, bakonaulwa kuli pe na pe.—Yohane 5:28, 29; Ukusokolola 20:11-15.

7. Muli fyo imifwaile ya pa kutendekelako iya kwa Lesa kwi sonde ikatunguluka. Bushe kuti watemwa ukwisaipakishako aya mapaalo ya ku ntanshi? Nga ni fyo, ulekabila ukutwalilila ukusambilila pa lwa kwa Yehova no kumfwila ifyo afwaya. Ukusangwa ku kulongana pa Ŋanda ya Bufumu iya Nte sha kwa Yehova iyabela uko wikala kukakwaafwa ukucite co.—Esaya 11:9; AbaHebere 10:24, 25.

[Icikope pe bula 10]

Paradise alufiwa

[Ifikope pe bula 11]

Pa numa ya Armagedone, isonde likalengwa ukuba paradise