Isambililo 12

Ukucindika Ubumi no Mulopa

Ni shani fintu tulingile ukumona ubumi? (1) ukuponye fumo? (1)

Ni shani fintu Abena Kristu balangisha ukuti baliba abayangwako pa lwa kucilikila amasanso? (2)

Bushe calilubana ukwipaya inama? (3)

Fibelesho nshi fimo ifishilangisha umucinshi ku bumi? (4) Ifunde lya kwa Lesa pa mulopa litila shani? (5)

Bushe ici cilesanshamo ukubikwamo umulopa? (6)

1. Yehova e Kamfukumfuku ka mweo. Ifya mweo fyonse fifwile ukutasha Lesa pa bumi bwa fiko. (Ilumbo 36:9) Ubumi bwalishila kuli Lesa. Nangu fye bumi bwa mwana ushilafyalwa mu nda ya kwa nyina bwalyumo mutengo kuli Yehova. Ukwipaya umwana alekula uwa musango yo ku mufulo fye calilubana mu menso ya kwa Lesa.—Ukufuma 21:22, 23; Ilumbo 127:3.

2. Abena Kristu ba cine balyangwako ku kuicingilila. Balashininkisha ukuti bamotoka babo na mayanda tafingaleta ubusanso. (Amalango 22:8) Ababomfi ba kwa Lesa tabangasha ubumi bwabo mu nshila ya busanso pa mulandu fye wa musamwe. E co tabangalako ifyangalo fya lukaakala ifyo ficena abantu bambi ku mufulo fye. Balasengauka ifya kusekesha ifikoselesha ulukaakala.—Ilumbo 11:5; Yohane 13:35.

3. Ubumi bwa nama na bo bwalishila kuli Kabumba. Umwina Kristu kuti aipaya inama ku kuisangila umunani ne fya kufwala nelyo ku kucilikila iyo nama ku kumulwalika no kumuletelo busanso. (Ukutendeka 3:21; 9:3; Ukufuma 21:28) Lelo calilubana ukucusha inama nelyo ukushipaya pa mulandu fye wa cangalo nelyo umusamwe.—Amapinda 12:10.

4. Ukupeepa, ukusheta inseke sha betele, no kubomfya imiti ikola ku musamwe te fya Bena Kristu. Ifi fibelesho fyalilubana pa mulandu wa kuti (1) filatulenga ukuba abasha ba fiko, (2) filonaula imibili yesu, na (3) tafyasanguluka. (Abena Roma 6:19; 12:1; 2 Abena Korinti 7:1) Kuti caba icakosa nga nshi ukuleka ifi fibelesho. Lelo tufwile ukucite co pa kuteemuna Yehova.

5. Umulopa na o walishila mu menso ya kwa Lesa. Lesa atila umweo, nelyo ubumi, waba mu mulopa. E co cintu calubana ukulya umulopa. Na kabili calilubana ukulya umunani wa nama iyo bashacinja bwino. Nga ca kuti inama ili iyatitilwa nelyo yafwila ku lukose, tailingile ukuliiwa. Nga ca kuti yalaswa no mufwi nelyo ukupikwa, ifwile ukucinjishiwa bwangu bwangu nga mulefwaya ukuilya.—Ukutendeka 9:3, 4; Ubwina Lebi 17:13, 14; Imilimo 15:28, 29.

6. Bushe calilubana ukusuminisha ukubikwamo umulopa? Ibukisha, Yehova afwaya ukuti tutalukeko ku mulopa. Ici cilepilibula ukuti tatufwile mu nshila iili yonse ukubikwamo umulopa wa bantu bambi nelyo fye uwesu wine uwasungilwe pa mbali. (Imilimo 21:25) E co Abena Kristu ba cine tabasuminisha ukubabikamo umulopa. Balasumina ukundapa kumbi, pamo nga ukubabikamo ifyasongoloka ifishilimo umulopa. Balafwaya ukuba aba mweo, lelo tabakeshe ukupususha ubumi bwabo ukupitila mu kutoba amafunde ya kwa Lesa.—Mateo 16:25.

[Ifikope pe bula 25]

Pa kuteemuna Lesa, tufwile ukusengauka ukubikwamo umulopa, ifibelesho fishasanguluka, no kuibika mu masanso ku mufulo fye