Isambililo 9

Ababomfi ba kwa Lesa Bafwile Ukuba aba Busaka

Mulandu nshi tufwile ukubela aba busaka mu nshila iili yonse? (1)

Cipilibula cinshi ukuba aba busaka lwa ku mupashi? (2)

aba busaka mu mibele? (3) aba busaka lwa ku muntontonkanya? (4) aba busaka lwa ku mubili? (5)

Musango nshi uwa milandile yakowela tulingile ukusengauka? (6)

1. Yehova Lesa wa busaka kabili wa mushilo. Enekela abamupepa ukutwalilila ukuba aba busaka—lwa ku mupashi, mu mibele, lwa ku muntontonkanya, na lwa ku mubili. (1 Petro 1:16) Cifwaya ukubombesha kwa cine cine pa kutwalilila ukuba aba busaka mu menso ya kwa Lesa. Twikala mu calo cakowela. Na kabili tulashomboka no kulemenena kwesu kwine ku kucite calubana. Lelo tatufwile ukunenuka.

2. Ubusaka bwa ku Mupashi: Nga ca kuti tulefwaya ukubombela Yehova, tatufwile ukwikatilila ku fisambilisho ifili fyonse nelyo imyata ya kupepa kwa bufi. Tufwile ukufuma mu mipepele ya bufi no kukanayafwilisha yene mu nshila iili yonse. (2 Abena Korinti 6:14-18; Ukusokolola 18:4) Lintu twasambilila icine pa lwa kwa Lesa, tufwile ukuba abasakamanisha ukukanalufiwa ku bantu abasambilisha ifya bufi.—2 Yohane 10, 11.

3. Ubusaka bwa mu Mibele: Yehova afwaya abamupepa ukuisunga nga Abena Kristu ba cine pa nshita shonse. (1 Petro 2:12) Alamona icili conse ico tulecita, nangu fye ni mu bumfisolo. (AbaHebere 4:13) Tulingile ukusengauka bucisenene ne fibelesho fimbi ifishasanguluka ifya cino calo.—1 Abena Korinti 6:9-11.

4. Ubusaka bwa ku Muntontonkanya: Nga ca kuti twaisushe mintontonkanya yesu na matontonkanyo ya busaka, ayasanguluka, imyendele yesu na yo ikaba iya busaka. (Abena Filipi 4:8) Lelo nga ca kuti tuleetetula pa fintu fyakowela, ifikafumamo ni ncitilo sha bubifi. (Mateo 15:18-20) Tulingile ukusengauka imisango ya fya kusekesha iyo ingakowesha imintontonkanya yesu. Kuti twaisusha imintontonkanya yesu ne fintu fya busaka pa kusambilila Icebo ca kwa Lesa.

5. Ubusaka bwa ku Mubili: Pa mulandu wa kuti bemininako Lesa, Abena Kristu balingile ukusunga imibili yabo ne fya kufwala ifya busaka. Tulingile ukusamba ku minwe pa numa ya kubomfya icimbusu, kabili tulingile ukusamba ku minwe pa kulya nelyo pa kupekanya ifya kulya. Nga ca kuti tamwakwata icimbusu ca menshi, ubusali bufwile ukushiikwa. (Amalango 23:12, 13) Ukuisunga aba busaka lwa ku mubili kulalundako ubutuntulu bwa bumi ubusuma. Iŋanda ya Mwina Kristu ilingile ukuba iyapempenkana kabili iya busaka mu kati na ku nse. Ilingile ukupusanako mu bwikashi nge ca kumwenako cisuma.

6. Imilandile ya Busaka: Ababomfi ba kwa Lesa bafwile ukulanda icine lyonse. Aba bufi tabakengile mu Bufumu bwa kwa Lesa. (Abena Efese 4:25; Ukusokolola 21:8) Abena Kristu tababomfya imilandile yabipa. Tabakutika ku fya mipuulwe ifyabipa nelyo ukulanda fyene ukusanshako fye na malyashi yambi ayabipa. Pa mulandu wa milandile yabo iya busaka, baba abapusanako pa ncito nelyo pa sukulu na mu bwina mupalamano.—Abena Efese 4:29, 31; 5:3.

[Ifikope pe bula 18, 19]

Ababomfi ba kwa Lesa bafwile ukuba aba busaka mu mbali shonse