Isambililo 8

Ubumi bwa Lupwa Ubuteemuna Lesa

Cinshi caba icifulo ca mulume mu lupwa? (1)

Ni shani fintu umulume alingile ukusunga umukashi wakwe? (2)

Fishingamo nshi fintu wishi akwata? (3)

Lubali nshi ulwa mukashi mu lupwa? (4)

Cinshi cintu Lesa afwaya ku bafyashi na ku bana? (5)

Cinshi caba imimwene ya Baibolo pa lwa kupaatukana no kulekana? (6, 7)

1. Baibolo isoso kuti umulume e mutwe wa lupwa lwakwe. (1 Abena Korinti 11:3) Umulume afwile ukukwata fye umukashi umo. Bafwile ukuupana bwino mu kumfwana ne funde.—1 Timote 3:2; Tito 3:1.

2. Umulume alingile ukutemwa umukashi wakwe nga fintu fye aitemwa umwine. Alingile ukumusunga mu nshila Yesu asungilamo abakonshi bakwe. (Abena Efese 5:25, 28, 29) Tafwile ukupuma umukashi wakwe nelyo ukumusunga buluku buluku mu nshila iili yonse. Ukucila, alingile ukumupeelo mucinshi.—Abena Kolose 3:19; 1 Petro 3:7.

3. Wishi alingile ukubombesha ku kusakamana ulupwa lwakwe. Afwile ukupayanishisha umukashi wakwe na bana ifya kulya, ifya kufwala, no mwa kwikala. Na kabili wishi afwile ukupayanishisha ulupwa lwakwe ukukabila kwa ku mupashi. (1 Timote 5:8) Alatungulula mu kwaafwa ulupwa lwakwe ukusambilila pa lwa kwa Lesa ne mifwaile Yakwe.—Amalango 6:4-9; Abena Efese 6:4.

4. Umukashi alingile ukuba kaafwa musuma uwa mulume wakwe. (Ukutendeka 2:18) Alingile ukwaafwa umulume wakwe mu kusambilisha no kukansha abana babo. (Amapinda 1:8) Yehova afwaya umukashi ukusakamana ulupwa lwakwe mu kutemwa. (Amapinda 31:10, 15, 26, 27; Tito 2:4, 5) Alingile ukukwata akatiina ku mulume wakwe.—Abena Efese 5:22, 23, 33.

5. Lesa afwaya abana ukumfwila abafyashi babo. (Abena Efese 6:1-3) Enekela abafyashi ukusambilisha no kulungika abana babo. Abafyashi bakabila ukupoosa inshita na bana babo no kusambilila Baibolo na bene, ukusakamana ukukabila kwabo ukwa ku mupashi no kwa mu nkuntu. (Amalango 11:18, 19; Amapinda 22:6, 15) Abafyashi tabafwile ukusalapula abana babo mu nshila yakaluka nelyo iya culukusu.—Abena Kolose 3:21.

6. Lintu abaupana bakwata amafya mu kumfwana, balingile ukwesha ukubomfya ukufunda kwa mu Baibolo. Baibolo itucincisha ukulangisha ukutemwa no kubelelano luse. (Abena Kolose 3:12-14) Icebo ca kwa Lesa tacikoselesha ukupaatukana nge nshila ya kupwishishamo amafya yanono. Lelo umukashi kuti asalapo kufuma ku mulume wakwe nga ca kuti (1) umulume mu bumankonso akaana ukwafwilisha ulupwa lwakwe, (2) alibo wa lukaakala ica kuti ubutuntulu bwakwe no bumi fyaba mu busanso, nelyo (3) ukukaanya kwa mulume ukwacishamo kwacilenga ukuba icayafya kuli wene ukupepa Yehova.—1 Abena Korinti 7:12, 13.

7. Abaupana bafwile ukuba aba cishinka kuli umo no munankwe. Ubucende lubembu kuli Lesa na ku mwina mobe. (AbaHebere 13:4) Ukwampana kwa bwamba ku nse ya cupo e mulandu fye weka uwa mu Malembo uwa kulekaninapo ukusuminisha ukuupa nelyo ukuupwa cipya cipya. (Mateo 19:6-9; Abena Roma 7:2, 3) Yehova alipata ukulekana ukwabula imilandu ya mu Malembo kabili ukuupa nelyo ukuupwa ku muntu umbi.—Malaki 2:14-16.

[Ifikope pe bula 16, 17]

Wishi wa kutemwa alapayanishisha ulupwa lwakwe lwa ku mubili na lwa ku mupashi

[Icikope pe bula 17]

Lesa enekela abafyashi ukusambilisha abana babo no kubalungika