Isambililo 7

Ukupalamina Kuli Lesa mwi Pepo

Mulandu nshi cacindamina ukupepa lyonse? (1)

Ni kuli ani tulingile ukupepa, kabili mu nshila nshi? (2, 3)

Fintu nshi ifyalinga ukupepela? (4)

Ni lilali lintu ulingile ukupepa? (5, 6)

Bushe Lesa alakutika ku mapepo yonse? (7)

1. Ipepo kulanda kuli Lesa mu kuicefya. Ulingile ukupepa kuli Lesa lyonse. Mu kucite fyo ukayumfwa uwapalamisha kuli wene ukupala cibusa watemwikwa. Yehova alikulisha kabili alikwatisha amaka, nalyo line alakutika ku mapepo yesu! Bushe ulapepa kuli Lesa lyonse?—Ilumbo 65:2; 1 Abena Tesalonika 5:17.

2. Ipepo lyaba lubali lwa kupepa kwesu. E co, tulingile ukupepa kuli Lesa, Yehova epela. Lintu Yesu aali pe sonde, lyonse alepepa kuli Wishi, te kuli onse umbi. Tulingile ukucita cimo cine. (Mateo 4:10; 6:9) Nangu cibe fyo, amapepo yesu yonse yalingile ukupepelwa mwi shina lya kwa Yesu. Ici cilangilila ukuti twalicindika icifulo ca kwa Yesu no kuti twalikwata icitetekelo mwi lambo lyakwe ilya cilubula.—Yohane 14:6; 1 Yohane 2:1, 2.

3. Lintu tulepepa tulingile ukulanda kuli Lesa ukufuma pa nshi ya mutima wesu. Tatulingile ukusungila amapepo yesu ku mutwe nelyo ukubelenga yene ukufuma mu citabo ca mapepo. (Mateo 6:7, 8) Kuti twapepa mu mikalile iili yonse iyabamo mucinshi, pa nshita iili yonse, kabili pa cifulo icili conse. Lesa kuti aumfwa fye na mapepo ya mu mutalalila ayo tupepa mu mutima wesu. (1 Samwele 1:12, 13) Cili bwino ukuya ku cifulo ca mutalalila ukutaluka ku bantu bambi ilyo tulepepa amapepo ya pa lwesu.—Marko 1:35.

4. Fintu nshi wingapepela? Icili conse icingambukila bucibusa bobe na wene. (Abena Filipi 4:6, 7) Ipepo lya cilangililo lilangisha ukuti tulingile ukupepela ishina lya kwa Yehova ne mifwaile. Na kabili kuti twalomba ukuti tukwate ifikabilwa fya ku mubili, ukuti imembu shesu shilekelelwe, no kwaafwa ku kucimfya itunko. (Mateo 6:9-13) Amapepo yesu tayalingile ukuba aya bukaitemwe. Tulingile ukupepela fye ifintu ifileumfwana no kufwaya kwa kwa Lesa.—1 Yohane 5:14.

5. Kuti wapepa ilili lyonse lintu umutima obe wakukunta ukutasha Lesa nelyo ukumulumbanya. (1 Imilandu 29:10-13) Ulingile ukupepa lintu ukwete amafya kabili icitetekelo cobe cileeshiwa. (Ilumbo 55:22; 120:1) Caliba icalinga ukupepa ilyo ushilalya ica kulya cobe. (Mateo 14:19) Yehova atulaalika ukupepa “inshita shonse.”—Abena Efese 6:18.

6. Ukucilisha tukabila ukupepa nga ca kuti twacita ulubembu lwabipisha. Pali uto tushita tulingile ukupaapaata inkumbu sha kwa Yehova no kulekelelwa. Nga ca kuti twatumbula imembu shesu kuli wene no kubombesha ukufika apo twingapesha ukukanashibwekeshapo, Lesa ‘alalekelela.’—Ilumbo 86:5; Amapinda 28:13.

7. Yehova akutika fye amapepo ya balungami. Pa kuti amapepo yobe yengomfwika kuli Lesa, ufwile ukwesha apo wingapesha ukwikalilila ku mafunde yakwe. (Amapinda 15:29; 28:9) Ufwile ukuba uwaicefya ilyo ulepepa. (Luka 18:9-14) Ulekabila ukubomba mu kumfwana ne co ulepepela. Muli fyo ukashinina ukuti walikwata icitetekelo no kuti mu cituntulu ulefwaisha ico ulepepela. E lyeka fye lintu Yehova akaasuka amapepo yobe.—AbaHebere 11:6.