Pa Kuti Umuntu Atwalilile Ukuba Cibusa Wenu, Mufwile Ukuba Cibusa Wakwe

Bucibusa bwashintilila pa kutemwa. Lintu muleishibilako Yehova bwino, e lintu mukamutemwa sana. Kabili nga mwatemwa Lesa sana, e lintu mukafwaisha no kumubombela. Ici cikamulenga ukuba umusambi wa kwa Yesu Kristu. (Mateo 28:19) Kuti mwaba cibusa wa kwa Lesa umuyayaya nga mwaba mu lupwa lwa nsansa ulwa Nte sha kwa Yehova. Cinshi mufwile ukucita?

Mufwile ukulangisha ukuti mwalitemwa Lesa ukupitila mu kumfwila amafunde yakwe. “Uku e kutemwa Lesa, ukuti tunakile amafunde yakwe. Kabili amafunde yakwe tayayafisha.”—1 Yohane 5:3.

Bomfyeni ifyo musambilila. Yesu alandile ilyashi ililangilila ifyo twingacite ci. Umuntu wa mano akuulile ng’anda yakwe pa mwalala. Umuntu watumpa akuulile ing’anda yakwe pa musensenga. Lintu imfula iikalamba nga nshi yalokele, ing’anda yakuulilwe pa mwalala tayawile, lelo ing’anda yakuulilwe pa musensenga yaliwile icabipisha. Yesu atile abomfwa no kucita ifyo asambilisha bapala umuntu uwakuulile pa mwalala. Lelo abomfwa no kukanacita ifyo asambilisha bapala umuntu uwatumpa uwakuulile pa musensenga. Muntu nshi mwingatemwa ukuba pali aba?—Mateo 7:24-27.

Ukuipeela. Ici calola mu kuti mufwile ukupepa kuli Yehova no kumweba ukuti mulefwaya ukulacita ukufwaya kwakwe umuyayaya. Ukucita ukufwaya kwa kwa Lesa kulangilila ukuti muli musambi wa kwa Yesu Kristu.—Mateo 11:29.

Ulubatisho. “Ubatishiwe no kusambe membu shobe, pa kulilila kwi shina lyakwe.”—Imilimo 22:16.

Bombeleni Lesa na maka yenu yonse. “Conse ico mulecita, bombeni no mutima onse, nga kuli Shikulu, te ku bantu iyo.”—Abena Kolose 3:23.