Ukucincimuka

UKUCINCIMUKA kulenga ilyashi lyenu ukukaba. Nangu ca kuti calicindama ukulanda ifyebo fingafunda abantu, icikalenga ibumba ukupoosako sana amano ku milandile yacincimuka. Te mulandu ne ntambi mwakulilamo nelyo ubuntu bwenu, ukucincimuka cintu mwingasambilila.

Ukulanda no Kuyumfwa kwa ku Mutima. Ilyo Yesu alelanda no mwanakashi umwina Samaria, atile abapepa Yehova bafwile ukumupepela “mu Mupashi na mu cine.” (Yoh. 4:24) Ukutasha kwa kufuma ku mutima kufwile ukubalenga ukumupepa kabili ukulingana ne cine cisangwa mu Cebo ca kwa Lesa. Nga ca kuti umuntu alatasha, cikamonekela mu milandile yakwe. Akulafwaisha ukwebako bambi ulwa fintu fya kutemwa ifyo Yehova apekanya. Ilyo alelanda, icinso cakwe, ifyo alebomfya umubili, ne shiwi lyakwe fikalanga ifyo aleyumfwa pali fyo fyebo.

Lelo, cinshi cingalenga kalanda uwatemwa Yehova kabili uwatetekela ifyo alesosa limo ukukanacincimuka pa kulanda? Tafwile ukupekanya fye ifya kusosa. Afwile ukobelwa ne fyebo fyakwe, ukuisanshamo no mutima onse. Tutile aebwa ukulanda pe lambo lya cilubula ilya kwa Yesu Kristu. Ilyo kalanda alelanda ili lyashi, tafwile fye ukutontonkanya pa fishinka, lelo afwile ukutasha pa fintu ilambo lya kwa Yesu lyacitila wene ne bumba lyakwe. Alekabila ukulaibukisha ifyo atootela Yehova Lesa na Kristu Yesu pali uku kupekanya kushaiwamina. Alekabila ukulatontonkanya pa cilolelo cawamisha ica mweo ico ili lambo lipeela abantunse, ne ci ni nsansa sha muyayaya no bumi bwapwililika muli paradise wa pe sonde ukabweshiwa! E ico alingile ukuleka umutima wakwe ukobelwa ne fi fyebo.

Baibolo isosa pali Esra kalemba, uwali kasambilisha mu Israele, aiti, “ateyenye umutima wakwe ku kwetetula amalango ya kwa Yehova, kabili ku kuyacita, kabili ku kusambilisha muli Israele.” (Esra 7:10) Nga twacite fi na ifwe, e kutila ukupekanya ifyebo e lyo ne mitima yesu, tuli no kulanda ifilefuma ku mutima. Ukulanda icine muli yo nshila kuti kwayafwa nga nshi abo tulanda nabo ukuti batemwe sana icine.

Tontonkanyeni pe Bumba Lyenu. Na cimbi icingamwafwa sana ukucincimuka kushininwa ukuti ibumba lyenu lilekabila ukumfwa ifyo mwalasosa. Kanshi ilyo mulepekanya ilyashi, mufwile ukufwaya ifyebo fisuma e lyo no kupepa kuli Yehova ukuti amutungulule mu kubomfya ilyo lyashi ukunonsha abo muli no kulandako. (Amalu. 32:8; Mat. 7:7, 8) Bebeteni umulandu ibumba lyenu lilekabila ukumfwa ifyo fyebo, ifyo bali no kunonkelamo, na fintu muli no kufilanda pa kuti bengamona ubucindami bwa fiko.

Pitulukeni mu fyebo fyenu mpaka musangemo icilemulenga ukucincimuka. Tacilolele mu kuti fifwile ukuba ifipya, lelo kuti mwafilandila fye mu nshila ipya. Nga mwapekanya ifyebo fingaafwa ibumba lyenu ukukosha bucibusa bwabo na Yehova, ukutasha pa fyo atupekanishisha, ukwishiba ifya kwikala na mafya ya muli buno bwikashi bukote, nelyo ukubafwa ukushimikila bwino, ninshi tapali icingamulesha ukucincimuka ilyo mulelanda ilyashi lyenu.

Ni shani nga mukwete ilyashi lya kubelenga pa cintubwingi? Pa kuti mucincimuke pa kubelenga, tamufwile fye ukwishiba ifya kushimbula bwino amashiwi no kuyabika mwi longo. Sambilileni ifyo fyebo. Nga muli no kubelenga icipande mu Baibolo, sapikenipo pa lwa ifyo fyebo. Shininkisheni ukuti namumfwa umo filolele. Tontonkanyeni pa fyo fingamunonsha ne bumba lyenu, kabili fibelengeni mu nshila ya kuti abaleumfwa banonkelemo.

Bushe mulepekanishisha ubutumikishi bwa mwi bala? Pitulukeni mu fyebo muli no kulanshanyapo na malembo mulepanga ukuyabelenga. Tontonkanyeni na pa filetontonkanya abantu. Finshi filelandwapo pa mulabasa ne nyunshipepala? Mafya nshi bashomboka na yo? Nga mwaipekanya ukulanga abantu ukuti Icebo ca kwa Lesa cabamo ifya kubafwa ukupwisha amafya ayabakuma, mukafwaisha ukubebako, kabili ukucincimuka kukaishila fye ukwine.

Cincimukeni Ukupitila mu Milandile Yenu. Imilandile yenu kuti yalanga ukuti namucincimuka. Ne cinso cifwile ukumoneka ifyo fine ilyo mulelanda. Mufwile ukumfwika ukuti namushininkisha ifyo mulesosa, te kumfwika nga baumina kumo iyo.

Mulekabila ukulinga. Bamo balacincimuka fye pa cili conse. Kuti bakabila ukwafwiwa pa kuti beshibe ati umuntu nga acishamo ukucincimuka nelyo nga afika na ku kubilima pa kusosa, ibumba likatontonkanya pali wene ukucila ukulaumfwa ifyo alesosa. Lubali lumbi, aba nsoni bakabila ukukoseleshiwa ukuti balecincimuka.

Ukucincimuka kulambukila. Nga muleampana bwino ne bumba kabili namucincimuka pa kulanda, ibumba lyenu na lyo likambukilwa no ko kucincimuka. Apolo ali uwacincimuka pa kulanda, kabili calondololwa ukuti ali ni nkolobwa mu kulanda. Nangu ca kuti Umupashi wa kwa Lesa nga naumulenga ukubilima, ninshi imilandile yenu iyacincimuka ikalenga abalemukutika ukucitapo cimo.—Imil 18:24, 25; Rom. 12:11.

Ukucincimuka Ukwalingana ne Fyebo. Cenjeleni ukuti mwicishamo ukucincimuka ukupulinkana ilyashi lyonse ica kuti ibumba lyenu lyanaka. Nga cabe fyo tabakomfwe ukukonkomesha kwenu ukwa kuti babombele pa fyo mulelanda. Ici cilelanga ubucindami bwa kupekanya ifyebo fingalenga imilandile yenu ukuba iyalekanalekana. Mwileka imilandile yenu ukumfwika kwati namusuula ifyo mulelanda. Nga mwasala bwino ifyebo fyenu, mukafitemwa icine cine. Lelo ifishinka fimo fifwaya mucincimuke pa kufilanda ukucila fimbi, kabili ifi fifwile ukutobenkanishiwamo bwino bwino ukupulinkana ilyashi lyenu lyonse.

Ifishinka fikalamba na kucilisha e filingile ukulandwa mu kucincimuka. Ilyashi lyenu lifwile ukukwata akalume, kabili pa kulanda mufwile ukulola uko kwine ku kalume. Apo pa kalume e pa kantongolilo ka lyashi lyenu, ilingi line e pa kulanda ifishinka fya kucincisha ibumba. Apo nomba mwashinina ibumba lyenu, mulekabila ukulicincisha, ukulilanga ubunonshi bwaba mu kubomfya ifyo mwalandapo. Ukucincimuka kwenu kukamwafwa ukufika bakomfwa wenu pa mitima. Ukucincimuka takufwile ukuba kwa kuipatikisha. Pafwile paba umulandu wa kucincimukila, kabili ifyebo fyenu fikamulanga umulandu mufwile kucincimukila.